ÂTHAONA 27 - Mara Bible RV (BSI)

Zakaw ta Aisika byhnâ a to

¹ Aisika cha vaw machâ ta, hmô thei khao leina taihta a mo vaw zoh ha ta. A sawchapaw uhtheipa Esaw aw ta, a hnohta, “Ei sawchapawpa,” tah ta, ano ta, “He liata ei y,” tah ta.

² Aisika ta, “Pachâ teh, machâ ha na ta, ei thi nawpa noh chhao pahno va na.

³ Chavâta tahmâ ngiachhiepa ta na chaihrai, na lavâ nata na libaw zy kha la la, râh a khie la, sa na vaw kapa mah y.

⁴ Ei thi hlâta byhnâ ei cha awpa thei nawpa ta, ei aoh khopa âhmie pahâhpa na chhopa la, ei nie awpa ta kei lâ vaw cheih mah y,” tah ta.

⁵ Aisika ta a sawchapawpa Esaw hnohta a reipa cha, Rebekâ ta thei ta. Sa ka ta, vaw phao awpa ta Esaw râh â khie chhôh ta,

⁶ Rebekâ ta a sawchapawpa Zakaw hnohta, “Pachâ teh, na paw ta na uhta Esaw hnohta,

⁷ ‘Sa na vaw phaopa la, âhmie pahâhpa na chhopa mah y. Chatanachata nie aw na ta, ei thi hlâta Abeipa hmiakô liata byhnâ ei cha awpa aw,’ tahpa ta a reipa ei thei.

⁸ Chavâta ei sawchapawpa y, tahmâ ei bie nathlie la, bie ei cha piepa hawhta tao mah y.

⁹ Sahroh zaw lâ vawh la, cha tawhta mietaw phapa pô no na kei lapa la, na paw châta a aoh khopa âhmie pahâhpa ei chhopa aw.

¹⁰ Cha cha na paw o lâ vawkhei aw chi ta, nie aw ta, chatanachata a thi hlâta byhnâ a cha awpa aw,” tah ta.

¹¹ Zakaw ta a nô Rebekâ hnohta, “Ei uhta Esaw cha chyhsa hmi rôh kawpa châ ta, kei cha chyhsa mihpa châ tlôh na ta.

¹² Ei paw ta na vaw hria sala, ano a dôveipa hawhta châ aw na ta, byhnâ châ leipa ta, ei chô liata chhiesana a patlôsatuhpa tlao ei châ aw mâh tâh,” tah ta.

¹³ A nô ta a hnohta, “Ei sawchapawpa, chhiesana na to awpa cha, keima chô liata y mawh sy. Ei bie nathlie teh. Vawh la, sahrohzy cha kei lâ vaw cheih teh,” tah ta.

¹⁴ Zakaw cha vawh ta, sahrohzy cha kei la ta, a nô lâ a vykhei ta. A nô ta a paw aoh khopa hawhta, âhmie pahâhpa cha chhoh ta.

¹⁵ Rebekâ ta a sawchapaw uhtheipa Esaw chysia pha chaipa, a o liata a sopazy la ta, a sawchapaw seihnaipa Zakaw cha paky ta.

¹⁶ A kuzy nata a rao mihpa liata mietaw vozy bai ta.

¹⁷ Âhmie pahâhpa nata viahchhâ a taopazy cha, a sawchapawpa Zakaw ku liata pie ta.

¹⁸ Zakaw cha a paw lâ vawh ta, “Ei pâ,” tah ta. Aisika ta, “He liata ei y. Ei sawchapawpa, ahy na châ?” tah ta.

¹⁹ Zakaw ta a paw hnohta, “Na sawchapaw uhtheipa Esaw ei châ. Eina chhopa hawh chi ta ei tao haw. Ngiachhiepa ta a kaw tyuh la, ei sakapa sa he nie la, byhnâ na awpa mah y,” tah ta.

²⁰ Aisika ta a sawchapawpa hnohta, “Ei sawchapawpa, Kheihtazieta cha hawhta sa na vaw hmô patoh thlâh haw?” tah ta. Zakaw ta, “Abeipa na Khazohpa ta hlao eina patlohpa vâta a châ,” tah ta.

²¹ Aisika ta Zakaw hnohta, “Ei sawchapawpa y, ei sawchapawpa Esaw na châ hmeiseih tlai ma, châ vei ma, tahpa ei pahno thei nawpa ta, ngiachhiepa ta a vaw hnia tua, ei cha hria tua aw,” tah ta.

²² Zakaw ta a paw Aisika cha a kei hnia ta, ano ta vaw hria ta, “A ao cha Zakaw ao châ ta, a kuzy deikua cha, Esaw ku châ tlôh,” tah ta.

²³ A uhta Esaw ku hawhta a ku hmi a rôhpa vâta Aisika ta Zakaw cha pahno khao vei. Chatanachata byhnâ awpa ta.

²⁴ Aisika ta, “Ei sawchapawpa Esaw na châ tlai ma?” tah ta, Zakaw ta, “Ei châ,” tah ta.

²⁵ Aisika ta, “Ei kiapâh lâ vaw cheih teh. Ei sawchapawpa sakapa cha nie aw na ta, byhnâ ei cha awpa aw,” tah ta. Zakaw ta pati cha a paw kiapâh lâ cheih ta, a paw ta nie ta. Kresawhti chhao cheipa ta, doh hra ta.

