ÂTHAONA 37 - Mara Bible RV (BSI)

Zawsi nata a unawhzy

¹ Zakaw cha a paw khichhai châna râh, Kâna râh liata pahrâ ta.

² Hezy he Zakaw pathlazy ama châ. Zawsi cha kô hrawh hleisari uhtheipa dei a châ chypa vâta, a paw lapinô Bilhâ nata Zilpâ sawchapawzy chhaota sahroh zaw lao pabâsa tyh ta. Zawsi ta ama hmotao pha leipa kyh ama paw hnohta tlôkhei tyh ta.

³ Izarei ta Zawsi cha a pawpi tawhta a sapa a sawchapaw a châpa vâta, a sawchapaw hropa zydua hlâta a kyh pachâ via ta, viahkao pasipa cheichapaipa taopa ta.

⁴ Ama paw ta ano cha a unawh zydua hlâta kyh a pachâ via tahpa a unawhzy ta ama pahno nahta, ano cha a hao kaw ei ta, reikah phapa rai hlâ khoh leipa ei ta.

⁵ Zâ kha cha Zawsi ta mâ sa ta, cha cha a unawhzy a chho nahta, ano cha a hao via rili ei ta.

⁶ Zawsi ta ama hnohta, “Ngiachhiepa ta ei mâ sapa he nathlie tua u.

⁷ Lyu liata sapiahzy chahry pi ta, keima sapiah tlai cha kaw thyu ta, a kaw duah ta, nâmo sapiahzy ta vaw chadô ei ta, a bôh ei ta, keima sapiah cha amâ naoh ngâ kaw,” tah ta.

⁸ A unawhzy ta a hnohta, “Nâ bao hra heta eima chô liata ryu na reih aw mâ? Nâ bao hra heta eima chô liata bie na hnei aw ma?” tah ei ta. A mâsapazy nata a biereipazy vâta ano cha a hao via rili ei ta.

⁹ Cha khai tawhta mâ hropa sa heih ta, a unawhzy chho ta, “Pachâ tua u, mâ sa heih na ta, noh, thlâpâ nata awhsi miahrawh hleikhazy ta a bôhpa ta einâ naoh ei,” tah ta.

¹⁰ A mâsapa cha a paw nata a unawhzy a chho nahta, a paw ta ano cha ra ta, a hnohta, “Na mâsapa cha khâpa mâ ma a châ tly? Kei nata na nô nata na unawhzy heta a bôhpa ta eimâ châ naoh tlai aw mâ?” tah ta.

¹¹ A unawhzy ta a chô liata ama hiatlia kaw ta, a paw deikua ta, cha hmozy cha a palôh liata a vao thlâh ha ta.

Zawsi Izi râh lâ zuapa a châ

¹² Noh kha cha Zawsi unawhzy ta ama paw sahroh zaw lao pabâsa awpa ta Sekhe lâ sie ei ta.

¹³ Izarei ta Zawsi hnohta, “Na unawhzy Sekhe liata sahroh zaw lao ama pabâsa hai no châ vei ma? A vy teh, âmo lâ ei cha tuah aw,” tah ta. Zawsi ta a hnohta, “He liata ei y,” tah ta.

¹⁴ Izarei ta a hnohta, “Tahmâ he sie la, na unawhzy a phapa ta ama y ma, sahrohzy ama pha ma tahpa kei moh la, na vaw chho heih mah y,” tah ta. Izarei ta Zawsi cha Hebraw saikao tawhta pasiesa ta, Sekhe cha kei tlô ta.

¹⁵ Râh liata â khie ngâpa chyhsa pakha ta vaw hmô ta, cha chyhsa chata a hnohta “Khâpa na tlua?” tah ta.

¹⁶ Zawsi ta, “Ei unawhzy ei tlua ei, ngiachhiepa ta sahroh zaw lao ama pabâsana na chho teh,” tah ta.

¹⁷ Cha chyhsa chata, “He tawhna heta ama sie haw, ‘Dôthâ lâ sie ei suh u,’ ama tahpa ei thei,” tah ta. Zawsi ta a unawhzy cha a chadai ta, Dôthâ liata âmo cha kei hmô ta.

¹⁸ A unawhzy ta Zawsi cha lâhlapi tawhta vaw hmô ei ta, ama kô chhao a tlô hlâta, thie awpa ta arulâta a paraoh chhielie ei ta.

