ÂTHAONA 11 - Mara Bible RV (BSI)

Babylaw O Sâhpa

¹ Khizaw liata chyhsa zydua ta reih miakha nata biereizie miakha a hly ei ta.

² Chyhsazy cha nochhi lâ pangaipa ta sie ei ta, Sinâ râh liata bypi hmô ei ta, cha liata pahrâ ei ta.

³ “A vy teh u, leiraopazy tao sih la, a pha kawpa ta rao ei suh u,” tahpa ta âmo nata âmo a chhohia ei ta. Alô vyuhpa ta leiraopa hmâh ei ta, bilâlei vyuhpa ta chiatlao a kiapa hmâh ei ta.

⁴ Chatanachata, “A vy teh u, khihpi padua sih la, o sâhpa a laki avâ a daih awpa sa sih la, eima moh pathâhsa suh u. Chataleipatala alei chô zydua liata papaipa ta eima y pathlei aw na,” tah ei ta.

⁵ Abeipa cha chyhsa sawzy ta khihpi nata o sâhpa ama paduapa cha mo awpa ta zu ta.

⁶ Abeipa ta, “Moh teh u, chyhsazy cha phopi miakha châ ei ta, ama zydua ta reih miakha a cheihpa ama châ hih. Cha cha tao amâ chhuahpa â thaona deita a châ. Cha hawhta a châ khiahta cha, tao amâ chhuahpa maih ama tao thei lei awpa y khao aw vei.

⁷ A vy teh u, zu sih la, ama biereipa amâ pahno thei lei nawpa ta, ama reih panano khai ha suh u,” tah ta.

⁸ Chavâta Abeipa ta âmo cha, cha su tawhta khizaw su to lâta papai ta, ama khihpi paduapa chhao cha ama bâhsai haw.

⁹ Abeipa ta cha liata khizaw zydua reih a panano khai hapa vâta, cha khihpi moh cha Babylaw bipa a châ. Chatanachata Abeipa ta âmo cha, cha su tawhta alei chô zydua liata a papai khai ha ei.

Semâ Pathlazy

¹⁰ Hezy he Semâ pathlazy ama châ: Semâ cha kô 100 uhtheipa a châ no, tipaua khai tawhta kô nona liata sawchapaw Apasâ sa ta.

¹¹ Apasâ a sa tawhta Semâ cha kô 500 hroh ta, sawchapaw nata sawchanô hropazy sa via ta.

¹² Apasâ cha kô 35 a châ nahta, sawchapaw Selâh sa ta.

¹³ Selâh a sa tawhta Apasâ cha kô 403 hroh ta, sawchapaw nata sawchanô hropazy sa via ta.

¹⁴ Selâh cha kô 30 a châ nahta, sawchapaw Ebe sa ta.

¹⁵ Ebe a sa tawhta Selâh cha kô 403 hroh ta, sawchapaw nata sawchanô hropazy sa via ta.

¹⁶ Ebe cha kô 34 a châ nahta, Pelekâ sa ta.

¹⁷ Pelekâ a sa tawhta Ebe cha kô 403 hroh ta, sawchapaw nata sawchanô hropazy sa via ta.

¹⁸ Pelekâ cha kô 30 a châ nahta, Reu sa ta.

¹⁹ Reu a sa tawhta Pelekâ cha kô 209 hroh ta, sawchapaw nata sawchanô hropazy sa via ta.

²⁰ Reu cha kô 32 a châ nahta, Seru sa ta.

²¹ Seru a sa tawhta Reu cha kô 207 hroh ta, sawchapaw nata sawchanô hropazy sa via ta.

²² Seru cha kô 30 a châ nahta, Nâhaw sa ta.

²³ Nâhaw a sa tawhta Seru cha kô 200 hroh ta, sawchapaw nata sawchanô hropazy sa via ta.

²⁴ Nâhaw cha kô 29 a châ nahta, Terâ sa ta.

²⁵ Terâ a sa tawhta Nâhaw cha kô 119 hroh ta, sawchapaw nata sawchanô hropazy sa via ta.

Terâ pathlazy

²⁶ Terâ cha kô 70 a châ nahta, Abarâ, Nâhaw nata Harânâ zy sa ta.

²⁷ Hezy he Terâ pathlazy ama châ: Terâ ta Abarâ, Nâhaw nata Harânâ zy sa ta, Harânâ ta Lawta a sa.

²⁸ Harânâ cha a pina Kaldia râh Ur khihpi liata a paw Terâ hro chhôh ta thi ha ta.

²⁹ Abarâ nata Nâhaw cha lapinô hnei ei ta. Abarâ lapinô moh cha Sârai châ ta, Nâhaw lapinô moh cha Harânâ sawchanô Milkâ a châ. Harânâ cha Milkâ nata Iskâ paw a châ.

³⁰ Sârai deikua cha choh ha ta, saw hnei vei.

³¹ Terâ cha a sawchapawpa Abarâ, a samohpa Lawta, Harânâ sawchapawpa nata a myuhnô Sârai nata a sawchapawpa Abarâ lapinô zy a chhi ta, Kaldia râh Ur khihpi tawhta Kâna râh lâ sie awpa ta hmaohkha ta ama pua. Châhrasala Harânâ khihpi ama tlô nahta, cha liata pahrâ ei ta.

³² Terâ cha kô 205 hroh ta, Harânâ khih liata thi ha ta.