AMÔSÂ 9 - Mara Bible RV (BSI)

Izarei raona

¹ Abeipa cha maisâh kiah liata â duah thlâhpa ta hmô na ta, Abeipa ta hetana heta a tah: “Ochhizy â chalyu khaina taihta otôhzy phy la, Chyhsa zydua luh chô liata pacho thlu teh; A laibâhpazy cha zaozi ta thie aw ei na ta, Pakha hmahta a râ aw veih ei; Pakha hmahta pua aw veih ei.

² “Athihkhih taihta khaoh chao hra ei sala, Cha tawhtapa cha ei ku ta thaoh aw ei na ta; Avâ taihta kiah hra ei sala, Cha tawhtapa cha ei daophi pathlah aw ei.

³ Kâmel tlâh laki liata a nyu hra ei sala, Tluapapuapa ta cha tawhtapa cha la aw ei na ta; Tilaipi ry liata nâ nyusai hra ei sala, Cha liata parih bie pie aw na ta âmo cha a pachu aw ei.

⁴ Ama chariahpazy hmia lâta sei ta sie hra ei sala, Cha liata zaozi biepie aw na ta, Âmo cha ei thie aw ei; Phana lâ châ leipa ta, Chhiena lâta ei mo ei tawpâ aw ei.”

⁵ Pheisaihzy Abeipa Zehôvâh cha, Alei hria ta a patisa theipa châ ta, Cha liata a pahrâpa zydua mâchhie ama sa; Nile chavah hawhta alei pôhpalôhpa pasâh thei ta, Izi Nile hawhta a pasysa heih theipa a châ.

⁶ Avâzy liata a ochô chhôhpadâhzy tao ta, Alei liata a o tôh a bô; Tilaipi tizy aw ta, Alei chô liata a patlaituhpa a châ; Ano cha a moh Zehôvâh a châ.

⁷ “Hy Izarei sawzy saih u, Ei châta cha Kusi mo hawh dei châ hra veih ei chi ma?” Abeipa ta a tah. “Izi râh tawhta Izarei a kaw chhipa ta, Kâftaw tawhta Philistinâ a chhi na ta, Kiri tawhta Aramia a chhipa kha, Kei châ va na ma?

⁸ Pachâ teh u, Abeipa Zehôvâh mo cha, Khinarâh moleipa chô liata tawpâ ta, Chhaohlei chô tawhna heta Ei pahleipadia khai aw ei; Zakaw pathla deikua cha, Tlokhuh ta parao khai aw va na,” Abeipa ta a tah.

⁹ “Pachâ teh u, bie pie aw na ta, Sohhri ta sâh ripa hawhta, Izarei phopi he phopi zydua hry liata ei ri aw; Alô dikaripa chhao, Alei liata tla aw vei.

¹⁰ ‘Chhiena ta miah chadai leipa aw ta, Miah tlô thlu aw vei,’ a tahtuhpa, Ei phopi liata moleipa zydua cha, Zaozi ta ama thi khai aw.”

Izarei paduapathina

¹¹ “Cha noh liata, Dâvi byureih a pao hapa cha, Ei pathyu aw; Apyupazy pamai aw na ta, Araopazy ei padua aw; Hlâno tahpa hawhna khata, Ei paduapathi heih aw.

¹² Edômâ laibâhpazy cha Izarei sawzy eih châ aw ei ta, Ei moh a phaohpa phopi zydua ama hnei aw,” He hmozy a tao awpa Abeipa ta a tah.

¹³ “Moh teh u, nohzy a vaw tlô hai,” Abeipa ta a tah. “Leipalietuhpa ta sâh hriatuhpa a chhaona noh vaw tlô hai ta, Kre thei tlytuhpa ta a chi cheihtuhpa a chhaona noh a vaw tlô hai; Tlâhpizy ta kresawhti thlôhpa pathlaoh aw ei ta, Tlâhthlôhzy liata Kresawhti a loh aw.

¹⁴ Ei phopi Izarei cha, Vânoh ei patosa heih aw; Khih rypazy paduapathi aw ei ta, Cha liata ama pahrâ heih aw; Kre sadôzy tao aw ei ta, Kresawhti ama doh heih aw; Sadôzy tao aw ei ta, A theizy ama nie heih aw.

¹⁵ Ama râh liata loh aw ei na ta, Râh ei piepa tawhta phiapa ta y heih khao aw veih ei,” Abeipa nama Khazohpa ta a tah.