ÂTHAONA 34 - Mara Bible RV (BSI)

Dinâ papuapaleina vâta viarithôna

¹ Noh kha cha, Liah ta Zakaw châta a sapa a sawchanô Dinâ cha, cha râh laihsazy charei awpa ta pua ta.

² Cha râh bei Hivi chyhsa Hamô sawchapawpa Sekhe ta vaw hmô ta, patu ta, a ziakhei ta, a noh pazao ha ta.

³ Sekhe palôh cha Zakaw sawchanô Dinâ liata khâchâ y ta. Laihsa cha kyhpachâ kaw ta, reikah phapa ta bie a chho ta.

⁴ Sekhe ta a paw Hamô hnohta, “He laihsa he lapinô châta na hiapa mah y,” tah ta.

⁵ Zakaw ta a sawchanô Dinâ Sekhe ta a papuapaleipa thâtih cha thei ta. A sawchapawzy cha a sahroh zaw chhaota râh liata ama y chhôh châ ta, ama vaw tlô hlâlei Zakaw cha a thlih thlâh ha ta.

⁶ Sekhe paw Hamô ta Zakaw lâ lyuh kei châ ta.

⁷ Thâtih ama pahnopa nahta, Zakaw sawchapawzy cha râh lâ tawhta vaw tlô ei ta. Sekhe ta Zakaw sawchanô a ziakhei ta, Izarei sahlao chô liata hmo molei ngaitapa, hmo tao chachei lei awpa a taopa vâta, ama palôh pasapa ta, ama hiehâh ngaita ta.

⁸ Hamô ta ama hnohta, “Ei sawchapawpa Sekhe palôh cha, nama sawchanô chô liata khâchâ y ha ta, ngiachhiepa ta lapinô ta pahneisa teh u.

⁹ A hnei pahlao ei suh u. Nama sawchanôzy miah pie u la, eima sawchanôzy hnei teh u.

¹⁰ Eima hnohta pahrâ aw ei chi ta, nâmo châta râh he pahypa a châ. He râh liata pahrâ u la, sôh zy palie u la, râh he ryuto châta hnei teh u,” tah ta.

¹¹ Sekhe chhao ta laihsa paw nata a rilâhpazy hnohta, “Na ngiachhie teh u, ei hnohta nama reipa maih ei cha pie aw ei.

¹² Mâ nata chhao nata hmosaipa cha, khazie rai haw u la, nama reipa hawhta ei cha pie aw ei. Khâpa rai châ sala, laihsa he lapinô ta na pahneisa teh u,” tah ta.

¹³ Sekhe ta ama sietanô Dinâ a papuapaleipa vâta, Zakaw sawchapawzy ta Sekhe nata a paw Hamô cha dôveipa ta a chhy ei ta.

¹⁴ Ama hnohta, “Paryhsa thei ma pi. Chopawtaileipa chyhsa lâ eima sietanô soh thei ma pi. Cha hawhta taopa cha keimo châta nohzaona a châ aw.

¹⁵ He hawhta bie namâ taih khiah deikua cha, nama bie hawhta eima châ ryh thei aw. Keimo hawhpa nama châ thei hra nawpa ta, nama hry liata chapaw zydua chopaw namâ tai khai awpa a châ.

¹⁶ Chatanachata eima sawchanôzy cha pie aw pi ta, keimo chhao ta nama sawchanôzy hnei hra aw pi ta, nama hnohta y aw pi ta, chi khapa eima châ ha aw.

¹⁷ Chopawtaina kyh liata eima bie nama zyh leipa khiahta deikua cha, eima sawchanô he a chhi aw pi ta, eima sie syulyu ha aw,” tah ei ta.

¹⁸ Ama biezy chata Hamô nata Hamô sawchapawpa Sekhe cha palysa ta.

¹⁹ Sekhe cha Zakaw sawchanô chô liata a palôh a tlâh ngaitapa vâta, cha hmo cha pahawh pasâh leipa ta thlai ta tao awpa khoh ta. Sekhe cha a paw o liata a ypa zydua hry liata palyupalih chaipa a châ.

²⁰ Chatanachata Hamô nata a sawchapawpa Sekhe cha, ama khih thokhy chhikao lâ a vy ei ta, ama khihsawzy bie reikhei ei ta, ama hnohta,

²¹ “He chyhsazy he miah a dyh kaw ei ta, chavâta râh liana he pahrâ ei sala, sôh zy palie mawh ei sy. Pachâ teh u, âmo châta chhao râh he â daih thlâh haw. Ama sawchanôzy lapinô ta hnei sih la, eima sawchanôzy pahneisa hra ei suh u.

²² Châhrasala he hawhta eima tao khiah deita ta eima hnohta pahrâ aw ei ta, chi khapa eima vaw châ aw. Âmo cha chopawtaipa ama châpa hawhta, keimo chhao chapaw zydua chopaw eimâ tai khai awpa a byuh.

²³ Ama sahrohzy, ama sôhzy nata ama sa zydua keimo eih ama vaw châ khai nawpa mah a châ tâh. Chavâta amâ hnawpa hawhta paryhsa sih la, chatanachata eima hnohta ama pahrâ aw,” tah ei ta.

²⁴ Khihpi thokhy chhikao liata a hmaohpa zydua ta Hamô nata a sawchapawpa Sekhe bie cha paryhsa ei ta. Khihpi thokhy chhikao liata a hmaohpa chapaw zydua cha ama chopaw tai khaipa a châ.

²⁵ A noh thôhna noh liata, ama pasa locho nota, Zakaw sawchapaw pano, Dinâ rilâhpa Simeôna nata Livai cha, ama zaozi chyu a chabapa ta arulâta khihpi a dyuh ei ta, chapaw zydua ama thie khai haw.

²⁶ Hamô nata a sawchapawpa Sekhe chhao zaozi tiahpa ta thie ei ta, Dinâ cha Sekhe o tawhta puakhei ei ta, amâ chhi haw.

²⁷ Zakaw sawchapawzy cha ama thiepazy lâ vawh ei ta, ama sietanô ama papuapaleipa vâta, khihpi cha hrao ei ta.

²⁸ Ama mietaku zawzy, ama viahchao hrizy, ama alâzy, ama khih liata hmo a ypa nata ama lyu liata hmo a ypa zydua la khai ei ta.

²⁹ Ama sôh nata thih zydua, ama saw hawtipa zydua nata ama lapinô zydua, o liata a ypa zydua patu ei ta, ama hrao khai haw.

³⁰ Zakaw ta Simeôna nata Livai hnohta, “Nâmo vâta rairuna ei tyh ha hih. Râh liata a pahrâpa, Kâna mo nata Perizi mo hmia liata ei roh nama pachhie haw. Kei cha chyhsa chyhta dei ei hnei hih. A awpakhy ei sala, einâ dyuh khiah ei ta cha, kei nata ei o liata a ypa zydua pahleipadiapa eima châ aw,” tah ta.

³¹ Âmo ta, “Eima sietanô he âzuahnô hawhta a tao awpa a châ rai ma?” tah ei ta.