ÂTHAONA 29 - Mara Bible RV (BSI)

Râkheli nata Liah châta Zakaw ta Lâbâ a chakao

¹ Zakaw cha sie lymâ ta, nochhi chyhsazy râh kei tlô ta.

² Mohmia pasaih ta, lyurâhpa liata tikhaoh vaw y ta, a kiapâh liata mietaku zaw hri thôh a byu thlâh ha ei ta. Cha tikhaoh ti cha mietaku zawzy ti ama padosa tyhpa a châ. Tikhaoh paka ama pamaina alô cha lai ngaita ta.

³ Cha liata mietaku zaw zydua pahmaoh tyh ei ta, tikhaoh paka liata alô cha pahluah ei ta, mietakuzy ti ama padosa khai nahta, alô cha tikhaoh paka liata a yna ualua liata ama soh heih tyh.

⁴ Zakaw ta ama hnohta, “Ei unawh saih u, khataih lâ chyhsa ma nama châ,” tah ta. Âmo ta, “Harânâ mo eima châ,” tah ei ta.

⁵ Zakaw ta ama hnohta, “Nâhaw sawchapawpa Lâbâ nama pahno ma?” tah ta. Âmo ta, “Eima pahno,” tah ei ta.

⁶ Zakaw ta ama hnohta, “A tlâh no a châ ma?” tah ta. Âmo ta, “A tlâh no na a châ. Moh tua, a sawchanô Râkheli chhao mietakuzy chhaota â vy ngâ kaw huh,” tah ei ta.

⁷ Zakaw ta, “Noh y thlâh chy ta, sahroh pasy daihti châ mâh vei hih. Mietakuzy ti padosa u la, a lao pabâsa chy teh u,” tah ta.

⁸ Âmo ta, “Mietaku zaw zydua pahmaohpakhy ta, tikhaoh paka liata alô he pasiepa a châ hlâlei cha, mietaku zawzy ti padosa thei ma pi. Cha hawhta tao khai tawhta, mietakuzy cha ti eima padosa tyh,” tah ei ta.

⁹ Âmo bie â chho hai nota, Râkheli cha a paw mietakuzy chhaota vaw tlô ta. Ano cha mietaku vaituhpa a châ.

¹⁰ Zakaw ta a nô rilâhpa Lâbâ sawchanô Râkheli nata a nô rilâhpa Lâbâ mietakuzy a hmô nahta, a kei hnia ta, alô cha tikhaoh paka tawhta pasie ta, a nô rilâhpa Lâbâ mietakuzy cha ti a padosa.

¹¹ Zakaw ta Râkheli cha a pahnâ ta, aoh tlili ta cha ta.

¹² Zakaw ta Râkheli hnohta a paw Lâbâ chhôhkhapa a châzie nata Rebekâ sawchapawpa a châzie zy chho ta. Chatawhcha Râkheli cha a râ ta, a paw kei chho ta.

¹³ Lâbâ cha a sietanô sawchapawpa Zakaw thâtih a theipata nahta, dy awpa ta a râ ta. Zakaw cha a pyh ta, a pahnâ ta, o lâ a chhi ta. Zakaw ta hmo yzie zydua Lâbâ chho ta.

¹⁴ Lâbâ ta a hnohta, “Ei rupa nata ei sapa tlai na châ cha zaw!” tah ta. Chatanachata Zakaw cha thla kha chhôh Lâbâ hnohta y ta.

¹⁵ Lâbâ ta Zakaw hnohta “Ei tupapa hmah châ hra la, a saipa ta eina chakao awpa chi châ vei. Na hlao awpa khâpa a châ aw, na chho teh?” tah ta.

¹⁶ Lâbâ cha sawchanô pano hnei ta, a uhtheinô moh cha Liah châ ta, a seihnainô moh cha Râkheli a châ.

¹⁷ Liah cha a mo pha leipa châ ta, Râkheli deikua cha chhithai kawpa nata pizie a ngia kawpa a châ.

¹⁸ Zakaw ta Râkheli cha kyhpachâ ta. Lâbâ hnohta, “Na sawchanô seihnainô Râkheli hnei awpa ta kô sari ei cha chakao aw,” tah ta.

¹⁹ Lâbâ ta, “Ano cha chyhsa hropa ei pie awpa hlâta, nâ ei cha pie awpa cha a pha via. Ei hnohta y thlâh ha mah y,” tah ta.

²⁰ Chatanachata Zakaw cha Râkheli hnei awpa ta kô sari chakao ta, a kyh a pachâ kawpa vâta, noh chyhta hawhta pachâ ta.

²¹ Zakaw ta Lâbâ hnohta, “Ei daihti â ki haw. Ei zialâh thei nawpa ta, ei lapinô cha na pie bâ teh,” tah ta.

²² Lâbâ ta kyhchhi tao ta, cha khih liata chyhsa zydua awpakhy ta.

²³ Zâ a vaw châ nahta, a sawchanô Liah cha Zakaw lâ a chhi ta, Zakaw ta Liah cha a zialâh ta.

²⁴ Lâbâ ta a seichanô Zilpâ cha, a sawchanô Liah hnohta a seichanô châta pie ta.

²⁵ My vaw châ ta, moh ta, Liah vaw châ thlâh ha ta. Zakaw ta Lâbâ hnohta, “Ei chô liata na hmotaopa he khâpa ma a châ tly? Râkheli hnei awpa ta cha chakao va na mâ? Khazia eina dôvei chi?” tah ta.

²⁶ Lâbâ ta, “Saw uhtheipa dyhchâ hlâta seihnaipa dyh pachâ tuapa cha, eima râh taozie châ vei.

²⁷ Ano châta hâta patloh ha tua la, cha khai tawhta a nawhta chhao cha eima cha pie aw. A nawhta châna chata kô sari hropa eina chakao heih aw chi,” tah ta.

²⁸ Zakaw cha, cha hawhta tao ta, Liah hnohta y nawpa hâta cha patloh ta. Cha khai tawhta Lâbâ ta a sawchanô Râkheli cha a lapinô châta pie ta.

²⁹ Lâbâ ta seichanô Bilhâ cha a sawchanô Râkheli hnohta a seichanô châta pie ta.

³⁰ Zakaw ta Râkheli cha a zialâh hra ta, Liah hlâta Râkheli kyhpachâ via ta, Lâbâ cha kô sari hropa a chakao via heih.

Zakaw sawzy

³¹ Liah cha a haopa a châpa Abeipa ta a hmô nahta, a chhi pahy ta, Râkheli deikua cha choh ha ta.

³² Liah cha saw phaoh ta, sawchapaw sa ta, “Abeipa ta ei pasataozie a hmôpa vâta a châ, tahmâ cha ei vahpa ta kyh eina pachâ ha aw,” tah ta, a moh Rubena a bi.

³³ Saw phaoh heih ta, sawchapaw sa ta, “Ahaopa ei châpa Abeipa ta a pahnopa vâta, he sawchapawpa chhao he eina pie,” tah ta, a moh Simeôna a bi.

³⁴ Saw phaoh heih ta, sawchapaw sa ta, “Tahmâ la sawchapaw pathôh ei sapa hapa vâta, ei vahpa ta eina tlaichhai ha aw,” tah ta, a moh Livai a bi.

³⁵ Saw phaoh heih ta, sawchapaw sa ta, “Tahmâ cha Abeipa ei reithai aw,” tah ta, a moh Zudâh a bi. Cha khai tawhta Liah cha saw sa khao vei.