ÂTHAONA 19 - Mara Bible RV (BSI)

Sawdawmâ Kawmawrâ paraona

¹ Vâlyuhchâpa pano cha zâlâ ta Sawdawmâ khih tlô ei ta. Lawta cha Sawdawmâ khih thokhy chhikao liata a vaw tyuh thlâh ha ta. Lawta ta âmo cha a vaw hmô nahta, dy awpa ta a duah ta, a hmia alei lâ a khupa ta a bôh ta.

² Lawta ta, “Ei zibeipa saih u, ei châ haw ei, ngiachhiepa ta châ chakaotuhpa o liata vaw tlô u la, a rie u la, nama pheizy a si teh u. Mydi ta thyu aw ei chi ta, nama sie nawpa lâ cha si lah vâ ei chi,” tah ta. Âmo ta, “Châ vei, khiliah liata tlao eimâ rie aw,” tah ei ta.

³ Châhrasala Lawta ta thata â hawpa vâ ei ta, ano cha pazi ei ta, a o lâ a ngia ha ei ta. Lawta ta âmo châta pati pahâhpa a chhuanoh ta, thinô pahlao leipa viahchhâ tao ta, nie ei ta.

⁴ Amâ zia hlâta, khihpi chyhsa, Sawdawmâ khihsawzy ta o cha vaw dôh ei ta. Vaih to tawhta satliapa nata pawhrâhpazy amâ vaw ki khai haw.

⁵ Lawta cha awsao ei ta, “Tazâ ta na o liata a vaw tlôpa chyhsazy kha khataih liata ama y? Âmo kha kaw papua teh, eima ykhei aw,” tah ei ta.

⁶ Lawta cha âmo a hmô awpa ta khôtho lâ pua ta, ochhi khaw ta,

⁷ ama hnohta, “Unawh saih u, ei châ haw ei, cha hawh ngâsâ ta molei khah u.

⁸ Moh teh u, chapaw a pahno beih leipa sawchanô pano ei hnei. Âmo cha nâmo lâ kaw papua aw ei na ta, pha nama tahpa hawhta ama chô liata tao teh u. He chyhsazy chô liata deikua cha, ei o vâphuh abohna ry liata a vaw ngia hapa châ ei ta, khâpa hmah tao cheita khuh vy,” tah ta.

⁹ Châhrasala, “A hnei teh” tah ei ta. Khihsawzy chata, “He chyhsa bao hra heta, he liata a vaw paih ta, tahmâ cha ryureituhpa ta y â chhuah he! Âmo eima tao chhiepa hlâta chhie viapa ta eima cha taochhie aw,” tah ei ta. Lawta cha chatitha ei ta, ochhi parao awpa ta a vaw hnia ei ta.

¹⁰ Châhrasala o chhôh liata chyhsazy ta ama ku ta kaw pazapa ta, Lawta cha a daophi ei ta, ama hnohta o chhôh lâ a ngiakhei ei ta, ochhi cha ama khaw haw.

¹¹ Ochhi thaby liata chyhsa a ypazy cha, a lai a chyh ta ama mo pachaosa ei ta, thachhâpa ta ochhi hmô thei khao leipa ei ta.

¹² Vâlyuhchâpazy ta Lawta hnohta, “He liata chyhsa hropa na hnei khao ma? Na piahpazy, na sawchapawzy, na sawchanôzy, khihpi chhôh liata na sanawh maih, he su tawhta puakhei khai ha mah y.

¹³ He su he eima pahleipadia aw. Abeipa hmiakô liata a khih chyhsazy kyh ama reipa a rarôh y ngaita ta, chavâta pahleipadia awpa ta Abeipa ta miah a za tuah,” tah ei ta.

¹⁴ Chatanachata Lawta cha a sawchanôzy a hnei awpa a piahpazy lâ vawh ta, ama hnohta, “Thyu u la, he su tawhta pua teh u. Abeipa ta he khihpi he a pahleipadia aw,” kei tah ta. Châhrasala a piahpazy ta sai a sohpa hawhta pachâ ei ta.

¹⁵ My khih a vaw dei nahta, vâlyuhchâpazy ta Lawta cha para ei ta, “Thyu la, he liata a ypa na lapinô nata na sawchanô panozy he puakhei teh. Chataleipatala, he khihpi hriena liata namâ hlao pathlei aw na,” tah ei ta.

¹⁶ Châhrasala chhôhmohpa ta y thlâh ha ta. Abeipa ta Lawta cha a ngiachhiepa vâta, vâlyuhchâpazy ta ano nata a lapinô nata a sawchanô panozy cha ama ku ta patupa ta a chhi ei ta, khihpi khôtho lâ â bohpa ta ama puakhei haw.

