ÂTHAONA 4 - Mara Bible RV (BSI)

Kainâ nata Abela

¹ Âdâh ta a lapinô Evâ a zialâh ta, Evâ cha saw phaoh ta, Kainâ sa ta, “Abeipa baona ta chapaw ei sa haw,” tah ta.

² Cha khai tawhta a unawhpa Abela sa ta. Abela cha Mietaku vaituhpa châ ta, Kainâ deikua cha leipalietuhpa a châ.

³ A noh hropa ta, Kainâ cha chhaohlei theilâpazy tawhta Abeipa lâta hmohlâpa cheih ta.

⁴ Abela chhao ta a sahroh a pataw tua chaipazy nata a thawzy hlâ hra ta. Abeipa cha Abela nata a hmohlâpa liata a ly ngaita ta,

⁵ Kainâ nata a hmohlâpa liata deikua cha a ly leipa ta. Chavâta Kainâ cha a pathi ia ngaita ta, a hmia chhie kaw ta.

⁶ Abeipa ta Kainâ hnohta, “Khazia na hie a hâh? Khazia na hmia a chhie?

⁷ Hmo dopa na tao khiahta cha, A pyhpa châ aw va chi ma? Hmo dopa na tao vei khiahta deikua cha, Moleina ta chhikao liata châ byh ta, Cha hnei awpa a khoh; Na pahnie awpa a châ,” tah ta.

⁸ Kainâ ta a unawhpa Abela hnohta, “Lyu lâ sie ei sih y,” tah ta. Lyu liata ama y nota, Kainâ ta a unawhpa Abela cha thyuhnao ta, thie ha ta.

⁹ Chatawhcha Abeipa ta Kainâ hnohta, “Na unawhpa Abela kha zaw?” tah ta. Kainâ ta, “Pahno va na. Ei unawhpa vaituhpa ma ei châ?” tah ta.

¹⁰ Abeipa ta a hnohta, “Khâpa hmo ma na tao haw? Na unawhpa thisaih ta chhaohlei tawhta eina kaw aw.

¹¹ Chavâta na unawhpa na thie nota, a thisaih palâ awpa ta a pakah a kaw âpa chhaohlei tawhta chhiesapa na châ haw.

¹² Lei na palie tita, alei ta kôvei cha pie khao aw vei. Alei chô liana heta leilôpa nata viavipa deita na châ aw,” tah ta.

¹³ Kainâ ta Abeipa hnohta, “Eina hriena chi he ei tao thei awpa hlâta â hri via.

¹⁴ Moh teh, tanoh he chhaohlei tawhta na papua ha chi ta, na mohmô tawhta nyupa ta y aw na ta, alei chô liana heta leilôpa nata viavipa châ aw na ta, nâ hmôpa maihta eina thie aw ei,” tah ta.

¹⁵ Abeipa ta a hnohta, “Châ bao va! Ahy rai Kainâ a thiepa cha a lie sari ta a chô liata phuh lapa a châ aw,” tah ta. Chatanachata a hmôpazy ta ama thie lei nawpa ta, Abeipa ta Kainâ chô liata ngiana tao ta.

¹⁶ Chatawhcha Kainâ cha Abeipa mohmô tawhta pua ta, Idâh nochhi lâta Nawdâ râh liata pahrâ ta.

Kainâ pathlazy

¹⁷ Kainâ ta a lapinô a zialâh ta, a lapinô cha saw phaoh ta, Enawka sa ta. Chatawhcha khihpi padua ta, a sawchapawpa moh pachyuhpa ta khihpi moh cha Enawka a bi.

¹⁸ Enawka ta sawchapaw Irâdâ sa ta, Irâdâ ta Mehuzelâ sa ta, Mehuzelâ ta Methuselâ sa ta, Methuselâ ta Lâmeka sa ta.

¹⁹ Lâmeka cha lapinô pano hnei ta, pakha moh cha Aidâ châ ta, ahropa moh cha Zilâ a châ.

²⁰ Aidâ ta Zabâ sa ta, ano cha sahrohzy pasapa ta poh o liata a pahrâpa sahlao pathlatuhpa a châ.

²¹ A unawhpa moh cha Zubâ châ ta, ano cha totâ nata ramo tôtuhpa sahlao zydua pathlatuhpa a châ.

²² Zilâ chhao sawchapawpa Tubâkainâ sa hra ta, ano cha dawh nata thua chhaichhi to a daihtuhpa a châ. Tubâkainâ sietanô cha Nâmâh a châ.

²³ Chatawhcha Lâmeka ta a lapinôzy hnohta, “Aidâ nata Zilâ y, Ei ao nathlie u la, Lâmeka lapinôzy saih u, Ei bie thei teh u! Hmah eina paphaopa vâta chyhsa pakha thie na ta, Thi eina padôhpa vâta satlia pakha ei thie haw.

²⁴ Kainâ phuh a lie sari ta lapa a châ khiahta cha, Lâmeka phuh cha a lie sysari nata ei sari ta lapa a châ aw,” tah ta.

Sethâ nata Enawsâ

²⁵ Âdâh ta a lapinô a zialâh heih ta, sawchapaw sa ta, a lapinô ta, “Kainâ ta a thie hapa Abela vyuhpa ta Khazohpa ta saw hropa eina pie haw,” tah ta, a moh Sethâ a bi.

²⁶ Sethâ ta sawchapaw sa ta, a moh Enawsâ a bi. Cha daihti tawhna chata chyhsazy ta Abeipa moh pado pathao ei ta.