ÂTHAONA 2 - Mara Bible RV (BSI)

Pahânoh

¹ Cha hawhna chata avâ nata alei nata a chhôh liata a ypa zydua cha patlô khaipa a châ.

² A noh sarina noh ta Khazohpa ta a hmotaopa zydua pangoh ta, a noh sarina noh liata a raihria zydua tawhta a pahâ ta.

³ Chavâta Khazohpa ta noh sarina noh cha, a paysapa nata a hmotaopa zydua patlô ta â pahâna noh a châpa vâta, byhnâ pie ta, a pathaisa.

Idâh Sadô

⁴ He he Zehôvâh Khazohpa ta alei nata avâ a paysa nota alei nata avâ a taona thâtih a châ.

⁵ Zehôvâh Khazohpa ta alei chô liata avâ a pasuasa mâh leipa vâta nata lei a palie awpa chyhsa ama y mâh leipa vâta, lyurâhpa liata sibiepazy y mâh leipa ta, lyu liata chicheipazy pyuh mâh hra vei.

⁶ Châhrasala alei tawhta ameih kaw thyu ta, cha chata alei chô zydua cha a pahnasa tyh.

⁷ Chatawhcha Zehôvâh Khazohpa ta chhaohlei tawhta dohlei ta chyhsapa tao ta, a hnapasu liata hrona hu so thlu ta, chatanachata chyhsapa cha hrona hneipa a vaw châ haw.

⁸ Zehôvâh Khazohpa ta nochhi lâta Idâh liata sadô tao ta, cha liata chyhsapa a taopa cha soh ta.

⁹ Zehôvâh Khazohpa ta, mo la ngaitapa nata nie awpa phapa tho chi to chhaohlei tawhta papyusa ta. Sadô liah liata hrona tho y ta, chhie nata pha pahnona tho chhao a y.

¹⁰ Sadô pahnasa awpa ta Idâh tawhta chavah za loh ta, cha tawhna chata pachiahpa ta chavah miapalih lâta a pachhaih ta.

¹¹ Miakhana cha Pisaw chavah châ ta, ngôh puana Havilâ râh zydua chahryhpa ta a lohpa a châ.

¹² Cha râh liata ngôh cha ngôh suapa châ ta, ropahâhpa nata lôsôhpa pha patluapa zy chhao a y.

¹³ Chavah mianona cha Kihaw châ ta, Kusi râh zydua chahryhpa ta a lohpa a châ.

¹⁴ Chavah miathôhna cha Tikari châ ta, Asuria râh nochhi lâta a lohpa a châ. Chavah miapalihna cha Ufrâti a châ.

¹⁵ Zehôvâh Khazohpa ta chyhsapa cha a chhi ta, Idâh sadô liata rai hria awpa nata sadô vaih awpa ta soh ta.

¹⁶ Zehôvâh Khazohpa ta chyhsapa hnohta, “Sadô liata tho thei chi to he na nie thei khai,

¹⁷ chhie nata pha pahnona tho thei deikua he cha na nie awpa rai châ vei. Na nie khiahta cha, na nie noh tlai ta na thi thlyu aw,” tahpa ta biepie ta.

¹⁸ Zehôvâh Khazohpa ta, “Chapaw ano dei ta a ypa he pha vei, ano baotuhpa â khypa ei taopa aw,” tah ta.

¹⁹ Zehôvâh Khazohpa ta chhaohlei hmâpa ta râhsa chi to nata avâ pavaw chi to tao ta, ama moh bi awpa ta Âdâh lâ a chhi ta, hmohrohneipa to cha Âdâh ta moh a bizie lymâ hawhta ama moh a vaw châ haw.

²⁰ Âdâh ta osa zydua, avâ pavaw zydua nata râhsa zydua ama moh bi khai ta. Âdâh châta deikua cha baotuhpa â khypa y leipa ta.

²¹ Chavâta Zehôvâh Khazohpa ta Âdâh cha mokuh pahâh ngaitapa ta pamôsa ta, â mô chhôh ta a kâru miakha la ta, a vyuhpa ta a sapa ta pabie ta.

²² Zehôvâh Khazohpa ta chapaw kâru a lapa tawhna chata chanô tao ta, ano cha chapaw lâ a chhi ta.

²³ Âdâh ta, “He tlai he ei rupazy rupa châ ta, Ei sapazy sapa cha a châ hih; Chapaw tawhta lapa a châpa vâta, ‘Chanô’ tahpa ta bipa a châ aw,” tah ta.

²⁴ Chavâta chapaw ta a nô nata paw siesaipa ta, a lapinô patu aw ta, pôhpa miakha ama vaw châ ha aw.

²⁵ Âdâh nata a lapinô cha ama pano ta thluahruapa ta y ei ta, châhrasala ama noza vei.