ÂTHAONA 21 - Mara Bible RV (BSI)

Aisika pina

¹ A vaw rei hapa hawhta, Abeipa ta Sârâ cha za tly ta. Abeipa ta a bietai hawhta Sârâ chô liata tao ta.

² Sârâ cha saw phaoh ta, Khazohpa ta bie â taihna daihti lia tlai ta, Abarahâ a pawpi tawhta sawchapawpa sapa ta.

³ Sârâ ta Abarahâ châta sawchapaw a sapa cha, Abarahâ ta a moh Aisika bi ta.

⁴ Khazohpa ta bie a piepa hawhta, Abarahâ ta a sawchapawpa Aisika cha noh charie a châ nahta, a chopaw taipa ta.

⁵ Abarahâ cha a sawchapawpa Aisika a sa nota, kô 100 uhtheipa a châ.

⁶ Sârâ ta, “Khazohpa ta na pahneisa ha ta, a theipa maihta eina pahneikhei aw ei.

⁷ Sârâ ta hawsaih â pyh aw tahpa ta ahy ma Abarahâ hnohta a reih beih aw tly? Châhrasala a pawpi tawhta sawchapaw ei sapa haw,” tah ta.

Khazohpa ta Hâkarâ nata Ismela a pabohsa

⁸ Hawti cha laiseih lymâpa ta, sâhpi pathleih ta. Aisika sâhpi pathleih noh liata Abarahâ ta kyhchhi rônahpa tao ta.

⁹ Izi zuah Hâkarâ ta Abarahâ châta a sapa, a sawchapawpa ta Aisika pasipasawh ta a pahneisaopa Sârâ ta hmô ta.

¹⁰ Chavâta Sârâ ta Abarahâ hnohta, “Hao seichanô nata a sawchapawpa hao papua teh. Hao seichanô sawchapaw hao ta ei sawchapawpa Aisika he ryu a tolâh awpa châ vei,” tah ta.

¹¹ A sawchapawpa kyh a châpa vâta, cha bie chata Abarahâ cha a pachâ parôhsa ngaita ta.

¹² Khazohpa ta Abarahâ hnohta, “Hawtipa vâta nata na seichanô vâta na pachâ a parôhsa leipa la, Sârâ ta na hnohta a reipa maih, a reipa hawhta tao mah y. Aisika tawhta na pathlazy a laichadaipa a châ aw.

¹³ Seichanô sawchapawpa chhao, na pathla a châpa vâta phopi ta ei padua aw,” tah ta.

¹⁴ Chatanachata Abarahâ cha mydi kari ta thyu ta, viahchhâ nata savo titheih la ta, Hâkarâ pie ta, a ngiatlâh liata khaih ta, hawtipa nata pasiesa ha ta. Hâkarâ cha sie ta, Besebâ râhchawhpa liata viavipa ta a khiekhâ ta.

¹⁵ Savo titheih ti a chhâ nahta, hawtipa cha chhohbuh miakha ry liata soh ta.

¹⁶ “Hawtipa a thi awpa cha mo ngâh va na,” tah ta, vawh ta, hawtipa tawhta libaw ka phana rakha liata a kei tyuh ta. Hawtipa dady liata a tyuh ta, ao paro ngaitapa ta aoh tlili ta cha ta.

¹⁷ Khazohpa ta hawtipa ao cha thei ta. Khazohpa vâlyuhchâpa ta avâ tawhta Hâkarâ cha za aw ta, a hnohta, “Hâkarâ, khâpa ma na pachâ châ parôhsa? Chi khah y, hawtipa ao cha a yna lia tlai ta Khazohpa ta a thei haw.

¹⁸ Thyu la, hawtipa kha na ku ta kei chalo la, a pyh mah y. Ano cha phopi rônahpa ta ei tao aw,” tah ta.

¹⁹ Khazohpa ta Hâkarâ cha a mo pavâsa ta, tikhaoreipa hmô ta. Vawh ta, savo titheih cha ti ta pabie ta, hawtipa cha padosa ta.

²⁰ Khazohpa cha hawtipa hnohta y ta, laiseih lymâ ta. Râhchawhpa liata pahrâ ta, libaw ka thaipa a vaw châ.

²¹ Pârâ râhchawhpa liata pahrâ ta, a nô ta Izi zuah a lapinô ta hiapa ta.

Abarahâ nata Abimele likah biehrai

²² Cha daihti liata, Abimele nata a pheisaih hyutuhpa Phikaw ta Abarahâ hnohta, “Na hmotaopa zydua liata Khazohpa na hnohta a y lymâ.

²³ Kei ta na chô liata phana ei palâsapa hawhna heta, nâ chhao kei nata na khichhai châna râh chô liana heta phana palâsa hra mah y. Kei nata ei sawzy nata ei pathlazy chô liata â doleipa ta tao lei awpa ta, tahmâ Khazohpa moh ta bie nâ taih mah y,” tah ta.

²⁴ Abarahâ ta, “Bie ei taih,” tah ta.

²⁵ Abimele chakaotuhpazy ta tikhaoh ama chhu hapa kyh liata, Abarahâ ta Abimele chô liata nôu bie reih ta.

²⁶ Abimele ta, “Cha hmo cha ahy ma a tao tahpa pahno va na. Nâ hra ta na chho beih leipa chi ta, cha kyh cha tanoh he ei pahno tua chaina a châ,” tah ta.

²⁷ Abarahâ ta mietakuzy nata viahchao tôhpazy a chhi ta, Abimele cha pie ta, chatanachata ama pano likah liata biehrai tao ei ta.

²⁸ Abarahâ ta mietaku zaw hry tawhta mietakutaw chanôpa pô sari ânano ta soh ta.

²⁹ Abimele ta Abarahâ hnohta, “Mietakutaw chanôpa pô sari ânano ta na sopa kha khâpa ma a yzie?” tah ta.

³⁰ Abarahâ ta, “He tikhaoh he keima chaopa tlai a châ tahpa eina pahnokhei nawpa chi ta, he mietakutaw chanôpa pô sari he ei ku tawhta na la awpa a châ,” tah ta.

³¹ Cha su liata ama pano ta bie amâ taih raihriepa vâta, cha su cha Besebâ bipa a châ.

³² Cha hawhna chata Besebâ liata biehrai tao ei ta. Biehrai ama tao khai nahta, Abimele nata a pheisaih hyutuhpa Phikaw cha thyu ei ta, Philistinâ râh lâ amâ lie haw.

³³ Abarahâ ta Besebâ liana cha Tamâri tho loh ta, cha liata Abeipa, Chhâzaw Khazohpa moh pado ta.

³⁴ Chatanachata Abarahâ cha Philistinâ râh liata bohpi y ta.