ÂTHAONA 6 - Mara Bible RV (BSI)

Tipaua

¹ Chyhsapa cha alei chô liata vaw pôh lymâ ei ta, sawchanôzy ama sa nahta,

² Khazohpa sawchapawzy ta chyhsapa sawchanôzy cha chhithai tah kaw ei ta, ama khopa chyu lapinô ta hnei ei ta.

³ Chatawhcha Abeipa ta, “Ei thlahpa he chyhsapa hnohta chhâzaw ta y aw vei, ano cha thi theipa châ tlôh ta, a hro chhôh nohzy cha kô 120 a châ aw,” tah ta.

⁴ Cha nohzy liata nata cha hnôhlâ chhao ta, alei chô liana heta mopahreihpa sahlao y ei ta. Cha chyhsazy cha Khazohpa sawchapawzy ta chyhsa sawchanôzy hnei ei ta ama pathlazy ama châ. Âmo he hlâno ta chyhsa thatlôpa nata mohpathâhpazy kha ama châ.

⁵ Alei chô liata chyhsapa cha thata vaw molei ta, a palôh phaozie chhao, khatino rai ta moleina lâ a heihpa a châzie Abeipa ta hmô ta.

⁶ Alei chô liata chyhsapa a vaw taopa vâta Abeipa cha a ngiapachhi ta, a palôh pasa ngaita ta.

⁷ Chavâta Abeipa ta, “Chyhsapa ei taopa he alei tawhta ei pahleipadia aw. Chyhsapazy, sazy, âlyhpasazy nata avâ pavawzy ei vaw taopa he ei ngiapachhi na,” tah ta.

⁸ Nôah deikua cha Abeipa modypa ta y ta.

Nôah

⁹ He he Nôah pathlazy thâtih a châ. Nôah cha chyhsa siapa châ ta, ano chhâ chyhsazy hry liata seina a hnei leipa a châ. Nôah cha Khazohpa nata a kaolâh tyh ei ta.

¹⁰ Nôah ta sawchapaw pathôh Semâ, Hamâ nata Zaphethâ zy sa ta.

¹¹ Alei cha Khazohpa hmiakô liata rao khai ha ta, thachahra hmâna sai ta bie ta.

¹² Khazohpa ta alei cha moh ta, alei chô chyhsa zydua ta ama molei khai hapa vâta a rao khai hapa ta hmô ta.

¹³ Chavâta Khazohpa ta Nôah hnohta, “Hmohrohneipa zydua chhâna ei hmiakô liata a vaw tlô. Âmo vâta alei he thachahra hmâna ta bie ta, chavâta âmo cha alei duata ei pahleipadia khai aw ei.

¹⁴ Nâ deikua cha meisah vyhpa tho ta balyh tu la, a chhôh liata chhôhpadâhpazy tao mah y. Balyh chhôh nata a khôthozy cha meisah chathli na hnia khai aw.

¹⁵ Hetana heta balyh cha na tu aw: A doh lâ dy 300, a hâ lâ dy 50, â sâhna lâ dy 30 a châ aw.

¹⁶ Balyh vâphuh tao aw chi ta, vâphuh nata a pâhchhô likawh liata khaihna a ngia nawpa châta dy kha na pahlôh aw. Balyh kâ lâta chhikao tao aw chi ta, a ry chhâh, chhâh nona nata chhâh thôhna hneipa ta na tao aw.

¹⁷ “Avâ ry liata hrona a hneipa zydua nata husona a hneipa to pahleipadia khai awpa ta, keima tlai ta alei chô liata tipaua patlôsa aw na ta, alei chô liata hmo to zydua ama leidia khai aw.

¹⁸ Nâma hnohta deikua cha biehrai ei tao aw. Balyh chhôh lâ a ngia aw chi ta, na lapinô, na sawchapawzy nata ama lapinôzy chhao amâ ngia hra aw.

¹⁹ Hmohrohneipa to tawhta a chapawpa nata a chanôpa bao no chyu a ngiakhei aw chi ta, na hnohta na pahro aw ei.

²⁰ Pavaw chi to, sa chi to nata alyhpasa chi to, bao no chyu ta na hnohta a vy aw ei ta, balyh chhôh liata na pahro hra aw ei.

²¹ Nâ nata âmo châta nie awpa chi to a ngiakhei aw chi ta, nama nie awpa ta na soh pakhy aw,” tah ta.

²² Cha hawhna chata Nôah ta tao ta, Khazohpa biepiepa zydua hawhta ato tao khai ta.