ÂTHAONA 35 - Mara Bible RV (BSI)

Khazohpa ta Bethel liata Zakaw byhnâ a awpa

¹ Khazohpa ta Zakaw hnohta, “Thyu la, Bethel lâ khy la, cha liata pahrâ la, na unawhpa Esaw tawhta nâ râ nota na hnohta a vaw luahpa Khazohpa châta, cha liata maisâh tao mah y,” tah ta.

² Chatawhcha Zakaw ta a chhôhkha nata a hnohta a ypa zydua hnohta, “Nama hry liata râh hropa khazohzy kha thy khai u la, a pathai u la, nama chysia a patly teh u.

³ Thyu sih la, Khazohpa o lâ khy ei suh u. Ei nôpo nota nâ chhy ta, ei siena liata ei hnohta a y lymâpa Khazohpa châta maisâh ei tao aw,” tah ta.

⁴ Chatanachata râh hropa khazoh ama ku liata a ypa zydua nata ama nah liata rahy amâ bapa zydua cha Zakaw pie ei ta, Zakaw ta Sekhe kiapâh ôkâ tho ry liata pabu ta.

⁵ Chatawhcha sie ei ta, Khazohpa chichhihna ta ama chheipâh khihzy cha bie khai ha ta, Zakaw sawchapawzy cha a chadai veih ei.

⁶ Zakaw cha ano nata a hnohta a ypa zydua chhaota Kâna râh liata Luzi khih tlô ta. Luzi cha Bethel a châ.

⁷ Cha liata maisâh tao ta, a unawhpa tawhta â râ nota Khazohpa a hnohta â luahna su a châpa vâta, a moh ta Elbethel a bi.

⁸ Chatawhcha Rebekâ mohôhtuhpa Debawrâ cha thi ta, Bethel mathi liata ôkâ tho ry liata pabu ei ta, chavâta a moh Alawbakhuh bipa a châ.

⁹ Zakaw cha Pâdâ-Aramia tawhta â vy nahta, Khazohpa ta a hnohta a vaw luah heih ta, byhnâ awpa ta.

¹⁰ Khazohpa ta Zakaw hnohta, “Na moh Zakaw châ ta, Châhrasala na moh Zakaw cha tah khao aw veih ei; Na moh cha Izarei a châ bâ aw,” tah ta. Chatanachata Khazohpa ta Zakaw cha Izarei tahpa ta a moh a bi.

¹¹ Chatawhcha Khazohpa ta Zakaw hnohta, “Kei he Khazohpa Atotaotheipa châ na ta, Chi hluhpi pathlapa ta pôh mah y. Phopi nata phopi a pazaopakhypazy Nâma tawhta vaw pua aw ei ta, Na chhôh tawhta beizy ama pua aw.

¹² Abarahâ nata Aisika hnohta râh ei piepa kha, Nâ cha pie na ta; Na pathla a vaw y lymâ awpazy hnohta chhao, Râh cha ei pie aw ei,” tah ta.

¹³ Cha khai tawhta, Khazohpa ta Zakaw cha, bie â chhona su tawhta a siesai haw.

¹⁴ Zakaw ta Khazohpa ta bie â chhona su liata alô bô ta, a chô liata dopa hlâna bao ta, sathaw chhao a chô liata bao hra ta.

¹⁵ Khazohpa ta bie â chhona su moh cha, Zakaw ta Bethel a bi.

Râkheli thina

¹⁶ Bethel tawhta sie ei ta, Epharâ khih ama tlô nawpa â hla kaw chyna su liata Râkheli cha saw a zeih ta, a nawh pi ru ngaita ta.

¹⁷ Riethei ngaitapa ta saw â zeih hai nota, nawh paytuhpa ta a hnohta, “Chi khah y, sawchapaw hropa na hnei,” tah ta.

¹⁸ Chatawhcha Râkheli cha thi ha ta, a thlahpa a pathlie hai nota, a moh Benôni tahpa ta kaw reih ta, châhrasala a paw ta Benzami tahpa ta a moh a bi.

¹⁹ Râkheli cha thi ta, Epharâ lâpi liata ama pabu. Epharâ cha Bethlehe a châ.

²⁰ A thlâ chô liata Zakaw ta alô bô ta, cha cha Râkheli thlâ lôbô tahpa ta pahnopa a châ. Tanoh taihta cha liata a y.

²¹ Izarei cha sie lymâ ta, Ederâ osâhpa khô liata poh o rai ta.

Zakaw pathlazy

²² Cha râh liata Izarei a y nota, Rubena cha vawh ta, a paw nôtho Bilhâ a ziakhei ta. Izarei ta cha cha pahno ha ta. Zakaw cha sawchapaw pahrawh hleino hnei ta.

²³ Liah sawchapawzy cha Zakaw sawchapaw uhtheipa Rubena, Simeôna, Livai, Zudâh, Iskâra nata Zebulawna zy ama châ.

²⁴ Râkheli sawchapawzy cha Zawsi nata Benzami ama châ.

²⁵ Râkheli seichanô Bilhâ sawchapawzy cha Dânâ nata Nâthalai châ ei ta,

²⁶ Liah seichanô Zilpâ sawchapawzy cha Kâdâ nata Asera zy ama châ. Âmo cha Zakaw ta Pâdâ-Aramia liata a sapa a sawchapawzy ama châ.

Aisika thina

²⁷ Zakaw cha Kiriathâbâ kiapâh Mamre khih liata a ypa a paw Aisika kô kei tlô ta. Cha khih cha Hebraw tahpa châ hra ta, Abarahâ nata Aisika zy pahrâna khih a châ.

²⁸ Aisika cha kô 180 hroh ta.

²⁹ Aisika cha a thlahpa pathlie ta, machâpa a chhâ palopa ta thi ta, a chiheihzy hnohta pahlyhpa ta y ta. A sawchapawpa Esaw nata Zakaw ta ama pabu.