ÂTHAONA 30 - Mara Bible RV (BSI)

¹ Râkheli ta Zakaw châta saw a sapa leipa â pahno nahta, a narônô cha uahva kaw ta. Zakaw hnohta, “Saw na pie teh, chataleipatala ei thi aw,” tah ta.

² Zakaw cha Râkheli chô liata a hiehâh kaw ta, “Kei he chhi thei châ pakhâpatuhpa Khazohpa duahmo liata a duahpa ma ei châ?” tah ta.

³ Râkheli ta, “Ei seichanô Bilhâ he a zialâh teh. Chatanachata saw na sapa aw ta, ano hmâpa ta chhôhkha ei padua thei aw,” tah ta.

⁴ Chatanachata a seichanô Bilhâ cha, a lapinô châta pie ta, Zakaw ta ano cha a zialâh ta.

⁵ Bilhâ cha saw phaoh ta, Zakaw châta sawchapaw sapa ta.

⁶ Râkheli ta, “Khazohpa ta na pachia ta, ei ao thei hra ta, sawchapaw eina pie haw,” tah ta, a moh Dânâ a bi.

⁷ Râkheli seichanô Bilhâ cha saw phaoh heih ta, Zakaw châta sawchapaw panona sapa ta.

⁸ Râkheli ta, “Thatlôpa châhpia a piapa hawhta ei narônô a pia na ta, ei pahnie haw,” tah ta, a moh Nâthalai a bi.

⁹ Liah ta a sawsa a chhâ hapa a pahno nahta, a seichanô Zilpâ a chhi ta, Zakaw hnohta a lapinô châta pie ta.

¹⁰ Liah seichanô Zilpâ ta Zakaw cha sawchapaw sapa ta.

¹¹ Liah ta, “Vâpha â chhih kaw dia,” tah ta, a moh Kâdâ bi ta.

¹² Liah seichanônô Zilpâ ta Zakaw châta sawchapaw panona sa heih ta.

¹³ Liah ta, “Ei ly kaw dia! Chanôzy ta nohlao eina tah aw ei,” tah ta, a moh Asera a bi.

¹⁴ Chatawhcha sâh hria daihti liata, Rubena ta lyu liata khoiah hmô ta, a nô Liah châta vaw phaoh ta. Râkheli ta Liah hnohta, “Ngiachhiepa ta na sawchapawpa khoiah hmôpa kha na pie hra teh,” tah ta.

¹⁵ Châhrasala Liah ta a hnohta, “Ei vahpa eina chhupa chi a daih vei ma? Ei sawchapawpa khoiah chhao taih na chhu awpa ma nâ chhuah?” tah ta. Râkheli ta, “Cha khiahta la, na sawchapawpa khoiah vyuhpa ta tazâ châ zialâh lah vâ,” tah ta.

¹⁶ Zâlâ ta Zakaw cha lyu tawhta vaw tlô ta, Liah cha dy awpa ta pua ta, “Einâ zialâh awpa chi a châ, ei sawchapawpa khoiah ta ei cha chalei haw,” tah ta. Cha zâ cha a zialâh ta.

¹⁷ Khazohpa ta Liah thlahchhâna cha thei ta, saw phaoh ta, Zakaw châta sawchapaw papangawhna sapa ta.

¹⁸ Liah ta, “Ei vahpa hnohta ei seichanô ei piepa vâta, Khazohpa ta ei tovyuh eina pie hri hih,” tah ta, a moh Iskâra a bi.

¹⁹ Liah cha saw phaoh heih ta, Zakaw châta sawchapawpa pacharuna sapa ta.

²⁰ Liah ta, “Khazohpa ta hmosai sôhpa na pie ta, ei vahpa châta sawchapaw pacharu ei sapa haw, tahmâ cha ei hnohta a pahrâ bâ aw,” tah ta, a moh Zebulawna a bi.

²¹ Cha hnôhlâ ta sawchanô sa ta, a moh Dinâ a bi.

²² Khazohpa ta Râkheli cha a thei thlâh ha ta. Khazohpa ta a thlahchhâna thei ta, a chhi pahy ta.

²³ Saw phaoh ta, sawchapaw sa ta, “Khazohpa ta ei moh chhiepa a phiehru haw,” tah ta.

²⁴ “Abeipa ta sawchapaw hropa na pie heih mawh sy!” tah ta, a moh Zawsi a bi.

Zakaw nata Lâbâ amâ paryh

²⁵ Râkheli ta Zawsi a sa tawhta, Zakaw ta Lâbâ hnohta, “Ei o nata ei râh lâ ei di thei nawpa ta na pasiesa bâ mah y.

