ÂTHAONA 25 - Mara Bible RV (BSI)

Keturâ chô liata Abarahâ pathlazy

¹ Abarahâ ta lapinô hropa hnei ta, a moh Keturâ a châ.

² Ano ta Abarahâ châta Zimrâ, Zôkasâ, Medâ, Midia, Isbâ nata Suah zy sapa ta.

³ Zôkasâ ta Sebâ nata Dedâ sa ta. Dedâ pathlazy cha Asahuri mo, Letusi mo nata Leumi mozy ama châ.

⁴ Midia sawchapawzy cha Epha, Ephe, Hanô, Abidâ nata Eldâ zy ama châ. Cha zydua cha Keturâ pathlazy ama châ.

⁵ Abarahâ ta a hneipa zydua Aisika pie ta.

⁶ A nôtho sahlao sawchapawzy deikua cha kuhriazy pie ta, ano hro chhôh tlai ta a sawchapawpa Aisika yna tawhta nochhi râh lâ a pasiesa ha ei.

Abarahâ thina nata pabuna

⁷ Abarahâ hro chhôh kôzy cha, kô 175 a châ.

⁸ Abarahâ cha a thlahpa pathlie ta, chhâ a palopa ta thi ta. Pawpipa a châna taihta hro pahâh ngaitapa ta hroh ta, a chiheihzy hnohta pahlyhpa ta y ha ta.

⁹ A sawchapawpa Aisika nata Ismela zy ta Mamre tlô chy ta Hiti chyhsa Zôharâ sawchapawpa Epharaw lyu liata a ypa Mâkâpelâ lôpu liata ama pabu.

¹⁰ Cha lyu cha Abarahâ ta Hiti mo liata a chaleipa lyu kha châ ta, cha liata Abarahâ nata a lapinô Sârâ cha pabupa a châ.

¹¹ Abarahâ a thi tawhta, Khazohpa ta a sawchapawpa Aisika cha byhnâ pie ta. Aisika cha Belahairô kiapâh liata pahrâ ta.

Ismela pathlazy

¹² Hezy he Sârâ seichanô Izi zuah Hâkarâ ta Abarahâ châta a sapa Abarahâ sawchapawpa Ismela pathlazy ama châ.

¹³ Hezy he ama moh nata ama pathlazy yzie hawhta Ismela sawchapawzy moh a châ: Ismela sawchapaw uhtheipa cha Nebaiô châ ta, a pazipazy cha Kedâ, Adabe, Mibasâ,

¹⁴ Mismâ, Dumâ, Mâsâ,

¹⁵ Hâdâ, Temâ, Zetu, Nâphi nata Kedemâ zy ama châ.

¹⁶ Chazy cha Ismela sawchapawzy châ ei ta, ama khih nata ama riehmozy zipa ta ama moh bipa châ ta, ama phopi yzie hawhta bei pahrawh hleinozy ama châ.

¹⁷ Ismela hro chhôh kôzy cha, kô 137 a châ. Ismela cha a thlahpa pathlie ta, thi ta, a chiheihzy hnohta pahlyhpa ta y ha ta.

¹⁸ A pathlazy cha Havilâ râh tawhta Izi râh daih lâta Surâ râh taihta pahrâ ei ta, Asuria râh taihta pahrâ hra ei ta, ama unawhzy nata a khakhaipa ta ama y lymâ.

Esaw nata Zakaw pina

¹⁹ Hezy he Abarahâ sawchapawpa Aisika pathlazy ama châ: Abarahâ ta Aisika sa ta,

²⁰ Aisika cha Pâdâ-Aramia râh liata Aramia chyhsa Bethua sawchanô Rebekâ lapinô ta a hnei nota kô sypalihpa a châ. Rebekâ cha Aramia chyhsa Lâbâ sietanô a châ.

²¹ A lapinô a choh hapa vâta Aisika ta Abeipa lâta thlahchhâ ta, Abeipa ta a hiana cha chyh-ei ta, a lapinô Rebekâ cha saw phaoh ta.

²² A saw phaopazy cha a py chhôh liata a chatôh ei ta, Rebekâ ta, “Hmo phapa a châ tlôh khiah, khazia ma he hawhta ei y tly?” tah ta. Abeipa hiahri awpa ta sie ta.

²³ Abeipa ta a hnohta, “Na chhi chhôh liata râh miano y ta, Na py chhôh tawhta phopi miano a vaw pua aw; Phopi miakha cha ahropa hlâta a thatlô via aw ta, A uhthei viapa ta a seihnai viapa a chakao aw,” tah ta.

²⁴ Rebekâ cha a saw pi daihti vaw tlô ta, a chhi liata maphieh y ei ta.

²⁵ A pih tuapa cha phu saih ha ta, a pôhpa zydua ta poh hmi hawhpa hmi thihpa ta bie ta, a moh Esaw ama bi.

²⁶ Cha khai tawhta a ku ta Esaw phei ngavâhmaothy patuna chôta a nawhta vaw pih ta, a moh Zakaw bipa a châ. Rebekâ ta âmo a sa nota, Aisika cha kô sycharupa a châ.

Esaw ta a ryuto a zuah

²⁷ Hawtizy cha vaw laiseih ei ta, Esaw cha sakathaipa, râh a khiepa chyhsa châ ta, Zakaw cha chyhsa reih hluh leipa, poh o liata a pahrâpa a châ.

²⁸ Aisika cha Esaw sakapa a nie tyhpa vâta, Esaw cha dao kaw ta. Rebekâ deikua cha Zakaw dao via ta.

²⁹ Ei kha cha Zakaw ta abie pati a chho hai nota, Esaw cha râh lâ tawhta vaw tlô ta, a nodipa ta a thachhâ kaw ta.

³⁰ Zakaw hnohta, “Ei tha chhâ ngaita ta, ngiachhiepa ta abie saihpa pati na chhopa kha na paniesa teh” tah ta. Chavâta Esaw cha a moh Edômâ bipa a châ.

³¹ Zakaw ta, “Sawchapaw uhtheipa na châna tovyuh na chaleisa ha tua teh,” tah ta.

³² Esaw ta, “Moh teh, ei thi daihmâ hih, sawchapaw uhtheipa tovyuh cha ei châta khâpa a phahnai aw?” tah ta.

³³ Zakaw ta, “Bie nâ taih tua teh,” tah ta. Esaw ta Zakaw cha bie a taih ta, cha noh ta sawchapaw uhtheipa a châna tovyuh cha Zakaw hnohta zuah ha ta.

³⁴ Zakaw ta Esaw cha viahchhâ nata abie pati pie ta, niepa ta doh ta, thyu ta sie ha ta. Cha hawhna chata Esaw ta sawchapaw uhtheipa a châna tovyuh cha a pahlei haw.