ÂTHAONA 49 - Mara Bible RV (BSI)

Zakaw ta a sawzy byhnâ a awpa ei

¹ Zakaw ta a sawchapawzy aw ta, “Na vaw chadô teh u, noh hnôhlâ ta nama chô liata hmo a vaw tlô awpazy ei cha chho aw ei,” tah ta, hetana heta a chho ei:

² “Nâmo, Zakaw sawchapawzy saih u, A hmaohpa ta nathlie u la, Nama paw Izarei bie nathlie teh u.

³ “Rubena, nâ cha ei sawchapaw uhtheipa châ chi ta, Ei hmotaotheina na châ; Ei thatlôna thei hmiatuapa châ chi ta, Zachhih chaipa nata biehnei chaipa na châ.

⁴ Châhrasala ti hawhta a i leipa na châ; Na paw rakhô kiah chi ta, Na papuapaleipa vâta, Chônôchaina to khao aw va chi. Ei rakhô a kiapa kha!

⁵ “Simeôna nata Livai cha unawh châ ei ta, Ama zaozizy cha thachahra hmâna chaihraizy a châ.

⁶ Ama ryureina liata ei thlahpa a hlao leipa aw ta, Ama pakhypi liata ei rônahna a hlao aw vei. Hiehâhpa ta chyhsa thie ei ta, Khotlâ ta viahchao tôhpazy ama chhawh.

⁷ Ama pathichhiena cha chhiesapa ta y mawh sy, A tah tu pâ haw; Ama hiehâhna chhao chhiesapa ta y mawh sy, A ru tu pâ haw. Zakaw liata pachhaihpazaoh aw ei na ta, Izarei liata ei hiepatla aw ei.

⁸ “Zudâh, nâ cha na unawhzy ta cha reithai aw ei ta, Na ku ta na chariahzy rao patu aw ta, Na paw sawchapawzy na hmiakô liata amâ bôh aw.

⁹ Zudâh cha chakeibarôhneipa taw châ ta, Hy ei sawchapawpa, Sa taipa tawhta a laiseihpa na châ. Zudâh cha a bôh ta, Chakeibarôhneipa hawhta a byu ta, Chakeibarôhneipa panô hawhta â byu tyh; Ahy a pathyu ngâh aw?

¹⁰ Ryureina chôchahrei ta Zudâh puasai leipa aw ta, Ryureituhpa chôchahrei a pheizy likawh tawhta pua aw vei. Reithaina a hnohta vaw tlô aw ta, Phopizy ta a bie ama zyh aw.

¹¹ A alâ taw kre zôh liata hraih aw ta, Kre zôh phapa liata a alâ taw a hraih aw. A chysiazy kresawhti liata pasu aw ta, A pohzy kre thisaih liata a ny aw.

¹² A mokhaohzy kresawhti hlâta dô via aw ta, A hâhzy sâhpiti hlâta a dieh via aw.

¹³ “Zebulawna cha tilaipi kiah liata pahrâ aw ta, Balyh pahâna raphyu châ aw ta, Sidaw taihta a râhri a tlô aw.

¹⁴ “Iskâra cha alâ tôhpa chahrapa châ ta, Mietaku zaw hry liata â byu.

¹⁵ Apahâna su a phapa ta pahno ta, Râh chhao khochhihpa a châzie a hmô. Hmo phao awpa ta a ngiatlâh za pahnai ta, Rai pahriasa raruahna liata sei ta a y.

¹⁶ “Dânâ Izarei phopi miakha ta a duah aw ta, A phopi chô liata ryureituhpa a châ aw.

¹⁷ Dânâ cha lâpi liata parih châ aw ta, Lâthlôh liata vâzi a châ aw; Arâ ngavâhmaothy liata pachu aw ta, Arâ a kiahpa â die lâta a patlasatuhpa a châ aw.

¹⁸ “Hy Abeipa, na pachhana ei hâ thlâh haw!

¹⁹ “Kâdâ cha chariahpazy ta siehnao aw ei ta, Châhrasala ama ngavâhmaothy liata a tu aw ei.

²⁰ “Asera cha a niedo pha aw ta, Abei pati pahâhpazy a papua aw.

²¹ “Nâthalai cha sasu pazopa châ ta, Taw pha a pataw lymâ aw.

²² “Zawsi cha kre zôh pathei khoh ngaitapa châ ta, Tihnawh kiah liata a pathei khoh ngaitapa a châ; Thokhy khô lâ taihta a chiahzy â zawh.

²³ Libaw kathaipazy ta thata a dyuh ei ta, Ano cha ka ei ta thata amâ hao.

²⁴ Châhrasala Zakaw Khazohpa Thatlôpa ku ta, Vaituhpa Izarei Lôpanô baona ta, A libaw pachyu ta, A bâh thapatlôpa ta a y.

²⁵ Châ bao awpa na paw Khazohpa vâta, Byhnâ châ pie awpa Atotaotheipa vâta, Chô lâ vâ byhnâzy to aw chi ta, A ry lâta ti athupa byhnâzy topa ta, Sâhpi nata chhi byhnâzy na to aw.

²⁶ Na paw byhnâzy cha nâ pathlatuhpazy byhnâ khô ta, Chhâzaw tlâhthlôhzy chhâna taihta a tlô. Chazy cha Zawsi luh liata y aw ta, A unawhzy tawhta pananopa khi liata a y aw.

²⁷ “Benzami cha changie zohpa châ ta, My ta sa taipa nie aw ta, Zâlâ ta hraopa sôh a rai aw,” tah ta.

²⁸ Cha zydua cha Izarei pho hrawh hleinozy châ ei ta, chazy cha byhnâ a awpa no ei ta ama paw biereipazy a châ. Byhnâ ama to awpa lymâ hawhta byhnâ a awpa ei.

Zakaw thina nata pabuna

²⁹ Zakaw ta âmo cha ryu a hi ta, ama hnohta, “Ei chiheihzy hnohta pahlyhpa ta ei y daihmâ haw. Hiti chyhsa Epharaw lyu liata a ypa lôpu liata na pabu muh vy.

³⁰ Abarahâ ta thlâ su châta hnei awpa ta, Hiti chyhsa Epharaw lôpu a lyu chhaota a chaleipa, Kâna râh Mamre kiapâh ta a ypa Mâkâpelâ lyu liata lôpu tlai liana kha na pabu muh vy.

³¹ Cha liata Abarahâ nata a lapinô Sârâ pabu ei ta, cha liata Aisika nata a lapinô Rebekâ pabu ei ta, cha liata Liah ei pabu.

³² Cha liata lyu nata lôpu zy cha Hiti mo tawhta chaleipa a châ,” tah ta.

³³ Zakaw cha a sawchapawzy ryu â hi khai nahta, rakhô lâ a phei khaih ta, a thlahpa pathlie ta, a chiheihzy hnohta pahlyhpa ta y ha ta.