ÂTHAONA 17 - Mara Bible RV (BSI)

Biehrai ngiana chopawtaina

¹ Abarâ cha kô sychaki nata kô chaki a châ nahta, a hnohta Abeipa a vaw luah ta. Abeipa ta Abarâ hnohta, “Kei he Khazohpa Atotaotheipa ei châ. Ei hmiakô liata y la, seina rai hnei leipa ta y mah y.

² Chatanachata keima nata nâma likah liata ei biehrai tao aw na ta, maluh thata ei cha papôhsa aw,” tah ta.

³ Abarâ cha â khu lâta pao ta, Khazohpa ta a hnohta,

⁴ “Pachâ teh, he he na hnohta ei biehrai cha a châ. Phopi hluhpi paw na châ aw.

⁵ Phopi hluhpi paw ta ei cha tao hapa vâta, na moh chhao Abarâ châ khao leipa aw ta, na moh cha Abarahâ tlao a châ ha aw.

⁶ Na chipathla thata papôhsa aw na ta, nâma tawhta phopizy pua aw ei ta, beizy ama pua aw.

⁷ Na Khazohpa châ awpa ta keima nata nâma likah liata ei biehrai cha chhâzaw biehrai châta ei pa-i aw. Na hnôhlâ ta chhâ a vaw y awpa na pathlazy Khazohpa châ lymâ awpa ta, kei nata na hnôhlâ ta na pathlazy likah liata chhâzaw biehrai a châ hra aw.

⁸ Tahmâ ta khichhai na châna râh, Kâna râh zydua he, nâ nata na hnôhlâ ta na pathla hnohta chhâzaw ryuto châta cha pie aw ei na ta, kei he ama Khazohpa ei châ aw,” tah ta.

⁹ Khazohpa ta Abarahâ hnohta, “Nâma lâ tawhta cha, ei biehrai he na zyh awpa châ ta, na hnôhlâ ta chhâ a vaw y lymâ awpa na pathlazy chhao ta ama zyh hra awpa a châ.

¹⁰ He he kei nata nâ nata na hnôhlâ ta na pathlazy likah liata ei biehrai châ ta, nama zi awpa nata zyh awpa biehrai a châ: Nama hry liata chapaw maih ama chopaw tai khai awpa a châ.

¹¹ Nama chopaw vo tai aw ei chi ta, cha cha kei nata nâmo likah liata biehrai ngiana a châ aw.

¹² Chhâ vaw y lymâ awpa zydua liata, nama hry liata chapaw maih, na o liata a pihpa nata na pathla a châ hlei leipa chihropa tawhta sôh ta na chaleipazy chhao, noh charie uhtheipa ama châ nahta chopaw tai khai awpa a châ.

¹³ Na o liata a pihpa tlyma, na sôh ta na chaleipa tlyma, chopaw tai khai awpa a châ. Chatanachata ei biehrai cha chhâzaw biehrai a châzie nama sapa lia tlai ta ngiapa ta a y aw.

¹⁴ Chopawtaileipa chapaw, a sapa liata chopawtaipa ta a y leipa cha, ei biehrai a paraopa vâta, a chiheih hry tawhta pahleipadiapa a châ aw,” tah ta.

¹⁵ Khazohpa ta Abarahâ hnohta, “Na lapinô Sârai cha Sârai tah khao leipa aw chi ta, a moh Sârâ a châ ha aw.

¹⁶ Byhnâ pie aw na ta, ano chô liata sawchapaw ei cha pie aw. Byhnâ pie aw na ta, phopizy pathlatuhnô châ aw ta, phopi beizy ano tawhta ama pua aw,” tah ta.

¹⁷ Abarahâ cha â khu lâta paopa ta pahneih ta, anosasyh ta, “Kô za khapa chyhsa heta ma saw a hnei aw? Sârâ cha kô sychaki ta ma saw a sa aw?” tah ta.

¹⁸ Abarahâ ta Khazohpa hnohta, “Ismela he na hmiakô liata tlao y thei sala ei tah kaw dia!” tah ta.

¹⁹ Khazohpa ta, “Châ bao va, na lapinô Sârâ ta sawchapaw cha sapa aw ta, a moh Aisika na bi aw. Ano hnohta ei biehrai pa-i aw na ta, cha cha ano hnôhlâ ta a pathlazy châta chhâzaw biehrai a châ aw.

²⁰ Ismela kyh liata chhao, na biereipa ei thei. Pachâ teh, ano chhao byhnâ ei pie haw. Chi hluhpi pathlasa aw na ta, ama maluh thata ei papôh aw. Bei pahrawh hleino pathlatuhpa châ aw ta, phopi rônahpa ta ei tao aw.

²¹ Ei biehrai deikua cha, Sârâ ta hâhkô, he daihti liata a cha sapa awpa Aisika hnohta ei pa-i aw,” tah ta.

²² A hnohta bie a reipa a patlô nahta, Khazohpa ta Abarahâ cha khysai ha ta.

²³ Chatanachata Abarahâ ta a sawchapawpa Ismela nata a o liata a pihpa sei zydua nata tâkâ sôh ta a chaleipa zydua, Abarahâ o liata chapaw maih a chhi ta, Khazohpa ta a hnohta a reipa hawhta, cha noh lia tlai ta ama chopaw vo cha taipa khai ta.

²⁴ Abarahâ cha a sapa liata chopaw â tai nota kô sychaki nata kô chakipa châ ta,

²⁵ a sawchapawpa Ismela cha a sapa liata chopaw ama tai nota kô hrawh hleithôhpa a châ.

²⁶ Cha noh lia tlai chata Abarahâ nata a sawchapawpa Ismela cha chopawtaipa ta ama y haw.

²⁷ A o liata chapaw maih, a o liata a pihpa nata chihropa tawhta tâkâ sôh ta a chaleipazy chhao ano hnohta chopaw tai khaipa ama châ.