²⁶ A paw Aisika ta a hnohta, “Ei sawchapawpa y, nâ vaw hnia la, nâ pahnâ teh,” tah ta.

²⁷ Zakaw ta a paw cha a kei hniapa ta, a pahnâ ta. Aisika ta a chysia roh thei ta, byhnâ awpa ta, “Ei sawchapawpa roh cha, Abeipa byhnâ piepa râh roh a châ.

²⁸ Khazohpa ta avâ diati cha piepa ta, Lei phapa cha pie sala, Sâh nata kresawhti hluhpi cha pie mawh sy.

²⁹ Phopizy ta cha chakao ei sala, Râhzy ta châ naoh mawh ei sy! Na unawhzy chô liata bei ta y la, Na nô sawzy ta châ naoh mawh ei sy! Chhie châ sapatuhpa maih, Chhiesapa ta y ei sala; Byhnâ châ awpatuhpa maih, Byhnâ topa ta y mawh ei sy!” tah ta.

³⁰ Aisika ta Zakaw châta byhnâ a aw khaipa nahta, Zakaw cha a paw Aisika hmiakô tawhta a pua pathla hlâta, a uhta Esaw cha râh â khiena lâ tawhta vaw tlô ta.

³¹ Ano chhao ta âhmie pahâhpa tao ta, a paw lâ vaw cheih ta. A paw hnohta, “Ei pâ, thyu la na sawchapawpa sakapa he nie la, byhnâ cha na awpa mah y,” tah ta.

³² A paw Aisika ta a hnohta, “Ahy na châ?” tah ta. Ano ta, “Na sawchapawpa, na sawchapaw uhtheipa Esaw na ei châ,” tah ta.

³³ Aisika cha thata a chalyu ta, “Cha khiah, sa ka ta, kei lâ vaw cheih ta, na vaw tlô hlâta na paniesa ta, a châta byhnâ ei aw hapa kha, ahy ma a châ tly? Chatatlyh, ano tlai kha byhnâ cha a to aw,” tah ta.

³⁴ Esaw cha a paw biezy a thei nahta, palôh pasa ngaitapa ta aoh tlili ta cha ta. A paw hnohta, “Hy ei pâ y, kei he, kei chhao he, byhnâ na awpa hra mah y,” tah ta.

³⁵ Châhrasala Aisika ta, “Na nawhta ta piehpie ngaitapa ta a vy ta, na byhnâ a cha lapa haw,” tah ta.

³⁶ Esaw ta, “Zakaw moh a phaoh awpa tlai a vaw châ he! Ei no dua eina dôvei ha hih. Sawchapaw uhtheipa châna tovyuh na lapa ta, tahmâ ei byhnâ eina lapa heih hih!” tah ta. Chatawhcha Esaw ta, “Byhnâ miakha chhâ na pahlôhpa va chi ma?” tah ta.

³⁷ Aisika ta a hnohta, “Ano cha na bei ta ei tao haw. A unawhpa zydua ano chakaotuhpa ta pie na ta, sâh nata kresawhti ta ei pasa haw. Ei sawchapawpa y, na châta khâpa ei tao thei khao aw?” tah ta.

³⁸ Esaw ta a paw hnohta, “Ei pâ, byhnâ cha miakha deita ma na hnei? Hy ei paw y, kei he, kei chhao he, byhnâ na awpa hra mah y,” tah ta, Esaw cha ao paro ngaitapa ta cha ta.

³⁹ A paw Aisika ta a chhy ta, a hnohta, “Pachâ teh, lei phapa nata a hlapa liata pahrâ aw chi ta, Chô lâ tawhta avâ diati nata a hlapa liata na pahrâ aw.

⁴⁰ Na zaozi ta hroh aw chi ta, Na unawhpa na chakao aw; Na pua tita deikua cha, A raopaky na rao tawhta na pahluh aw,” tah ta.

Harânâ lâ Zakaw a sie

⁴¹ A paw ta byhnâ a patosa hapa vâta, Zakaw cha Esaw ta a hao kaw ta. Esaw ta a palôh liata, “Ei paw mâchhie eima sa nawpa nohzy a hnia ha ta, cha tina chata ei unawhpa Zakaw cha ei thie aw,” tah ta.

⁴² A sawchapaw uhtheipa Esaw bie cha Rebekâ chho ei ta. Chyhsa tuah ta, a sawchapaw seihnaipa Zakaw cha kei paawsa ta, a hnohta, “Na uhta Esaw ta, thie châ chhuahpa ta anosasyh ta thlah â palôh.

⁴³ Chavâta ei sawchapawpa y, ei bie nathlie mah y. Thyu la, Harânâ liata ei rilâhpa Lâbâ lâ a râ la,

⁴⁴ na uhta hiehâhna a pai hlâlei cha, a hnohta noh khazie tlyma kei y chy mah y.

⁴⁵ Na chô liata na uhta hiehâhna paipa ta, a chô liata na hmo taopa a my hlâlei cha, cha liata y chy mah y. A hiehâhna a pai tita, chyhsa vaw tuah aw na ta, ei cha vaw padysa aw. Khazia nama pano ta noh kha ta ei cha pahlei aw ei?” tah ta.

⁴⁶ Rebekâ ta Aisika hnohta, “Hiti chanôzy vâna heta, hro eina ai kaw. Zakaw ta âmo hawhpa Hiti chanô, he râh zuah he lapinô ta a hnei hra chhochhi khiahta cha, hro he ei châta khâpa a phahnai aw?” tah ta.