ÂTHAONA 23 - Mara Bible RV (BSI)

Sârâ thina

¹ Sârâ cha kô 127 hroh ta, cha cha Sârâ hro chhôh kôzy a châ.

² Sârâ cha Kâna râh Kiriathâbâ khih liata thi ta. Cha cha Hebraw a châ. Abarahâ cha Sârâ mâchhiesa awpa nata chakhei awpa ta sie ta.

³ Abarahâ cha a lapinô ri hmiakô liata a duah ta, Hiti mo hnohta,

⁴ “Kei he nama hry liata khichhaipa nata chihropa châ na ta, ei lapinô ri he hmô khao lei awpa ta ei pabu thei nawpa ta, râh na pie teh u,” tah ta.

⁵ Hiti mo ta Abarahâ cha a chhy ei ta,

⁶ “Ei zibeipa y, miah nathlie teh. Nâ cha eima hry liata bei thatlôpa châ chi ta, eima thlâsu pha chaipa liata na lapinô ri cha pabu mah y. Nâma lapinô ri pabu nawpa ta eima hry liata ahy hmah eima thlâ a pasaih leipa y ma pi,” tah ei ta.

⁷ Abarahâ cha thyu ta, cha râh liata phopi a ypa Hiti mo hmiakô liata a bôh ta.

⁸ Ama hnohta, “Ei lapinô ri cha hmô khao lei awpa ta ei pabu awpa nama paryhsa khiahta la, ngiachhiepa ta

⁹ Zôharâ sawchapawpa Epharaw hnohta, a lyu chao liata Mâkâpelâ lôpu a hneipa khu, nama mohmô lia tlai ta thlâ su châta a mâ dopa ta chalei awpa ta na hiapa teh u” tah ta.

¹⁰ Cha nota Epharaw cha Hiti mo hry liata a tyuh thlâh ha hra ta. Hiti chyhsa Epharaw ta Hiti mo nata khihpi chhikao liata a ypa zydua theina liata Abarahâ hnohta,

¹¹ “Châ bao va, ei zibeipa, na nathlie tua. Lyu cha cha pie na ta, a chhôh liata lôpu a ypa chhao ei cha pie pâ. Ei chiheihzy mohmô lia tlai ta lyu cha ei cha pie. Na lapinô ri cha pabu mah y,” tah ta.

¹² Cha râh chyhsazy hmiakô liata Abarahâ cha a bôh ta.

¹³ Cha râh chyhsazy theina lia tlai ta Epharaw hnohta, “Â ryh na tah khiahta la, ngiachhiepa ta na nathlie teh. Lyu mâ cha ei cha pie aw. Cha liata ei lapinô ri ei pabu thei nawpa ta, lyu mâ ei cha pie awpa cha a pyh mah y,” tah ta.

¹⁴ Epharaw ta Abarahâ cha a chhy ta,

¹⁵ “Ei zibeipa, na nathlie tua. Râh cha tâkâ sekel 400 mâpa châ ta, cha cha keima nata nâma likah liata rei khi chhao a tloh leipa a châ. Na lapinô ri cha pabu mah y,” tah ta.

¹⁶ Abarahâ ta Epharaw reipa cha a pyh ta, cha daihti liata sôdaohpazy khopathliahna hmâpa ta, tâkâ sekel 400 Epharaw hnohta pie ta.

¹⁷ Chatanachata Mamre nochhi lâta a ypa Mâkâpelâ liata Epharaw lyu cha, lyu chhôh liata lôpu a ypa nata lyu liata tho a ypa zydua nata lyuri chheipâh zydua liata tho a ypazy chhaota,

¹⁸ Hiti mo mohmô nata khihpi chhikao liata a tyuhpa zydua mohmô ta, Abarahâ hnohta a ryuto châta piepa a châ.

¹⁹ Cha khai tawhta, Abarahâ ta a lapinô Sârâ cha Kâna râh Mamre nochhi lâta a ypa Mâkâpelâ lyu liata lôpu liana chata pabu ha ta. Mâkâpelâ cha Hebraw a châ.

²⁰ Lyu nata a chhôh liata lôpu a ypa cha Hiti mo ta Abarahâ hnohta thlâ su nata ryuto châta hnei awpa ta ama pie haw.