ÂTHAONA 42 - Mara Bible RV (BSI)

Zawsi unawhzy kâhsâ zyh awpa ta Izi râh lâ ama sie

¹ Zakaw cha Izi râh liata sâh a y tahpa a pahno nahta, a sawchapawzy hnohta, “Khazia namâ mo thlâh haw?” tah ta.

² “Pachâ teh u, Izi râh liata sâh a y tahpa ei thei. Cha lâ cha zu u la, cha liata eima châta sâh za chalei teh u. Chatanachata thi leipa aw pi ta, eima hroh aw,” tah ta.

³ Chatanachata Zawsi unawh pahrawhzy cha, sâh chalei awpa ta Izi râh lâ zu ei ta.

⁴ Zawsi pilâhpa Benzami deikua cha, Zakaw ta, “Hmo pha leipa â tyh pathlei aw na,” tah ta, a unawhzy hnohta pasiesa vei.

⁵ Kâna râh liata chakâhna a tlôpa vâta, Izarei sawchapawzy cha, sâh chalei awpa ta a siepazy hry liata sie hra ei ta.

⁶ Zawsi cha Izi râh ryureituhpa châ ta, cha râh liata chyhsa zydua hnohta sâh a zuahtuhpa a châ. Zawsi unawhzy cha za tlô ei ta, ama hmia alei lâ a bôhpa ta ano cha a naoh ei ta.

⁷ Zawsi ta a unawhzy a hmô nahta, âmo cha pahno thlâh ha ta, châhrasala hmia pahno leipa hawhta ama chô liata a tao ta, reih chahrâhpa ta âmo cha bie a chho ta. Ama hnohta, “Khataih tawhta a vypa ma nama châ?” tah ta. Âmo ta, “Sâh chalei awpa ta Kâna râh tawhta â zupa eima châ,” tah ei ta.

⁸ Zawsi ta a unawhzy cha pahno thlâh ha ta, âmo deikua ta ano cha pahno khao veih ei.

⁹ Zawsi ta âmo kyh liata mâ a sapazy kha a kaw thei heih ta, ama hnohta, “Mohparutuhpazy nama châ. Râh ruapa mo awpa ta namâ vy,” tah ta.

¹⁰ Âmo ta a hnohta, “Châ vei, ei zibeipa, châ chakaotuhpazy he sâh chalei awpa ta a vypa eima châ.

¹¹ Eima zydua heta chyhsa pakha saw châ pi ta, chyhsa dopa eima châ. Châ chakaotuhpazy he mohparutuhpazy châ ma pi,” tah ei ta.

¹² Ano ta ama hnohta, “Châ vei, râh ruapa mo awpa ta a vypa tlai nama châ,” tah ta.

¹³ Âmo ta, “Keimo, châ chakaotuhpazy pi he, unawh pahrawh hleino châ pi ta, Kâna râh liata a ypa chyhsa pakha saw eima châ. Eima seihnai chaipa cha tahmâ eima paw hnohta y ta, pakha deikua cha y khao vei,” tah ei ta.

¹⁴ Zawsi ta ama hnohta, “Nama hnohta ei reipa hawh tlai kha a châ, mohparutuhpazy nama châ.

¹⁵ Hetana heta pasiapa nama châ aw: Nama seihnai chaipa cha he lâ namâ zâ chhi vei khiahta cha, Phiraoh hrona reipa ta ei reih, he su tawhta pua aw veih ei chi.

¹⁶ Nâmo liata biedopa a y ma, y vei ma, nama bie pasia nawpa ta, he liata patâhpa ta nama y chhôh ta, nama hry liata pakha tuah u la, nama unawhpa cha kaw dy mawh sy. Cha hawhta nama tao vei khiahta cha, Phiraoh hrona reipa ta ei reih, mohparutuhpazy nama châ tlai, ei cha tah aw ei,” tah ta.

¹⁷ Ama zydua ta noh thôh patâh ta.

¹⁸ A noh thôhna noh liata, Zawsi ta ama hnohta, “Khazohpa chi tlôh na ta, chavâta hetana heta tao u la nama hroh aw:

¹⁹ Chyhsa dopa nama châ khiahta cha, nama unawh hry liata pakha namâ tâhna liana heta a tâh chy aw ta, ahropazy deikua cha sie aw ei chi ta, nama chhôhkhazy chakâhpa châta sâh cha phaoh aw ei chi ta,

²⁰ nama unawh seihnai chaipa cha kei lâ nama zâ chhi aw. Chatanachata nama bie cha pasiapa châ aw ta, thi aw veih ei chi,” tah ta. Cha hawhna chata tao ei ta.

