ÂTHAONA 10 - Mara Bible RV (BSI)

Nôah pathla phopizy

¹ Hezy he Nôah sawchapawpa Semâ, Hamâ nata Zaphethâ pathlazy ama châ: Tipaua khai tawhta sawchapawzy sa chyu ei ta.

² Zaphethâ sawchapawzy cha Kôme, Mâkaw, Mâdai, Zavâ, Tubâ, Mese nata Tirâ zy ama châ.

³ Kôme sawchapawzy cha Askenâ, Ripha nata Tôkamâ zy ama châ.

⁴ Zavâ sawchapawzy cha Elisâ, Tâsi, Kiti nata Dôdâni zy ama châ.

⁵ He sahlaozy tawhna heta ama reih, ama pho nata ama chi yzie lymâ hawhta ama râh chyu liata pahrâpa liahpahlô phopizy ama vaw pua.

⁶ Hamâ sawchapawzy cha Kusi, Mizrai, Puti nata Kâna zy ama châ.

⁷ Kusi sawchapawzy cha Sibâ, Havilâ, Sâbatâ, Râmâ nata Satekâ zy ama châ. Râmâ sawchapawzy cha Sebâ nata Dedâ zy ama châ.

⁸ Kusi ta Nimraw sa ta, ano cha alei chô liata chyhsa thatlô riahphapa a y tuapa a châ.

⁹ Abeipa hmiakô liata sakathaipa mohpathâhpa châ ta, chavâta “Abeipa hmiakô liata sakathaipa mohpathâhpa Nimraw hawhta,” tahpa ta rei tyhpa a châ.

¹⁰ Ano râh athaona cha Sinâ râh liata Babylaw, Ere, Akadâ nata Kalne khihzy ama châ.

¹¹ Cha râh tawhta pua ta Asuria râh liata a ngia ta, Ninivâ, Rehôbô nata Kalâ khih zy a padua.

¹² Ninivâ nata Kalâ khih likawh liata Rese khih chhao padua ta, cha khih cha khih rônah ngaitapa a châ.

¹³ Mizrai ta Ludi, Anami, Lehâbi, Nâtuhi,

¹⁴ Pârusi, Philistinâ mozy pathlatuhpa Kâluhi nata Kâftawri mozy sa ta.

¹⁵ Kâna ta sawchapaw uhtheipa Sidaw nata a pazipa Hethâ sa ta,

¹⁶ Zebu mo, Amawri mo, Kikâsi mo,

¹⁷ Hivi mo, Araki mo, Sini mo,

¹⁸ Avâdi mo, Zemâri mo nata Hâmathi mozy pathlatuhpa a châ. Cha khai tawhta Kâna mo cha paipatla ei ta.

¹⁹ Kâna mo râhri cha Sidaw khih tawhta Kerâ lâ sie lymâpa ta Kâza khih taih sie ta, cha tawhta Sawdawmâ, Kawmawrâ, Adamâ, nata Zebô khihzy lâta sie lymâ ta, Lâsâ khih taih a sie.

²⁰ Chazy cha Hamâ pathlazy, ama chi, ama reih, ama râh nata ama phopi yzie lymâ hawhta pachhaihpazy ama châ.

²¹ Zaphethâ uhtapa Semâ ta sawchapawzy sa ta, Semâ cha Ebe mo zydua pathlatuhpa a châ.

²² Semâ sawchapawzy cha Elâmi, Asuria, Apasâ, Ludi nata Aramia zy châ ei ta,

²³ Aramia sawchapawzy cha Uzi, Hulâ, Kethe nata Mâsi zy ama châ.

²⁴ Apasâ ta Selâh sa ta, Selâh ta Ebe a sa.

²⁵ Ebe ta sawchapaw pano sa ta, pakhapa moh cha Pele châ ta, alei liata phopizy he ano daihti liata pachhaihpa ama châ. A unawhpa moh cha Zawkatâ a châ.

²⁶ Zawkatâ ta Almôdâ, Selepha, Hâzamâve, Zerâ,

²⁷ Hadôrâ, Uzalâ, Dikalâ,

²⁸ Ôbâ, Abimelâ, Sebâ,

²⁹ Ôphi, Havilâ nata Zôbabi zy sa ta, cha zydua cha Zawkatâ pathlazy ama châ.

³⁰ Ama pahrâna cha Mesâ tawhta Sephârâ lâta sie lymâ ta, nochhi tlâh taih a châ.

³¹ Chazy cha Semâ pathlazy, ama chi, ama reih, ama râh nata ama phopi yzie lymâ hawhta pachhaihpazy ama châ.

³² Chazy cha ama thyutôna nata ama râh yzie ta pachhaihpa Nôah sawchapaw pathlazy ama châ. Tipaua khai tawhta, âmo tawhta a puapa phopizy cha alei chô zydua liata ama paipatla.