ÂTHAONA 7 - Mara Bible RV (BSI)

Tipaua

¹ Chatawhcha Abeipa ta Nôah hnohta, “Nâma nata na chhôhkha zydua balyh liata a ngia teh u. He chhâ liata nâma deita he ei hmiakô liata chyhsa siapa a y chhôhpa na châ.

² Alei chô liata ama chi â zao thei nawpa ta, sa pathaihpa chi to hry tawhta a chapawpa nata a chanôpa bao sari chyu a ngiakhei la, sa pathaih leipa hry tawhta a chapawpa nata a chanôpa bao kha chyu a ngiakhei hra la,

³ avâ liata pavaw chi to hry tawhta a chapawpa nata a chanôpa bao sari chyu a ngiakhei mah y.

⁴ Noh sari khai tawhta alei chô liata noh sypalih nata zâ sypalih chhôh avâ pasuasa aw na ta, chatanachata hmohrohneipa ei taopa zydua alei chô tawhta ei pahleipadia khai ha aw,” tah ta.

⁵ Nôah cha Abeipa ta bie a piepa zydua tao ta.

⁶ Alei chô liata tipaua a vaw tlô nota, Nôah cha kô 600 uhtheipa a châ.

⁷ Tipaua a vaw tlô awpa vâta Nôah cha a lapinô, a sawchapawzy nata ama lapinôzy chhaota balyh chhôh lâ a ngia ta.

⁸ Sa pathaihpa chi to, sa pathaih leipa chi to, pavaw chi to nata alyhpasa chi to cha, a chapawpa nata a chanôpa a bao bao ta Khazohpa biepiepa hawhta,

⁹ Nôah hnohta balyh chhôh lâ a ngia ei ta.

¹⁰ Noh sari khai tawhta alei chô liata tipaua vaw tlô ta.

¹¹ Nôah hrona kô 600 a tloh kô, thla nona, noh hrawh hleisari noh, cha noh ta, Ti a thu ngaitapa hnawh zydua kaw pali ta, Avâ opy zydua â pahy khai haw.

¹² Noh sypalih nata zâ sypalih chhôh alei chô liata avâ suah ta.

¹³ Cha noh lia tlai ta Nôah nata a lapinô, a sawchapaw pathôh Semâ, Hamâ nata Zaphethâ nata ama lapinôzy cha balyh chhôh lâ a ngia ei ta.

¹⁴ Ama hnohta râhsa chi to, osa chi to, alei liata alyhpasa chi to, pavaw chi to, mathlaw hneipa chi to balyh lâ a ngia hra ei ta.

¹⁵ Hrona hu a hneipa hmohrohneipa maihta a bao bao ta Nôah lâ a vy ei ta balyh lâ amâ ngia lymâ.

¹⁶ Khazohpa ta bie a piepa hawhta, sa to tawhta a chapawpa nata a chanôpazy cha balyh chhôh lâ a ngia khai ei ta. Cha khai tawhta Abeipa ta Nôah cha khawhlôh ha ta.

¹⁷ Noh sypalih chhôh alei chô liata tipaua tlô ta. Ti cha lai via lymâ ta, balyh cha alei tawhta chalopa ta ti chô liata a pho ta.

¹⁸ Ti cha a sâh lymâ ta, alei chô liata thata lai ta, balyh cha ti chô liata a pho lymâ ta.

¹⁹ Alei chô liata ti cha thata lai ta, avâ ry liata su to liata tlâh sâhpa zydua a vao khai haw.

²⁰ Tlâh sâhpazy cha ti laipa ta dy hrawh hleipangawh tlai ta a vao ha ei.

²¹ Alei chô liata husona a hneipa to zydua thi khai ei ta, pavawzy, sahrohzy, râhsazy, alei chô liata hmotaopa to nata chyhsa zydua chhao ama thi khai haw.

²² Alei chô liata pahrâpa, hnapasu liata husona hneipa maih ama thi khai haw.

²³ Alei chô liata hrona a hneipa zydua pamua khaipa châ ei ta, chyhsazy, sazy, âlyhpasazy nata avâ liata pavawzy alei chô tawhta pamua khaipa ama châ. Nôah nata a hnohta balyh liata a ypazy deita amâ boh.

²⁴ Chatanachata alei cha noh 150 chhôh tipaua ta vao ta.