ÂTHAONA 40 - Mara Bible RV (BSI)

Atâhpazy mâ sapa Zawsi ta a chhopasia

¹ Cha hmozy hnôhlâ ta, Izi bei nyu hlâtuhpa nata a viahchhâ taotuhpazy ta, ama bei, Izi bei cha a ru pachhô ei ta.

² Phiraoh cha a molaipa pano, nyu hlâtuhpazy hyutuhpa nata viahchhâ taotuhpazy hyutuhpa chô liata a hiehâh kaw ta.

³ Zawsi patâhna su, vaituhpazy hyutuhpa o liata patâhna o liata âmo cha patâh ta.

⁴ Vaituhpazy hyutuhpa ta Zawsi cha âmo vaih awpa ta biepie ta, Zawsi ta âmo cha vaih ta. Noh khazie tlyma a tâh ei ta.

⁵ Zâ kha cha, patâhna o liata patâhpa Izi bei nyu hlâtuhpa nata viahchhâ taotuhpa zy ta mâ sa chyu ei ta. Ama mâ chhopasiana deikua cha a lyu vei.

⁶ A mylâ my ta Zawsi cha âmo lâ a kei ngia ta, âmo cha moh ta, pachârôhpa ta ama ypa hmô ta.

⁷ Zawsi ta, “Khazia tanoh nama hmia dia a pachâ a rôh kaw?” tahpa ta a zibeipa o liata â tâlâhpa Phiraoh molaipazy cha hiahri ta.

⁸ Âmo ta a hnohta, “Mâ sa pi ta, miah a chhopasia theipa y veih ei,” tah ei ta. Zawsi ta ama hnohta, “Chhopasianazy cha Khazohpa eih châ vei mâ? Tahmâ nama mâzy cha na chho teh u,” tah ta.

⁹ Chatanachata nyu hlâtuhpazy hyutuhpa ta, a mâ cha Zawsi chho ta, a hnohta, “Ei mâ lâta ei hmiakô liata kre zôh vaw y ta.

¹⁰ Kre zôh liana cha a chiah miathôh y ta, a chhyh kaw thao ta, a paw thlai kaw pawh ta, a paw saozy ta kre hmohpazy vaw papua ta.

¹¹ Phiraoh nyu ei ku liata chaba na ta, kre theizy cha lyu na ta, Phiraoh nyu liata saoh na ta, nyu cha Phiraoh ku liata ei kei hlâ,” tah ta.

¹² Zawsi ta a hnohta, “He he a chhopasiana a châ: a chiah miathôh kha noh thôh a châ.

¹³ Tahmâ tawhta noh thôhna liata Phiraoh ta na luh cha chaluah aw ta, na raihria liata a cha padua heih aw. A nyu hlâtuhpa na châ tyhpa hawhna khata, Phiraoh nyu cha a ku liata na hlâ heih aw.

¹⁴ Phana na to tita, nâ thei thlâh ha la, ngiachhiepa ta ei chô liata phana palâsa la, Phiraoh hnohta ei thâtih reih la, he o tawhna heta rie na papua mah y.

¹⁵ Hebrai mo râh tawhta parupa ta a chhipa châ na ta, he râh liana chhao he patâhna o chhôh lia taihta khô awpa ta khâpa hmah parao va na,” tah ta.

¹⁶ Viahchhâ taotuhpazy hyutuhpa chhao ta, chhopasiana cha a pha tahpa a pahno nahta, Zawsi hnohta, “Kei chhao mâ ei hnei hra. Viahchhâ râhpa kachu miathôh ei luh liata khaih na ta,

¹⁷ kachu chôchaipa liata Phiraoh châta viahchhâ pakâh chiehpa chi to vaw y ta. Châhrasala viahchhâzy cha pavawzy ta ei luh liata kachu tawhta ama vaw nie ngâ kaw,” tah ta.

¹⁸ Zawsi ta a chhy ta, “He he a chhopasiana a châ: Kachu miathôh kha noh thôh a châ.

¹⁹ Tahmâ tawhta noh thôhna liata, Phiraoh ta na luh cha tai aw ta, na pôhpa tho liata a pangieh aw. Pavawzy ta na sapa ama nie aw,” tah ta.

²⁰ A noh thôhna noh, Phiraoh pi noh liata, Phiraoh ta a chakaotuhpa zydua châta kyhchhi tao ta. A chakaotuhpazy mohmô ta nyu hlâtuhpazy hyutuhpa nata viahchhâ taotuhpazy hyutuhpa cha ama luh chaluah ta.

²¹ Nyu hlâtuhpazy hyutuhpa cha, a raihria tyhpa liata padua heih ta, Phiraoh ku liata nyu hlâ heih ta.

²² Viahchhâ taotuhpazy hyutuhpa deikua cha, Zawsi ta ama mâ a chhopasiapa hawh tlai ta, a paaosao haw.

²³ Châhrasala nyu hlâtuhpazy hyutuhpa ta Zawsi cha a thei khao leipa ta, my ha ta.