ÂTHAONA 47 - Mara Bible RV (BSI)

Zakaw chhôhkha Kôse liata ama pahrâ

¹ Zawsi ta Phiraoh chho ta, a hnohta, “Ei paw nata ei unawhzy cha ama mietaku zawzy, ama viahchao hri zy nata ama hneipa zydua chhaota Kâna râh tawhta ama za tlô haw, tahmâ Kôse râh liata ama y,” tah ta.

² A unawhzy hry tawhta papangawh a chhi ta, âmo cha Phiraoh hmiakô liata paduasa ta.

³ Phiraoh ta Zawsi unawhzy hnohta, “Khâpa rai nama hria tyh?” tah ta. Âmo ta Phiraoh hnohta, “Châ chakaotuhpazy he miah pathlatuhpazy hawhta mietaku vaituhpazy eima châ,” tah ei ta.

⁴ Phiraoh cha chho via ei ta, “Kâna râh liata chakâh mozohpa vâta, châ chakaotuhpazy mietaku zawzy châta sibie hrohpa y khao leipa ta, chavâta he râh liata y chy awpa ta eimâ zu. Ngiachhiepa ta châ chakaotuhpazy he Kôse râh liata miah paysa mah y,” tah ei ta.

⁵ Phiraoh ta Zawsi hnohta, “Na paw nata na unawhzy nâ lâ a zu ha ei ta,

⁶ Izi râh cha â hôh thlâh ha mâh tâh. Na paw nata na unawhzy cha râh pha chaipa liata pahrâsa mah y. Kôse râh liata pahrâ mawh ei sy. Ama hry liata a tao thei awpa chyhsa na pahno khiah ei ta cha, ei sahroh chô liata hyutuhpa ta na tao aw ei,” tah ta.

⁷ Zawsi ta a paw Zakaw cha a chhi ta, Phiraoh hmiakô liata paduasa ta, Zakaw ta Phiraoh cha byhnâ awpa ta.

⁸ Phiraoh ta Zakaw hnohta, “Kô khazie na châ haw?” tah ta.

⁹ Zakaw ta Phiraoh hnohta, “Ei khitlyna kôzy cha kô 130 a châ. Ei hro chhôh kôzy cha chyhta ta, riethei â chhih kaw. Nâ pathlatuhpazy khitlyna nohzy liata ama hro chhôh kôzy a kho vei,” tah ta.

¹⁰ Zakaw ta Phiraoh cha byhnâ awpa ta, Phiraoh hmiakô tawhta pua ha ta.

¹¹ Zawsi ta a paw nata a unawhzy châta yna su paryh ta. Phiraoh biepiepa hawhta, Izi râh liata râh pha chaipa, Râmese râh chhôh liata, ama ryuto châta râh pie ta.

¹² Zawsi ta a paw nata a unawhzy nata a paw chhôhkha zydua cha, ama chhôhkha maluh hawhta nie awpa a pie lymâ ei.

Chakâh daihti liata Zawsi ryureina

¹³ Chakâh mozohpa vâta râh to liata nie awpa y khao leipa ta. Chakâhna vâta Izi râh nata Kâna râhzy chhao cha panao ha ta.

¹⁴ Zawsi ta sâh chaleina mâ châta ama vaw cheipa, Izi râh nata Kâna râh liata tâkâ a ypa zydua pahmaoh ta. Zawsi ta tâkâ cha Phiraoh hnohta a pangia lymâ.

¹⁵ Izi râh nata Kâna râh liata tâkâ zydua a chhâ nahta, Izi chyhsa zydua cha Zawsi hnohta a vy ei ta, “Nie awpa miah pie teh. Khazia na mohmô ta eima thi aw? Eima tâkâ a chhâ haw,” tah ei ta.

¹⁶ Zawsi ta ama hnohta, “Nama sahrohzy vaw cheih teh u. Tâkâ a chhâ ha khiahta cha, nama sahroh mâ châta sâh ei cha pie aw ei,” tah ta.

¹⁷ Chatanachata ama sahrohzy cha Zawsi lâ a chhi ei ta, Zawsi ta ama arâzy, mietaku zawzy, viahchao hrizy nata alâzy mâ châta âmo cha sâh pie lymâ ta. Cha kô liata, ama sahroh zydua mâ châta âmo cha sâh pie ta.

