ÂTHAONA 28 - Mara Bible RV (BSI)

Zakaw Lâbâ yna lâ a sie

¹ Aisika ta Zakaw cha aw ta, byhnâ a awpa khai tawhta biepie ta, a hnohta, “Kâna zuah lapinô ta na hnei awpa châ vei.

² Thyu la, Pâdâ-Aramia liata na nô paw Bethua o lâ sie la, cha liata na nô rilâhpa Lâbâ sawchanôzy hry tawhta pakha lapinô ta kei hnei mah y.

³ Khazohpa Atotaotheipa ta byhnâ cha pie sala, phopi hluhpi na vaw châ thei nawpa ta, chi hluhpi cha pathlasa sala, cha papôh mawh sy.

⁴ Na khichhai châna râh, Khazohpa ta Abarahâ hnohta a piepa râh he, ryuto châta na hnei thei nawpa ta, Abarahâ byhnâ cha, Khazohpa Atotaotheipa ta nâ nata na hnohta a ypa na pathlazy hnohta cha pie mawh ei sy,” tah ta.

⁵ Aisika ta Zakaw cha pasiesa ta. Pâdâ-Aramia râh liata Zakaw nata Esaw zy nô Rebekâ rilâhpa, Aramia chyhsa Bethua sawchapawpa Lâbâ o lâ sie ta.

Esaw lapinô hropa a hnei

⁶ Zakaw cha Aisika ta byhnâ awpa ta, lapinô hnei awpa ta Pâdâ-Aramia lâ pasiesa ta, byhnâ a awpa nota, “Kâna zuah lapinô ta na hnei awpa châ vei,” tahpa ta bie a piepa kyh nata,

⁷ Zakaw chhao ta a nô nata a paw rei a ngiah ta, Pâdâ-Aramia lâ a sie haw tahpa Esaw ta pahno ta.

⁸ Esaw ta Kâna zuahzy ta a paw Aisika palôh ama patlâh leizie pahno ta.

⁹ Esaw cha Ismela lâ vawh ta, lapinô a hnei chiehpazy thota, Abarahâ sawchapawpa Ismela sawchanô, Nebaiô sietanô, Mâhalâ cha lapinô ta hnei ta.

Bethel liata Zakaw mâsapa

¹⁰ Zakaw cha Besebâ tawhta pua ta, Harânâ pangaipa ta sie ta.

¹¹ Su miakha kei tlô ta, noh a tla hapa vâta, cha liata a rie ta. Cha su liata alô miakha la ta, a lahuah ta hmâh ta, cha liata a zia ta.

¹² Mâ sa ta, alei chô liata hleidy a vaw daopa hmô ta, hleidy pawhmao cha avâ daih ta. Khazohpa vâlyuhchâpazy ta hleidy chô liata kiah heih, chô heih, ama tah ngâpa hmô ta.

¹³ Abeipa cha hleidy chô lâta a duah ta, “Kei he Abeipa, na paw Abarahâ Khazohpa nata Aisika Khazohpa ei châ. Nâ ziana râh kha, nâ nata na pathlazy ei cha pie aw ei.

¹⁴ Na pathlazy cha alei liata dohlei zie châ aw ei ta, notla lâ, nochhi lâ, maw nata chho lâzy lia nama pôh lymâ aw. Nâ nata na chipathla liata khizaw pho to ama hu â hieh aw.

¹⁵ Pachâ teh, na hnohta ei y. Na siena maihta cha vaih lymâ aw na ta, he râh lâ he ei châ vaw chhi heih aw. Na hnohta bie ei taihpa he, ei patlô hlâlei cha, cha siesai cheita aw va na,” tah ta.

¹⁶ Zakaw cha â môpa a kaw hra ta, “He su liata Abeipa a vaw y tlai na, vaw pahno leipa na ta,” tah ta.

¹⁷ Zakaw cha chi kaw ta, “He su he chi â chhih kaw dia! He he su hropa châ vei, Khazohpa o tlai na a vaw châ, he he vârâh chhikao a châ hih,” tah ta.

¹⁸ Zakaw cha mydi kari ta thyu ta, a lahuah ta a hmâpa alô la ta, lôbô châta bô ta, a chô liata sathaw bao ta,

¹⁹ a su moh Bethel a bi. Cha khih moh cha Luzi vaw tah tuapa a châ.

²⁰ Zakaw ta, “Khazohpa cha ei hnohta y sala, ei siena lâpi liana heta na vaih sala, viahchhâ nie awpa nata chysia a tao awpa na piepa ta,

²¹ ei paw o lâ thlalôhpa ta ei vaw kua heih khiahta cha, Abeipa cha ei Khazohpa châ aw ta,

²² he alô, lôbô ta ei bôpa he Khazohpa o a châ aw. Chatanachata nâ ta eina piepa chi zydua tawhta su hrawh su kha â kipa ta ei cha pie lymâ aw,” tahpa ta bie a taih ta.