ÂTHAONA 22 - Mara Bible RV (BSI)

Abarahâ pasiana

¹ Cha hmozy hnôhlâ ta Khazohpa ta Abarahâ cha pasia ta, a hnohta, “Abarahâ” tahpa ta aw ta. Abarahâ ta, “He liata ei y,” tah ta.

² Khazohpa ta, “Na sawchapawpa, na sawchapaw matlupa, a kyh na pachâpa Aisika kha a chhi la, Môria râh lâ sie la, cha liata ei cha chho awpa tlâh miakha liata ano cha raopa hlâna ta hlâ mah y,” tah ta.

³ Abarahâ cha mydi kari ta thyu ta, alâ ky padia ta, a chakaotuhpa pano nata a sawchapawpa Aisika a hnohta a chhi ta. Raopa hlâna châta tho patlaw ta, thyu ta, Khazohpa ta a chhopa su lâ sie ta.

⁴ Noh thôhna noh ta, Abarahâ cha mohmia pasaih ta, a su cha lâhlapi liata va hmô ta.

⁵ Abarahâ ta a chakaotuhpazy hnohta, “Alâ chhao heta he liata vaw y chy muh vy. Kei nata hawtipa he hao lâ vawh aw pi ta, Khazohpa a kei chhy aw pi ta, nâmo lâ eima vaw kua heih aw,” tah ta.

⁶ Abarahâ ta raopa hlâ nawpa tho cha la ta, a sawchapawpa Aisika cha papiasa ta, ano ta mei nata chaizôh chaba ta, ama pano ta hmaohkha ta ama sie haw.

⁷ Aisika ta a paw Abarahâ cha bie a chho ta, “Ei pâ,” tah ta. A paw ta, “Ei sawchapawpa, he liata ei y,” tah ta. Aisika ta, “Moh tua, mei nata tho y ta, châhrasala raopa hlâna châta mietakutaw khataih liata a y?” tah ta.

⁸ Abarahâ ta, “Ei sawchapawpa y, raopa hlâna châta mietakutaw cha Khazohpa ta anosasyh ta â tôh aw,” tah ta. Ama pano ta hmaohkha ta sie lymâ ei ta.

⁹ Khazohpa ta a chhopa su ama tlô nahta, cha liata Abarahâ ta maisâh tao ta, a chô liata tho pacho ta. A sawchapawpa Aisika cha chahry ta, maisâh liata tho chô liata pazia ta.

¹⁰ Abarahâ ta a sawchapawpa thie nawpa chaizôh a ku ta kei paza ta.

¹¹ Châhrasala Abeipa vâlyuhchâpa ta avâ tawhta, “Abarahâ, Abarahâ!” tahpa ta za awsao ta. Abarahâ ta, “He liata ei y,” tah ta.

¹² Ano ta, “Hawtipa chô liata na ku pathla leipa la, kheihta hmah a chô liata tao khah y. Na sawchapawpa, na sawchapaw matlupa tlai chhao na pie awpa na thlyu leipa ei hmôpa ta, Khazohpa na chi tahpa tahmâ ei pahno haw,” tah ta.

¹³ Abarahâ cha kaw ua ta, mohmia pasaih ta, mietaku tôhpa pô kha chhohbuh liata a ki a taw hapa a hnôhky liata vaw y thlâh ha ta. Abarahâ cha vawh ta, mietaku tôhpa cha patu ta, a sawchapawpa vyuhpa ta raopa hlâna ta hlâ ta.

¹⁴ Chavâta Abarahâ ta cha su cha Zehôvâh Zire tahpa ta a moh bi ta, tanoh taihta, “Abeipa tlâh liata piepa a châ aw,” tah tyhpa a châ.

¹⁵ Abeipa vâlyuhchâpa ta Abarahâ cha avâ tawhta a ei nona ta za aw heih ta.

¹⁶ “Kha hmo kha na taopa vâta, keima tlai ta bie ei châ taih. Na sawchapawpa, na sawchapaw matlupa tlai chhao pie awpa ta na thlyu leipa vâta,

¹⁷ byhnâ cha awpa tlai aw na ta, avâ liata awhsi zie nata tilaipi kiah liata sadi zie ta na pathlazy papôh aw na ta, na pathlazy ta ama chariahpa khihpizy ama hnei aw.

¹⁸ Ei ao na nathliepa vâta, na pathla liata khizaw phopi zydua byhnâ topa ta ama y aw, Abeipa ta a tah,” tah ta.

¹⁹ Chatanachata Abarahâ cha a chakaotuhpazy yna lâ a lie ta, thyu ei ta, hmaohkha ta Besebâ lâ ama sie haw. Abarahâ cha Besebâ liata pahrâ ta.

Nâhaw pathlazy

²⁰ Cha hmozy hnôhlâ ta, chyhsazy ta Abarahâ hnohta, “Milkâ chhao khata na unawhpa Nâhaw châta sawchapawzy a sapa haw,” tahpa ta chho ei ta.

²¹ A sawchapaw uhtheipa cha Uzi châ ta, a nawhtazy cha Buzi, Aramia paw Kemua,

²² Kese, Hazô, Pildâ, Zidlâ nata Bethua zy ama châ.

²³ Bethua ta Rebekâ sa ta, cha pachariezy cha Milkâ ta Abarahâ unawhpa Nâhaw châta a sapazy ama châ.

²⁴ Rumâ ama tahpa a nôtho chhao ta Tebâ, Kahâmi, Tahâsi nata Mâkâ zy sa hra ta.