ÂTHAONA 13 - Mara Bible RV (BSI)

Abarâ nata Lawta amâ chhaih

¹ Abarâ cha a lapinô, a hneipa zydua nata Lawta chhaota Izi râh tawhta Neke lâ khy ta.

² Abarâ cha sahrohzy, tâkâzy, ngôhzy ta hneirôh ngaita ta.

³ Neke tawhta sie ta, Bethel tlô ta, cha su cha hmia lâta Bethel nata Ai khih likawh ta poh o a raina su,

⁴ maisâh a tao tuana su kha a châ. Cha liata Abarâ ta Abeipa moh pado ta.

⁵ Abarâ hnohta a sie hrapa Lawta chhao mietaku zaw, viahchao zaw nata poh o zy hnei ta.

⁶ Ama hmo hneipa a hluh ngaitapa vâta, su kha liata pahrâ khoh awpa ta râh ta â daih khao leipa vâta, hmaohkha ta pahrâ thei awpa châ khao leipa ei ta.

⁷ Abarâ sahroh vaituhpazy nata Lawta sahroh vaituhpazy likah liata ahryuna vaw pua ta. Cha daihti liata, cha râh liata a pahrâpazy cha Kâna mo nata Perizi mozy ama châ.

⁸ Abarâ ta Lawta hnohta, “Nâma nata keima likah liata ahryuna y leipa sala, na sahroh vaituhpazy nata ei sahroh vaituhpazy likah liata chhao ahryuna y hra khah sy. Heinawh eima châ hih.

⁹ Na hmiakô liata râh zydua y vei mâ? Ngiachhiepa ta keima tawhta a panano thlâh ha mah y. Nâ chavei lâ na sie khiahta cha, kei chachâh lâ sie aw na ta, nâ chachâh lâ na sie khiahta cha, kei chavei lâ ei sie aw,” tah ta.

¹⁰ Lawta cha mohmia pasaih ta, Zawâ tlôna taihta Zawdâh bypi zydua cha Abeipa sadô hawhta nata Izi râh hawhta ti phana by a châpa ta hmô ta. Cha cha Abeipa ta Sawdawmâ nata Kawmawrâ khih a parao hlâ daihti a châ.

¹¹ Lawta cha ano châta Zawdâh bypi zydua a tlyh ta, nochhi lâ pangaipa ta sie ta. Cha hawhna chata Abarâ nata Lawta cha a chhaih ha ei ta.

¹² Abarâ cha Kâna râh liata a ngua ta, Lawta cha Bypi khihzy liata pahrâ ta, Sawdawmâ khih taihta a poh o pakawh lymâ ta.

¹³ Sawdawmâ chyhsazy cha molei ngaita ei ta, Abeipa chô liata hmo thata parao ei ta.

¹⁴ Lawta ta Abarâ â pasiesai tawhta, Abeipa ta Abarâ hnohta, “Na yna tawhna khata mohmia pasaih la, maw nata chho lâ zy, nochhi nata notla lâzy sai tua.

¹⁵ Râh na hmôpa zydua nâma nata na pathlazy hnohta chhâzaw châta ei cha pie aw ei.

¹⁶ Na pathlazy alei dohlei zie ta ei tao aw ei. Chyhsa ta alei dohlei a rei tiah khiahta cha, na pathlazy chhao rei tiahpa ama châ aw.

¹⁷ Râh he ei cha pie awpa vâta, thyu la, a doh lâ nata a hâ lâ chahry khai mah y,” tah ta.

¹⁸ Chatanachata Abarâ cha a poh o pasie ta, Hebraw liata Mâmre tho thih liata yna su paryh ta, cha liata Abeipa châta maisâh tao ta.