ÂTHAONA 33 - Mara Bible RV (BSI)

Zakaw nata Esaw amâ paryh

¹ Zakaw cha mohmia pasaih ta, Esaw cha chyhsa za palih chhaota â vypa hmô ta. A sawzy cha Liah, Râkheli nata seichanô panozy hnohta rai ta.

² Seichanôzy nata ama sawzy hmia pasah ta, Liah nata a sawzy ta pazi ei ta, Râkheli nata Zawsi cha a hnôh chai ta pasiesa ta.

³ Ano cha ama hmia lâta sie ta, a uhta kiapâh a tlôna taihta ei sari tlai alei lâ a bôhpa ta a naoh ta.

⁴ Esaw cha Zakaw a tyh awpa ta a râ ta, a pyh ta, a ku ta rao liata a pyh ta, a pahnâ ta, ama pano ta cha ei ta.

⁵ Esaw cha kaw ua ta, chanôzy nata hawtizy hmô ta, “Na hnohta a ypazy he ahyzy ma ama châ?” tah ta. Zakaw ta, “Khazohpa ta a ngiachhiena vâta châ chakaotuhpa hnohta a piepa hawtizy ama châ,” tah ta.

⁶ Seichanôzy nata ama sawzy a vaw hnia ei ta, a bôhpa ta a naoh ei ta.

⁷ Cha hawhna chata Liah nata a sawzy a vaw hnia ei ta, a bôhpa ta a naoh ei ta. A chhâna ta Zawsi nata Râkheli a vaw hnia ei ta, a bôhpa ta a naoh hra ei ta.

⁸ Esaw ta, “Sahroh hri ei vaw tyhpa zydua kha, khâpa ma a yzie?” tah ta. Zakaw ta, “Ei zibeipa hmiakô liata ngiachhiena ei hmô thei nawpa ta ei taopa a châ,” tah ta.

⁹ Esaw ta, “Ei nawhta y, kei chhao a hluhpi ei hnei. Na hneipa zydua nâma eih châ khai mawh sy,” tah ta.

¹⁰ Zakaw ta, “Châ vei, na ngiachhiena ei hmô khiahta la, ngiachhiepa ta ei kuhriazy he ei ku tawhta nâ hlâ mah y. Na hmia ei vaw hmô thlâhpa cha, Khazohpa hmia a hmôpa hawhta châ na ta, nâ chhao ta nâ pyh chi ta.

¹¹ Byhnâ ei topa na hnohta ama vaw cheipazy kha, ngiachhiepa ta a pyh mah y. Khazohpa ta na ngiachhie ta, ei hneina ta â daihpa vâta kuhria ei cha piepa a châ,” tah ta. Thata â hawpa vâta a la ha ta.

¹² Esaw ta, “Sie ei suh u, kei hmia ei sah aw,” tah ta.

¹³ Zakaw ta a hnohta, “Hawtizy panyu kaw chy ei ta, mietaku zaw nata viahchao hri ama taw sâhpi a pazy haipazy he ei mohôh awpa ei a byuhzie ei zibeipa ta na pahno. Noh kha chhao ama rie eima patheisa tu khiahta cha, sahroh zydua ama thi khai aw.

¹⁴ Chavâta ei zibeipa y, ngiachhiepa ta, nâ cha châ chakaotuhpa hmia lâta sie mah y. Kei deikua cha ei hmia lâta sahroh a siepazy ama sie theina rakha lymâ hawhta nata hawtizy sie theina rakha lymâ hawhta, ei zibeipa yna Seirâ ei vaw tlôna taihta dusawta ta ei vaw sie aw,” tah ta.

¹⁵ Esaw ta, “Cha khiahta la, ei hnohta a ypa chyhsa thokha he ei cha siesaipa sy,” tah ta. Zakaw ta, “A byuh hlei aw ma? Ei zibeipa ngiachhiena tlao na patosa hri mah y,” tah ta.

¹⁶ Esaw cha, cha noh lilaw ta Seirâ lâ pangaipa ta a lie ha ta.

¹⁷ Zakaw deikua cha Sukô lâta sie ta, ano châta o sa ta, a sahrohzy châta byureihzy tu ta. Chavâta cha su cha a moh Sukô bipa a châ.

¹⁸ Zakaw cha Pâdâ Aramia tawhta Kâna râh liata Sekhe khihpi cha â bohpa ta tlô ta, khihpi tlô hlâta liata poh o rai ta.

¹⁹ A poh o raina su cha, Sekhe paw, Hamô pathlazy tawhta tâkâ za kha ta a chaleipa a châ.

²⁰ Cha liata maisâh padua ta, a moh El-Elôhe-Izarei a bi.