¹⁷ Khôtho lâ ama puakhei tawhta, vâlyuhchâpa pakha ta, “Na hro nawpa ta a râ teh. Na hnôh lâ a heih leipa la, bypi khataih su lia rai ta a duah hra khah y! Tlâhzy lâna khi ta a râ mah y. Chataleipatala na leidia pathlei aw,” tah ta.

¹⁸ Lawta ta ama hnohta, “Ei zibeipa, cha hawhta châ khah sy!

¹⁹ Châ chakaotuhpa he na khokheina na patosa chi ta, na zawngiahna rônahpa ei chô liata palâsapa ta, ei hrona na pabohsa ha hnohkua cha, tlâhzy lâna khi ta la a râ thei aw va na. Chhiena ta na vaw tlô thlu aw ta, ei thi pathlei aw.

²⁰ Moh teh, hao khih hao a râ khita liata y ta, a khih chhao khitaw a châ. Hao lâ hao rie na parâsa mah y, khitaw a châ huh, chatanachata ei hrona pabohsapa ta a y aw,” tah ta.

²¹ Vâlyuhchâpa ta a hnohta, “A pha na, cha nâ hawna chhao cha ei paryhsa. Na reipa khih hao la parao aw va na.

²² Hao khih lâ hao a chatliepa ta a râ mah y. Na tlô hlâlei khâpa hmah tao thei aw va na,” tah ta. Chavâta cha khih moh cha Zawâ bipa a châ.

Sawdawmâ nata Kawmawrâ pahleipadiana

²³ Lawta ta Zawâ khih a tlô nahta, alei chô liata noh vaw chhi ha ta.

²⁴ Abeipa ta Sawdawmâ nata Kawmawrâ chô liata vârâh tawhta mei nata kaih pasuasa ta. Vârâh liata a ypa Abeipa tawh tlai ta a zâ suahpa a châ.

²⁵ Cha khihpizy nata bypi zydua pahleipadia khai ta, khihpi liata a pahrâpa zydua nata chhaohlei liata a pyuhpazy chhao a pahleipadia khai haw.

²⁶ Hnôh lâ a chhâhpa Lawta lapinô cha hnôh lâ a heih ta, alôh tôh lâta â lie haw.

²⁷ A mylâ mydi ta Abarahâ cha thyu ta, Abeipa hmiakô liata â duana su lâ kha vawh ta.

²⁸ Sawdawmâ nata Kawmawrâ nata bypi râh zydua cha sai ta, râh tawhta meikhuh a kaw puapa hmô ta, meihôpi meikhuh hawh tlai ta a charih ngâ kaw ta.

²⁹ Khazohpa ta bypi khihpizy a parao nota, Khazohpa ta Abarahâ cha a thei thlâh ha ta. Chatanachata Lawta pahrâna khihpizy a parao nota, Lawta cha a rao haipa hry tawhta â chhi papua haw.

Lawta nata a sawchanôzy

³⁰ Lawta cha Zawâ liata y awpa a thlalôh thei leipa vâta, a sawchanô pano chhaota Zawâ cha puasai ei ta. Tlâh lâ kiah ei ta, a sawchanô pano chhaota lôpu liata pahrâ ei ta.

³¹ A uhtheinô ta a nawhtanô hnohta, “Eima paw he machâ ha ta, khizaw zydua taozie hawhta miah a ziakhei awpa chapaw râh liata pakha hmah y veih ei.

³² A vy teh, eima paw tawhta chipathla eima pazao thei nawpa ta, eima paw he kresawhti padosa sih la, a zialâh sih y,” tah ta.

³³ Cha zâ liata ama paw cha kresawhti padosa ei ta, a uhtheinô a ngia ta, a paw cha a zialâh ta. Â vaw ziapa nata a thyupa Lawta ta pahno vei.

³⁴ A mylâ ta a uhtheinô ta a nawhtanô hnohta, “Zâhnia zâ kha ei paw hnohta kei a zia na ta, tazâ chhao kresawhti padosa heih sih la, nâ a ngia la, a hnohta a zia hra mah y. Chatanachata eima paw tawhta chipathla eima pazao thei aw,” tah ta.

³⁵ Cha zâ chhao, ama paw cha kresawhti padosa heih ei ta. A nawhtanô cha thyu ta, a paw hnohta a kei zia ta. Â vaw ziapa nata a thyupa Lawta ta pahno vei.

³⁶ Chatanachata Lawta sawchanôzy cha ama narô ta ama paw saw phaoh ei ta.

³⁷ A uhtheinô ta sawchapaw sa ta, a moh “Môabâ” a bi. Ano cha tanoh ta Môabâ mo pathlatuhpa a châ.

³⁸ A nawhtanô chhao sawchapaw sa ta, a moh “Benâmi” a bi. Ano cha tanoh ta Amawna mo pathlatuhpa a châ.