ÂTHAONA 16 - Mara Bible RV (BSI)

Hâkarâ nata Ismela

¹ Abarâ lapinô Sârai cha Abarâ châta saw sapa thei leipa ta. Sârai cha Izi zuah a moh Hâkarâ ama tahpa seichanô pakha hnei ta.

² Sârai ta Abarâ hnohta, “Nathlie teh, Abeipa ta saw phao awpa eina pakhâ ha hih, vawh la, ei seichanô lâ a kei ngia mah y. Ano hmâpa ta sawchapaw ei hnei thei ngyu aw,” tah ta. Abarâ ta Sârai bie cha zyh ta.

³ Abarâ cha Kâna râh liata kô hrawh a pahrâ tawhta, a lapinô Sârai ta, a seichanô Izi zuah Hâkarâ cha a chhi ta, a vahpa Abarâ hnohta a lapinô châta pie ta.

⁴ Abarâ ta Hâkarâ lâ a ngia ta, saw phaoh ta. Hâkarâ ta saw a phaoh tahpa a pahno nahta, a zibeinô cha mohnao pathao ta.

⁵ Sârai ta Abarâ hnohta, “Ei chô liata hmo doleipa a tlôpa he nâma chô liata y mawh sy. Ei seichanô he nâ pyh awpa ta cha pie na ta, saw a phaoh tahpa â pahnopa nahta, eina mohnao haw. Abeipa ta nâma nata keima likah pachia mawh sy!” tah ta.

⁶ Abarâ ta Sârai hnohta, “Nathlie teh, na seichanô cha na ku liata a y. Pha na tahnazie hawhta a chô liata tao mah y,” tah ta. Sârai ta Hâkarâ cha a rie thata pathei ta. Chavâta Hâkarâ ta Sârai cha â râsai haw.

⁷ Abeipa vâlyuhchâpa ta Hâkarâ cha râhchawhpa tihnawh kiapâh, Surâ pangaina lâthlôh liata tihnawh kiapâh liata hmô ta.

⁸ A hnohta, “Hâkarâ, Sârai seichanônô, khataih tawhta nâ vy, khataih lâ na sie aw?” tah ta. Ano ta, “Ei zibeinô Sârai tawhta ei râ,” tah ta.

⁹ Abeipa vâlyuhchâpa ta, “Na zibeinô Sârai lâ kua la, ano rei sai ta kei y mah y,” tah ta.

¹⁰ Abeipa vâlyuhchâpa lilaw ta a hnohta, “Na pathlazy thata papôhsa aw na ta, Ama hluhzie reih tiahpa châ aw vei,” tah ta.

¹¹ Abeipa vâlyuhchâpa ta a hnohta, “Pachâ teh, saw phaoh chi ta, Sawchapaw na sa aw; Abeipa ta na pasataona a pahnopa vâta, A moh Ismela na bi aw.

¹² Ano cha alâ hrâhpa hawhta châ aw ta, Chyhsa to a dyuh aw ta, Chyhsa to ta ano a dyuh aw ei ta, A unawhpa zydua nata a ryh leipa ta a y aw,” tah ta.

¹³ Hâkarâ ta, “He liana tlai heta nâ hmôtuhpa cha ei hmô haw,” tah ta, bie â chhotuhpa Abeipa cha, “Nâ cha a hmôtuhpa Khazohpa na châ,” tahpa ta a moh a bi.

¹⁴ Chavâta tikhaoh cha Belahairô tahpa a châ. Kâdesâ nata Bere khih likawh liata a y.

¹⁵ Hâkarâ ta Abarâ cha sawchapaw sapa ta, Abarâ ta Hâkarâ chô liata a sapa a sawchapawpa moh cha Ismela a bi.

¹⁶ Hâkarâ ta Abarâ châta Ismela a sa nota, Abarâ cha kô sycharie nata kô charupa a châ.