²⁶ Ei cha chakaona chhâpa ei lapinôzy nata ei sawzy he na pie la, na pasiesa mah y. A phapa ta ei cha chakaozie kha na pahno khai,” tah ta.

²⁷ Lâbâ ta a hnohta, “Na modypa ei châ khiahta cha, ngiachhiepa ta y chy mah y. Nâma zawhzi ta Abeipa ta byhnâ eina pie tahpa aluahna ta ei hmô haw,” tah ta.

²⁸ Zakaw hnohta, “Na hlao awpa zie reih la, na chho mah y, ei cha pie aw,” tah ta.

²⁹ Zakaw ta a hnohta, “Kheihta ma ei cha chakao tahpa pahno chi ta, ei mohôhna ry liata na sahrohzy ama phazie na pahno khai.

³⁰ Ei vaw tlô no kha a chyhta dei hnei chi ta, tahmâ cha a hluhpi ama vaw châ ha hih. Ei siena lâ maihta Abeipa ta byhnâ a cha pie lymâ. Khatita ma ei chhôhkha châta ei patohpatia thei hra aw?” tah ta.

³¹ Lâbâ ta, “Khâpa ei cha pie aw?” tah ta. Zakaw ta, “Khâpa hmah eina pie awpa chi byuh vei. He hmo he eina taopa khiah chi ta cha, na sahroh zaw pasa heih aw na ta, ei vaih heih aw.

³² Tanoh na sahroh zaw zydua chahlô khai aw na ta, a cheichapaipa nata a kaorâhpazy a tlyh aw na ta, mietaku vyhpa maih nata mie cheichapaipa nata kaorâhpa maih, cha zydua cha ei hlao a châ aw.

³³ He he hmialâ daihti liata ei siana palâsana a châ aw. Hlao eina piepa chi mopasia awpa ta nâ vy tita, ei miezy hry liata cheichapai leipa nata kaorâh leipa nata ei mietakuzy hry liata a vyh leipa na hmô khiahta cha, ei parupa hawhta pachâpa a châ aw,” tah ta.

³⁴ Lâbâ ta, “A pha na, na reipa hawhta châ mawh sy,” tah ta.

³⁵ Cha noh lia tlai ta, Lâbâ ta mie tôhpa cheichapaipa nata kaorâhpa maih, mie panô cheichapaipa nata kaorâhpa maih, arâhpa a hlaopa maih nata mietaku vyhpa maih panano ta, a sawchapawzy ku liata hlâ ta.

³⁶ Ano nata Zakaw likawh cha noh thôh lâsie a hlapa ta tao ta. Zakaw cha Lâbâ sahroh zaw hropazy vaih pazao ta.

³⁷ Zakaw ta vâdei tho, kuasâh tho nata hnaphiapa thochiah palâpazy chhawh ta, a hyhkuazy hlaih ta, a sapa râhpa palâsa ta, arâhpa ta a cheichapaipa chôchahreizy tao ta.

³⁸ A hyhkua a hlaipa chôchahreizy cha, sahroh zawzy ti do tyhna châki liata zy, ti lona liata zy, sahroh zawzy dady lymâ ta soh ta. Sahrohzy cha ti do awpa ta amâ vy tita vô tyh ei ta.

³⁹ Chatanachata sahroh zawzy cha chôchahrei dady liata ama paw kiah ei ta, vô lymâ ei ta, kaorâhpa, cheichapaipa nata chei dipa ta a chapaicharupazy ta taw pataw lymâ ei ta.

⁴⁰ Zakaw ta mietakutawzy cha anano ta soh ta, mietaku zawzy cha, Lâbâ mietaku zawzy hry liata a kaorâhpa nata a vyhpazy lâta paheisa lymâ ta. Ano sahroh zawzy cha anano ta soh ta, Lâbâ sahroh hry liata pahlao leipa ta.

⁴¹ Sahroh thatlô viapazy ta paw ama kia tita, chôchahrei hry liata ama vô thei nawpa ta, Zakaw ta chôchahreizy cha sahrohzy hmô thei awpa ti lona liata soh tyh ta.

⁴² Sahroh zaw chiehleipazy deikua, cha liata soh vei. Chatanachata sahroh chiehlei viapazy cha Lâbâ eih châ lymâ ta, thatlô viapazy cha Zakaw eih a châ lymâ.

⁴³ Chatanachata Zakaw cha thata vaw hneirôh ta, sahroh zaw hluhpi, seichanôzy, seichapawzy, râraoseihpazy nata alâzy hnei ta.