ÂTHAONA 39 - Mara Bible RV (BSI)

Zawsi nata Pawtipha lapinô

¹ Zawsi cha Izi râh lâ zukhei ei ta, Phiraoh ry liata molaipa pakha, vaituhpazy hyutuhpa, Izi chyhsa Pawtipha ta cha râh lâta a zâ chhituhpa Ismela mo ku tawhta chalei ta.

² Abeipa cha Zawsi hnohta y ta. Vânoh thata to ta, a zibeipa Izi chyhsa o liata y ta.

³ Abeipa cha Zawsi hnohta y ta, a ku ta a taopa maih Abeipa ta hlao a patlohsa lymâpa a zibeipa ta hmô ta.

⁴ Zawsi cha a zibeipa modypa ta ypa ta, a zibeipa cha chakao lymâ ta. Pawtipha ta Zawsi cha a o liata hyutuhpa ta tao ta, a hneipa zydua chô liata biehneituhpa ta soh ta.

⁵ Pawtipha ta Zawsi cha a o liata nata a hneipa zydua chô liata biehneituhpa ta a so rakha tawhta, Zawsi vâta Abeipa ta Izi chyhsa chhôhkha cha byhnâ pie ta, o lâ nata râh lâta a hneipa zydua chô liata Abeipa ta byhnâ pie lymâ ta.

⁶ Chavâta a hneipa zydua Zawsi ku liata soh khai ta, Zawsi a ypa vâta pati a nie awpa tah leipa ta cha, Pawtipha ta khâpa hmah pachâ khao vei. Zawsi cha chyhsa pôraoh pha kawpa châ ta, a hmi chhao pha kaw ta.

⁷ A zibeipa lapinô ta Zawsi cha a mo tawpâ thlâh ha tyh ta, “Nâ ziakhei teh,” tah ta.

⁸ Châhrasala Zawsi ta khoh leipa ta, a zibeipa lapinô hnohta, “Pachâ teh, keima ei ypa vâta, he o liata hmo zydua he ei zibeipa ta pachâ khao vei. A hneipa zydua ei ku liata soh khai ta,

⁹ he o liata keima hlâta a lai viapa ahy hmah y veih ei. A lapinô na châpa vâta, nâma dei leipa ta cha, ei châta a pasai leipa khâpa hmah y vei. Chavâta kheihta ma, he moleina lai ngaitapa he taopa ta Khazohpa chô liata hmo ei parao thei aw?” tah ta.

¹⁰ Noh chareih ta Zawsi cha reipasao tyh ta, châhrasala ano a ziakhei awpa tlyma, a hnohta y awpa tlyma, Zawsi ta paryhsa beih vei.

¹¹ Noh kha cha a rai hria awpa ta Zawsi cha o chhôh lâ a kei ngia ta, o raihriatuhpazy ahy hmah o liata y leipa ei ta.

¹² A zibeipa lapinô ta Zawsi cha a viahkao pasipa ta patu ta, “Nâ ziakhei teh,” tah ta, Châhrasala Zawsi ta a viahkao pasipa cha a zibeipa lapinô ku liata siesai ta, a râ ta, pua ha ta.

¹³ A chysia cha a ku liata siesaipa ta, khôtho lâ â râ hapa a pahno nahta,

¹⁴ Pawtipha lapinô ta a o raihriatuhpazy aw ta, ama hnohta, “Moh teh u, eima noh miah pazao awpa ta Hebrai chyhsa miah â vaw chhipa hih. Nâ ziakhei a chhuahpa ta kei lâ a vaw ngia ta, châhrasala ao paro ngaitapa ta awh na ta,

¹⁵ ao paropa ta ei awhpa a theipa nahta, ei kiapâh liata a viahkao pasipa he siesai ta, a râ ta, khôtho lâ a pua haw,” tah ta.

¹⁶ A zibeipa â vaw di hlâlei cha, Zawsi viahkao pasipa cha ano kiapâh liata soh ta.

¹⁷ Pawtipha hnohta a rei hmopa pyly reih heih ta, “Hebrai sei eima o lâ nâ vaw chhipa khata, ei noh na pazao awpa ta kei lâ a vaw ngia ta,

¹⁸ ao paropa ta ei awhpa nahta, ei kiapâh liata a viahkao pasipa he siesai ta, khôtho lâ â râ haw,” tah ta.

¹⁹ Zawsi zibeipa cha a lapinô ta a hnohta, “Na sei ta cha hawhta eina tao,” a tahpa a thei nahta, a hiehâh ngaita ta.

²⁰ Chatanachata Zawsi zibeipa ta Zawsi cha a chhi ta, abei ta a patâhpazy ânano ta sona patâhna o liata khô ta. Chatanachata Zawsi cha patâhna o liata a tâh ha ta.

²¹ Châhrasala Abeipa cha Zawsi hnohta y ta, a ngiachhiena patosa ta, patâhna o vaituhpa modypa ta tao ta.

²² Patâhna o vaituhpa ta, patâhna o liata a tâhpa zydua vaih awpa ta, Zawsi ku liata biehneina pie ta. Ama taopa maih liata, a maophaohna a chabatuhpa a châ lymâ.

²³ Abeipa cha Zawsi hnohta y ta, a hmotaopa maih liata Abeipa ta hlaotlohna a pie lymâpa vâta, Zawsi ku liata maophaohna piepazy cha, patâhna o vaituhpa ta mokhei khao vei.