¹⁹ Âmo nata âmo a chhohia ei ta, “Moh tua u, mâ a sapa â vy huh.

²⁰ A vy teh u, thie sih la, khaohtlô miakha liata pathla ei suh u. Sahrâhpa na a sie haw tah aw pi ta, a mâzy cha kheihta ma a châ aw tahpa eima moh tua rai aw,” tah ei ta.

²¹ Rubena ta ama biereipa cha a thei nahta, “A thie ngâsâ cha thie khah ei suh u,” tah ta, ama ku tawhta pachha a chhuah ta.

²² Rubena ta ama hnohta, “Thisaih palo khah u. Râhchawhpa liata khaohtlô liana heta pathla u la, ku deikua la a chô liata pathla khah u,” tah ta. Zawsi cha ama ku tawhta pachha ta, a paw o lâ â chhi thei nawpa ta, cha bie cha a reipa a châ.

²³ Zawsi cha a unawhzy kô a kei tlô nahta, a viahkao pasipa, a viahkao pasipa cheichapaipa â kypa cha pahluhpa ei ta.

²⁴ A chhi ei ta, khaohtlô liata pathla ei ta. Khaohtlô cha aruapa, a chhôh liata ti a y leipa a châ.

²⁵ Pati nie awpa ta a tyuh ei ta. Mohmia pasaih ei ta, Kilia tawhta â vypa Ismela mo râraoseihpazy hmô ei ta. Ama râraoseihpazy cha Izi râh lâ zua awpa iaôzy, thohna hniapazy nata ropahâhpazy a phaohpa ama châ.

²⁶ Zudâh ta a unawhzy hnohta, “Eima unawhpa he thie sih la, a thisaih eima nyupa chata khâpa athôhna ma eima hmô aw?

²⁷ A vy teh u, Ismela mo hnoh hao ta tlao zuah ei suh u. Ano cha eima unawhpa, eima sapa nata thisaih châ tlôh ta, chavâta a chô liata eima ku pathla khah ei suh u,” tah ta. A unawhzy ta a biereipa cha pha tah ei ta.

²⁸ Midia mo sôhpaliepazy ta âmo cha vaw chapia ei ta, Zawsi cha khaohtlô tawhta thaoh ei ta, Ismela mo hnohta tâkâ sekel tlaw kih ta zuah ei ta. Ismela mo ta Zawsi cha Izi râh lâ a chhi ha ei ta.

²⁹ Rubena cha khaohtlô lâ vawh heih ta, Zawsi cha khaohtlô liata y khao vei tahpa a hmô nahta, a chysiazy hrie ta,

³⁰ a unawhzy lâ vawh ta, “Hawtipa kha y khao vei, kei he khataih lâ ei sie aw?” tah ta.

³¹ Zawsi viahkao pasipa cha la ei ta, mietaw thie ei ta, a thisaih liata viahkao pasipa cha ny ei ta.

³² Viahkao pasipa cheichapaipa cha phaoh ei ta, ama paw lâ tlôkhei ei ta, a hnohta, “He he hmô pi ta, na sawchapawpa viahkao pasipa a châ ma, moh tua,” tah ei ta.

³³ Zakaw ta viahkao pasipa cha moh ta, “Ei sawchapawpa viahkao pasipa tlai a châ. Sahrâhpa ta a sie ha hih. Zawsi cha hriechheih khaipa ta a y ha tlai he zaw,” tah ta.

³⁴ Zakaw cha a chysiazy hrie ta, latho poh a sai ta, noh hluhpi a sawchapawpa mâchhie sa ta.

³⁵ A sawchapaw nata a sawchanô zydua ta ano thlapalôh awpa ta thyu ei ta. Châhrasala Zakaw ta ama thlapalôhna cha a pyh khoh leipa ta, “Châ vei, mâchhiesana chôta ei sawchapawpa hnohta Athihkhih lâ ei sie aw,” tah ta. Chatanachata a paw cha ano a ngiahpa ta cha tyh ta.

³⁶ Cha nota, Midia mo ta Zawsi cha Izi râh lâ a ngiakhei ei ta, Phiraoh ry liata molaipa pakha, vaituhpa py hyutuhpa Pawtipha hnohta zuah ei ta.