ÂTHAONA 15 - Mara Bible RV (BSI)

Abarâ hnohta Khazohpa biehrai

¹ Cha khai tawhta Abeipa bie cha aluahna ta Abarâ hnohta vaw tlô ta, “Abarâ, chi khah y, Na vyhphao châ na ta, Na lymâ rônah ngaitapa ei châ,” tah ta.

² Châhrasala Abarâ ta, “Hy Abeipa Zehôvâh, khâpa eina pie aw chi, saw leipa châ na ta, ei ryu a to awpa cha Dâmaskâ khihpa Elieze a châ?” tah ta.

³ Abarâ ta, “Saw na pie leipa chi ta, moh tua, ei o liata nâ chakaotuhpa ta ei ryu cha a to aw,” tah ta.

⁴ Abeipa bie a hnohta vaw tlô heih ta, “He chyhsa heta na ryu to aw vei. Na chhôh tawhta a puapa tlai ta na ryu cha a to aw,” tah ta.

⁵ Khôtho lâ puakhei ta, a hnohta, “Avâ lâ khi moh la, awhsizy khi na reih tiah khiahta cha reih tua,” tah ta. Abeipa ta a hnohta, “Na pathlazy cha, khi hawhna khita ama châ aw,” tah ta.

⁶ Abarâ ta Abeipa cha a ngiapâ ta, â ngiapâna cha Abeipa ta a siana ta raopa ta.

⁷ Chatawhcha a hnohta, “Kei he, nama pahrâ nawpa ta, he râh he cha pie awpa ta Kaldia râh Ur khihpi tawhta châ chhi papuatuhpa Abeipa kha ei châ,” tah ta.

⁸ Abarâ ta, “Hy Abeipa Zehôvâh, he râh he ei hnei aw tahpa kheihta ei pahno thei aw?” tah ta.

⁹ Abeipa ta a hnohta, “Viahchao zeinô kô thôhpa pô kha, mie chanôpa kô thôhpa pô kha, mietaku chapawpa kô thôhpa pô kha nata vachhuh pô kha nata pivaw taw pô kha na vaw pie teh,” tah ta.

¹⁰ Cha zydua cha Abeipa lâta cheih ta, Abarâ ta â khophie liata su no ta patlaw chyu ta, a tlaw hiakha cha a tlaw hiakha lâ dady lymâ ta soh ta. Pavawzy deikua cha patlaw vei.

¹¹ Chatawhcha sahei a niepa pavawzy ta sa cha za by ei ta, Abarâ ta a laih ta.

¹² Noh a tla hai nota, Abarâ cha a mokuh thata vaw ei ta, a mô ha ta. Zohna rarôh y ngaitapa nata chichhihpa ta ano cha vaw khu ta.

¹³ Abeipa ta Abarâ hnohta, “Na pathlazy cha maniah râh liata khichhai ta y aw ei ta, kô 400 chhôh riethei taopa ta sei ta ama y aw tahpa a siapa ta pahno mah y.

¹⁴ Châhrasala sei ta âmo a taotuhpa phopi cha pachia aw na ta, achhâna lâta sôh nata thih hluhpi chhaota ama pua aw.

¹⁵ “Nâ deikua cha, Châ pathlatuhpazy hnohta thlalôhpa ta a di aw chi ta, Pawpipa ta pabupa na châ aw.

¹⁶ Amawri mo moleina kih a tlô mâh leipa vâta, chhâ palihna liata, he su liana heta ama vaw kua aw,” tah ta.

¹⁷ Noh tla ta a vaw zoh nahta, lômathu tawhta meikhuh nata meirei tawhta meipaleih ia ngâpa a vaw luah ta, sa patlawpazy likawh liata vaw sie pahlie ta.

¹⁸ Cha noh liata Abeipa ta, “Izi chavah tawhta chavah laipa Ufrâti taihta, he râh he na pathlazy hnohta ei pie ei.

¹⁹ Kenâ mo, Keni mo, Kâdamô mo,

²⁰ Hiti mo, Perizi mo, Rephai mo,

²¹ Amawri mo, Kâna mo, Kikâsi mo nata Zebu mo râhzy he na pathlazy hnohta ei pie ei,” tahpa ta Abarâ hnohta bie hraih ta.