ÂTHAONA 45 - Mara Bible RV (BSI)

Zawsi ta a unawhzy â pahnosa

¹ Zawsi cha a kiapâh liata a duahpa zydua hmiakô liata â oh thei khao leipa ta, “Chyhsa zydua kei tawhta papua khai teh u,” tahpa ta awh ta. Zawsi ta a unawhzy â pahnosa nota, a kiapâh liata ahy hmah y veih ei.

² Zawsi cha aoh tlili ta cha ta. Izi chyhsazy ta a chapa pyu cha thei ei ta, Phiraoh chhôhkha chhao ta thei ei ta.

³ Zawsi ta a unawhzy hnohta, “Zawsi kha ei châ. Ei paw cha a hroh thlâh ha chy ma?” tah ta. Châhrasala a unawhzy ta a chhy thei veih ei. A hmiakô liata ama vaw y thlâh hapa cha ama nô a po ngaita.

⁴ Zawsi ta a unawhzy hnohta, “Ngiachhiepa ta nâ vaw hnia teh u,” tah ta. Amâ vaw hnia nahta, ama hnohta, “Nama unawhpa Zawsi, Izi râh lâ nama zua hapa kha ei châ.

⁵ He râh lâ eina zuapa vâ ei chi ta nama pachârôh leipa sala, nâmosasyh â hao hra khuh vy. Hrona pabohsa awpa ta, Khazohpa ta nama hmia lâta eina vaw tuapa a châ.

⁶ Kô no râh liata chakâhna tlô ha ta, kô pangawh a y thlâh ha chy. Cha daihti chhôh ta lei paliena nata sâh hriana rai y aw vei.

⁷ Nama châta chipathlazy alei chô liata cha pahlôhpa awpa nata pachhana rônahpa ta nama hronazy pabohsa awpa ta, Khazohpa ta nama hmia lâta eina vaw tuapa a châ.

⁸ He liata nâ vaw tuahtuhpa cha nâmo châ veih ei chi, Khazohpa a châ. Khazohpa ta Phiraoh châta paw ta na tao ta, a chhôhkha zydua châta zibeipa nata Izi râh zydua chô liata ryureituhpa ta eina tao.

⁹ Chavâta tahmâ a chatliepa ta ei paw lâ khy u la, a hnohta, ‘Na sawchapawpa Zawsi ta hetana heta a tah: Khazohpa ta Izi râh zydua chô liata ryureituhpa ta na tao ta, kei lâ a zu la, za hawh khah y.

¹⁰ Kôse râh liata y aw chi ta, na sawzy nata na samohzy, na mietaku zawzy, na viahchao hrizy nata na hneipa zydua chhaota ei kiapâh liata nama y aw.

¹¹ Cha liata kei ta ei cha chyh aw. Chataleipatala chakâh nawpa daihti kô pangawh y chy tlôh ta, nâ nata na chhôhkhazy nata na hneipa zydua rietheipa ta nama y pathlei aw na,’ kaw tah muh vy.

¹² Tahmâ nâmo mo nata ei unawhpa Benzami mo tlai ta, nama hnohta bie a reihpa he keima tlai ei châ tahpa nama hmô haw.

¹³ Izi râh liata ei rônahna zydua nata hmo nama hmôpa kyh zydua he ei paw kaw chho aw ei chi ta, ei paw cha a chatliepa ta he râh lâ he zâ chhi muh vy,” tah ta.

¹⁴ A unawhpa Benzami cha a pyhpa ta cha ta, Benzami chhao Zawsi cha a pyhpa ta cha hra ta.

¹⁵ A unawh zydua a pahnâ ta, cha thlu chyu ta. Cha khai tawhta a unawhzy ta Zawsi cha bie a chho ei ta.

¹⁶ Phiraoh o liata a ypazy ta, “Zawsi unawhzy ama za tlô” tahpa vaw thei ei ta. Cha thâtih chata Phiraoh nata a chakaotuhpazy palysa kaw ta.

¹⁷ Phiraoh ta Zawsi hnohta, “Na unawhzy cha hetana heta tao awpa ta chho mah y: ‘Nama alâzy sâh paphaosapa ta, Kâna râh lâ a lie u la,

¹⁸ nama paw nata nama chhôhkhazy a zâ chhi muh vy. Kei lâ a zu aw ei chi ta, Izi râh liata râh pha chaipa cha pie aw ei na ta, cha râh thaw cha nama nie aw.’

¹⁹ Hetana heta na chho pâ aw ei: ‘Nama hawti chyhpazy châta nata nama lapinôzy châta Izi râh tawhna heta talailihzy a chhi aw ei chi ta, nama paw cha a zâ chhi u la, a zu muh vy.

²⁰ Nama hmobaohzy kyh liata a tymâ khuh vy. Izi râh zydua liata hmo phapazy he nama eih a châ,’ na tah aw ei,” tah ta.

²¹ Cha hawhna chata Izarei sawzy ta tao ei ta. Phiraoh biepiepa hawhta, Zawsi ta âmo cha talailihzy pie ta, lâpi liata nie awpa chhao pie hra ta.

²² Ama zydua ta chysia a patly awpazy pie ta. Benzami chhochhi cha tâkâ sekel za thôh nata chysia a patly awpa zo pangawh a pie.

²³ A paw châta Izi râh liata hmo phapazy a phaoh awpa alâ tôhpa pô hrawh nata sâh, viahchhâ nata lâpi liata a paw nie awpa a phaoh awpa alâ panô pô hrawh paphao ta.

²⁴ A unawhzy cha pasiesa ta, ama hnohta, “Lâpi liata a hryuh khuh vy,” tah ta.

²⁵ Zawsi unawhzy cha Izi râh tawhta khy ei ta, Kâna râh liata ama paw Zakaw kô kaw tlô ei ta.

²⁶ A hnohta, “Zawsi kha hroh thlâh ha ta, Izi râh zydua chô liata ryureituhpa a châ,” tahpa ta chho ei ta. Zakaw cha a pahlaw ta, ama biereipa cha zo leipa ta.

²⁷ Châhrasala Zawsi ta ama hnohta bie a reipa zydua chho ei ta, a kia awpa talailihzy Zawsi ta a paphaopa a hmô nahta, ama paw Zakaw cha palôh thadâhpa ta y ha ta.

²⁸ Izarei ta, “Â daih na, ei sawchapawpa Zawsi cha a hroh thlâh ha na. Zu aw na ta, ei thi hlâta ano cha ei za hmô aw,” tah ta.