ÂTHAONA 5 - Mara Bible RV (BSI)

Âdâh pathlazy

¹ He he Âdâh pathlazy rona châbu a châ. Khazohpa ta chyhsapa a tao nona khata, ano cha Khazohpa lyupa ta tao ta,

² chapaw nata chanô ta a tao ei. Taopa ama châ nona khata, âmo cha byhnâ awpa ta, chyhsapa tahpa ta moh a bi ei.

³ Âdâh cha kô 130 a châ nahta, ano a lyupa, ano kakuapa sawchapawpa sa ta, a moh Sethâ a bi.

⁴ Sethâ a sa tawhta Âdâh cha kô 800 hroh ta, sawchapawzy nata sawchanôzy sa via ta.

⁵ Âdâh cha kô 930 hroh ta, thi ha ta.

⁶ Sethâ cha kô 105 a châ nahta, Enawsâ sa ta.

⁷ Enawsâ a sa tawhta Sethâ cha kô 807 hroh ta, sawchapawzy nata sawchanôzy sa via ta.

⁸ Sethâ cha kô 912 hroh ta, thi ha ta.

⁹ Enawsâ cha kô 90 a châ nahta, Kenâ sa ta.

¹⁰ Kenâ a sa tawhta Enawsâ cha kô 815 hroh ta, sawchapawzy nata sawchanôzy sa via ta.

¹¹ Enawsâ cha kô 905 hroh ta, thi ha ta.

¹² Kenâ cha kô 70 a châ nahta, Mâhalâle sa ta.

¹³ Mâhalâle a sa tawhta Kenâ cha kô 840 hroh ta, sawchapawzy nata sawchanôzy sa via ta.

¹⁴ Kenâ cha kô 910 hroh ta, thi ha ta.

¹⁵ Mâhalâle cha kô 65 a châ nahta, Zare sa ta.

¹⁶ Zare a sa tawhta Mâhalâle cha kô 830 hroh ta, sawchapawzy nata sawchanôzy sa via ta.

¹⁷ Mâhalâle cha kô 895 hroh ta, thi ha ta.

¹⁸ Zare cha kô 162 a châ nahta, Enawka sa ta.

¹⁹ Enawka a sa tawhta Zare cha kô 800 hroh ta, sawchapawzy nata sawchanôzy sa via ta.

²⁰ Zare cha kô 962 hroh ta, thi ha ta.

²¹ Enawka cha kô 65 a châ nahta, Methuselâ sa ta.

²² Methuselâ a sa tawhta Enawka cha kô 300 chhôh Khazohpa nata a kao ei ta, sawchapawzy nata sawchanôzy sa via ta.

²³ Enawka cha kô 365 tlai hroh ta.

²⁴ Enawka cha a hro chhôh ta khazohpa a kao tyh ta, chavâta Khazohpa ta ano cha la ha ta, hmô awpa y khao vei.

²⁵ Methuselâ cha kô 187 a châ nahta, Lâmeka sa ta.

²⁶ Lâmeka a sa tawhta Methuselâ cha kô 782 hroh ta, sawchapawzy nata sawchanôzy sa via ta.

²⁷ Methuselâ cha kô 969 hroh ta, thi ha ta.

²⁸ Lâmeka cha kô 182 a châ nahta, sawchapaw sa ta,

²⁹ “Abeipa ta chhie a sa hapa chhaohlei liata eima hriapasana nata rietheinazy tawhta phao miah pahua awpa,” tah ta a moh Nôah a bi.

³⁰ Lâmeka cha Nôah a sa tawhta kô 595 hroh ta, sawchapawzy nata sawchanôzy sa via ta.

³¹ Lâmeka cha kô 777 hroh ta, thi ha ta.

³² Nôah cha kô 500 a châ nahta, Semâ, Hamâ nata Zaphethâ zy sa ta.