¹⁸ Cha kô châhdi ta, kô a vaw thieh heihpa liata, Zawsi lâ a vy heih ei ta, a hnohta, “Eima tâkâ zydua eima hmâh khai hanazie ei zibeipa phih aw ma pi. Sahroh zawzy chhao ei zibeipa eih a châ khai haw. Eima pôhpa nata eima râh dei leipa ta cha, ei zibeipa mohmô liata khâpa hmah y khao vei.

¹⁹ Khazia na mohmô liata keimo nata eima râh he eima thi aw? Keimo nata eima râh he sâh ta miah chalei teh. Keimo nata eima râh he Phiraoh chakaotuhpa ta eima y aw. Thi leipa ta eima hroh thei nawpa nata râh he roryhrapa ta a y lei nawpa ta, sâh chi miah pie mah y,” tah ei ta.

²⁰ Chatanachata Zawsi ta Izi râh zydua Phiraoh châta chalei ta. Chakâh mozoh a tlô thlupa vâ ei ta, Izi chyhsa zydua ta ama lyuzy zuah lymâ ei ta, râh cha Phiraoh eih a vaw châ khai haw.

²¹ Râhsawzy cha Izi râhri hiakha lâ chhâna nata hiakha lâ chhâna tawhta khihpizy lâta Zawsi ta a pasie lymâ ei.

²² Theihthaipazy râh deita chalei leipa a châ. A chhâpa cha, theihthaipazy cha Phiraoh tawhta lymâ a daopa châ ei ta, Phiraoh ta lymâ a piepa ei cha ama niepa vâta, ama râh zuah byuh vei.

²³ Zawsi ta zawpi hnohta, “Pachâ teh u, tanoh he nâmo nata nama râh Phiraoh châta cha chalei khai ha ei na ta. He liata nama châta sâh chi a y, alei liata cheih teh u.

²⁴ Sâh hria daihti liata, Phiraoh châta su pangawh su kha lymâ pie aw ei chi ta, su palih nâmo eih a châ aw. Cha cha lyu liata cheih heih awpa châta zy, nâmo nata nama chhôhkhazy nie awpa châta zy, nama hawtizy nie awpa châta zy a châ aw,” tah ta.

²⁵ Âmo ta, “Eima hrona miah pachha ha chi ta, ei zibeipa ngiachhiena miah patosa la, Phiraoh chakaotuhpazy eima châ aw,” tah ei ta.

²⁶ Phiraoh ta su pangawh liata su kha a hmô lymâ awpa kyh cha, Zawsi ta Izi râh ryhpa châta tao ta, cha cha tanoh taihta hmâpa châ ta, theihthaipazy râh deita Phiraoh râh lâta a lie leipa a châ.

Zakaw ryuhi bie hnôhchaipa

²⁷ Izarei cha Izi râh Kôse liata pahrâ ta. Cha liata ryuzy pachô ei ta, chi hluhpi pathlapa ta thata pôh ei ta.

²⁸ Zakaw cha Izi râh liata kô hrawh hlei sari y ta. Zakaw noh nata daihtizy, a hro chhôh kôzy cha, kô 147 a châ.

²⁹ Izarei cha a thi nawpa daihti â hnia nahta, a sawchapawpa Zawsi aw ta, a hnohta, “Na modypa ei châ khiahta cha, ngiachhiepa ta na ku kha ei byhpi ry liata vaw chahraoh la, ei chô liata nôphapa nata âdopa ta tao awpa ta bie nâ taih mah y. Izi râh liana he rie na pabu cheita khah y.

³⁰ Nâ pathlatuhpazy hnohta ei mô tita, Izi râh tawhna heta na phaoh la, nâ pathlatuhpazy pabuna su liata na pabu mah y,” tah ta. Zawsi ta, “Na reipa hawhta ei tao aw,” tah ta.

³¹ Izarei ta, “Bie nâ taih teh,” tah ta, Zawsi ta bie a taih ta. Cha khai tawhta Izarei cha a rakhô luh chô liata a bôh ta.