²¹ Âmo nata âmo a chhohia ei ta, “Eima unawhpa chô liata eima hmotaopa vâta thailei eima châ ha tlai he zaw. Ngiachhie miah â haw ngâ nota a palôh nôpozie kha hmô thlâh ha pi ta, châhrasala eima nathlie khoh leipa kha. Chavâta he nôpona heta miah a tla thlu hih,” tah ei ta.

²² Rubena ta âmo cha a chhy ta, “Hawtipa chô liata hmo parao lei awpa ta cha chho veih ei na mâ? Nama nathlie khoh leipa kha. Chavâta a thisaih phuh lapa a châ ha tlai hih,” tah ta.

²³ Ama likah liata reih palietuhpa a ypa vâta, ama biereipa cha Zawsi ta a thei tahpa pahno leipa ei ta.

²⁴ Zawsi cha âmo tawhta pua ta, arulâta kei cha ta. Âmo lâ a vy heih ta, âmo cha bie a chho ta. Simeôna cha ama hry tawhta ânano ta a chhi ta, ama mohmô ta chahry ta.

Zawsi unawhzy Kâna râh lâ amâ lie

²⁵ Zawsi ta ama sykhaozy biena taih sâh ryhpa awpa nata ama tâkâzy ama sykhao liata khôpa khai awpa nata lâpi liata ama nie awpazy pie awpa ta biepie ta. Cha hawhna chata taopa ei ta.

²⁶ Ama sâh cha ama alâzy paphaosa ei ta, sie ha ei ta.

²⁷ Riebu liata ama hry liata pakha ta alâ lao pie awpa ta a sykhao pahy ta, a tâkâ kha a sykhao paka liata a vaw y thlâh hapa hmô ta.

²⁸ A unawhzy hnohta, “Ei tâkâ eina pakua ha ei, moh tua u, ei sykhao paka liata a y thlâh hih,” tah ta. Thata a pahlaw ei ta, a chalyupa ta a moh chyu ei ta, “Eima chô liata Khazohpa hmotaopa he khâpa ma a châ tly?” tah ei ta.

²⁹ Kâna râh liata ama paw Zakaw kô ama tlô nahta, ama chô liata hmo a tlôpa zydua cha chho ei ta, a hnohta

³⁰ “Râh ryureituhpa chyhsa ta reih chahrâh kawpa ta bie miah a chho ta, râh mohparutuhpa ta miah rao ta.

³¹ Keimo ta a hnohta, ‘Chyhsa dopa eima châ, mohparutuhpa châ cheita ma pi.

³² Unawh pahrawh hleino châ pi ta, eima paw sawchapawzy eima châ khai. Pakha deikua cha y khao vei, eima seihnai chaipa cha tahmâ Kâna râh liata eima paw hnohta a y,’ tah pi ta.

³³ Râh ryureituhpa chyhsa chata eima hnohta, ‘Hetana heta chyhsa dopa nama châ tahpa ei pahno aw: Nama unawh pakha ei hnohta siesai u la, nama chhôhkha chakâhpazy châta sâh phaoh u la, sie muh vy.

³⁴ Nama unawh seihnai chaipa cha kei lâ a zâ chhi aw ei chi ta, chatanachata mohparutuhpa châ leipa ei chi ta, chyhsa dopa tlai nama châ tahpa ei pahno aw. Chatawhcha nama unawhpa he cha pie heih aw ei na ta, he râh liata sôh zy nama palie aw,’ miah a tah,” tah ei ta.

³⁵ Ama sykhao liata sâhzy cha bô ei ta, ama tâkâ sô chyu cha ama sykhao liata vaw y thlâh ha ta. Tâkâ sôzy ama hmô nahta, âmo chhao, ama paw chhao, chi ngaita ei ta.

³⁶ Ama paw Zakaw ta ama hnohta, “Sawzy pahlei awpa ta eina tao lymâ ei chi he. Zawsi y khao leipa ta, Simeôna chhao y khao hra vei. Tahmâ Benzami taih chhao a chhi a chhuah heih ei chi ta, hmo pha leipa sai ta eina tla thlu lymâ,” tah ta.

³⁷ Rubena ta a paw hnohta, “Benzami he nâ lâ ei vaw liekhei heih leipa khiahta cha, ei sawchapaw panozy he thie lah vâ chi. Ano cha ei ku liata soh la, nâ lâ ei vaw liekhei heih aw,” tah ta.

³⁸ Châhrasala Zakaw ta, “Ei sawchapawpa he nama hnohta a zu aw vei, a unawhpa thi ha ta, ano deita he hroh ta, nama siena lâpi liata hmo pha leipa a zâ tyh pathlei khiahta cha, ei luh pawhpa he pachârôhpa ta Athihkhih lâ nama pasiesa aw,” tah ta.