BIECHHOTUHPA 12 - Mara Bible RV (BSI)

Na thyutlia nota châ taotuhpa a thei mah y

¹ Na thyutliana nohzy liata, châ Taotuhpa a thei thlâh ha mah y. Chhiena nohzy a vaw tlô hlâta nata “Alyna rai hnei va na,” na tahna kôzy â vaw hnia hlâta;

² noh nata khaihna nata thlâpâ nata awhsi zy a zoh hlâta nata vâsua khai tawhta meihdozy a kua heih hlâta;

³ o vaituhpazy a chalyupa ta, thatlôpazy ama ky a pakopa ta, ama chyh tupa vâta sâh chariehtuhpazy a chalihpa ta, opy tawhta a saituhpazy ama mo a zoh hlâta;

⁴ khiliah ochhizy khawpa ta, sâh chariehpa pyu diapa ta, pavaw sâpa pyu vâta chyhsa thyupa ta, hlasathaipa laihsazy hla pyu a diah hlâta;

⁵ su sâhpa chipa ta, lâpi liata chichhih­pazy ypa ta, kuasâh tho a paw pawhpa ta, khawsu dusawta ta siepa ta, a chhâzaw o lâ â di bâ awpa vâta chyhsapa ta khopa hnei khao leipa ta a y hlâta, mâchhiesatuhpazy khiliah liata amâ hlaihlâ hlâta;

⁶ tâkâ ri a chie hlâta, ngôh biebuh a kei hlâta, tihnawh liata alei beih pakeipa a châ hlâta, tikhaoh liata tiaki a kei hlâta;

⁷ dohlei a yna tyhpa alei lâ a kua heih hlâta nata thlahpa a pietuhpa Khazohpa lâ a kua heih hlâta, châ Taotuhpa cha khâ a thei mah y.

⁸ Hraoleipazy hraoleipa, ato zydua he hraoleipa sai a vaw châ, Biechhotuhpa ta a tah.

Khazohpa chi la, a biepiepazy zyh mah y

⁹ Biechhotuhpa cha sona a hneipa dei châ leipa ta, chyhsazy hnohta pahnona pachu ta, bieso hluhpi pachâ ta, a chu ta, a pha ngaitapa ta a paryhpakhy.

¹⁰ Biechhotuhpa cha bie khochhihpazy hmô awpa ta tlua ta, biehmeiseihpazy cha â do ngaitapa ta a rohtuhpa a châ.

¹¹ Chyhsa sopa biezy cha chôchahrei pazaopa hawhta châ ta, bieso lapakhypazy cha thuakhai ta â i ngaitapa ta khaipâ hapa hawhta a châ. Chazy cha Mietaku Vaituhpa pakha ta a piepazy a châ khai.

¹² Ei sawchapawpa y, hezy dei châ leipa ta, hezy khô lâta hmozy liata chhao a chado mah y. Châbu hluhpi taopa ta chhâna hnei leipa ta, a chu hluhpa chhao sapa rietheina a lapa tlâ a châ.

¹³ Bie zydua reipa nata theipa a châ khai tawhta, cha bie zydua sypahmaohna cha he he a châ: Khazohpa chi la, a biepiepazy a pyh mah y. Cha cha chyhsa to tao awpa ama maophaohna a châ.

¹⁴ Khazohpa ta hmo taopa zydua, a phapa chhao, a chhiepa chhao, pachia khai aw ta, arulâta taopa zydua chhao a pachia khai aw.