BIECHHOTUHPA 10 - Mara Bible RV (BSI)

Hruna theizy

¹ Mathyu thipa thu roh ta ropahâhpa roh a pahleipa hawhta, Bâhta hruna ta sona nata zachhihna a pahlei thei.

² Asopa palôh cha chachâh lâ a heih ta, Ahrupa palôh deikua cha chavei lâ â heih tyh.

³ Ahrupa cha lâpi liata a sie no taihta sona a phahla ta, Ahrupa a châzie chyhsa to hnohta a phuah laih.

⁴ Ryureituhpa ta na chô liata a hie a hâh khiahta cha, Na yna su puasai khah y; Hiehâhna a pai tita cha, Taopasina lai ngaitapa chhao a ngiahthaipa a châ tyh.

⁵ Noh ry liata hmo chhiepa miakha hmô na ta, ryureituhpa tao chheipa lai ngaitapa a châ:

⁶ Ahrupazy cha su sâhpazy liata sopa châ ei ta, hneirôhpazy su nawhpa liata amâ tyupa ei hmô.

⁷ Arâ chô liata seizy hmô na ta, seizy hawhta alei liata abeizy ama siepa ei hmô.

⁸ Khaohtlô a chaopa cha a khaohtlô chaopa liata tla aw ta, Dôhna a chatôhpa chhao parih ta a pachu aw.

⁹ Alô chaotuhpa cha, Alô ta hmah paphao ta; Tho patlawtuhpa chhao, Thozy ta a hrona ama pahlei tyh.

¹⁰ Thua chhaichhi tiah leipa sala, Chyhsa ta a chata vei khiahta cha, Tha hmâ via awpa byuh ta; Sona deikua cha, Hlaotlohna a pietuhpa a châ.

¹¹ Parih ta pamaohpa a châ hlâta, A pamaohtuhpa a pachu ha khiahta cha, Pari pamaohtuhpa châta phahnaina y vei.

¹² Asopa cha a pakah biezy ta ngiachhiena pahlaosa ta, Ahrupa hmao deikua cha ano a palâtuhpa a châ.

¹³ A pakah tawhta bie a puapata nahta, Hruna bie sai pua tyh ta; A bie chhâna lâ cha, Pei a hriapa hrungâna bie a châ tyh.

¹⁴ Hmialâ daihti a pahnopa y leipa ei ta, Thi hnôhlâ ta hmo a y awpa a reih theipa ama y leipa chhao ta, Ahrupa cha bie hluhpi reih ta, a reih via lymâ.

¹⁵ Ahrupa cha a hriapasana ta a tha pachhâ ta, Khihpi lâpi chhao pahno khao vei.

¹⁶ Hy râh, na bei châta sei hnei chi ta, Na beimachâzy my ta kyh a chhi tyhpa râh y, Na hu a po na!

¹⁷ Hy râh, na bei châta bei pathla hnei chi ta, Na beimachâzy a daihti liata kyh a chhi tyhpa y, Na nohlao na! Kyhchhina liata pari awpa ta doh leipa ei ta, Thatlôna châta ama doh tyh.

¹⁸ Thathina vâta vâphuh tla ta, Diathlâna vâta o a zu.

¹⁹ Pahnei awpa ta kyhchhi taopa châ ta, Kresawhti ta hro palysa ta, Tâkâ cha khopa to hneina a châ.

²⁰ Abei cha chhiesapa leipa la, Na palôhrupa liata chhao chhiesapa leipa la, Na rakhô liata hneirôhpa chhiesapa hra khah y. Vâ pavawzy ta na ao a zawkhei aw ei ta, Mathlaw a hneipa hmohrohneipazy ta ama chho pathlei aw na.