AMÔSÂ 8 - Mara Bible RV (BSI)

Mâchhiesana Noh

¹ Abeipa Zehôvâh ta hetana heta na pahmô heih ta:

² Nopi theilâpa ta a biepa hrâbyh vaw y ta. Abeipa ta, “Amôsâ, khâpa ma na hmô?” na tah ta. Kei ta, “Nopi theilâpa hrâbyh ei hmô,” tah na ta. Chatawhcha Abeipa ta ei hnohta hetana heta tah ta: “Ei phopi Izarei chô liata chhâna noh a vaw tlô haw, Âmo cha chapia beih khao aw veih ei na.”

³ “Cha noh liata cha, Achhyna o hlazy chhao, Chaphôhtuna hlazy lâta amâ lie aw; Athipa ri hluhzie awpa rimâ cha, Su to liata a zawh aw ei ta, A dâh karoh ha aw,” Abeipa Zehôvâh ta a tah.

Izarei raona

⁴ Nâmo, phahlapazy palâ khai ei chi ta, Râh liata rietheipazy a thie khaipazy saih u, He bie he thei teh u.

⁵ “Sâh eima zua thei nawpa ta, Thla thiehpa he lei bâ sala eima tah kaw dia! Viahdie eima zua thei nawpa ta, Pahânoh chhâ bâ sala eima tah kaw dia! Kachu pachyhpa ta sekel palai aw pi ta, Khopathliahna doleipa hmâpa ta sôh eima palie aw.

⁶ Tâkâ ta dyhchhiepazy chaleipa ta, Pheiky bao kha ta phahlapazy chalei aw pi ta, Sâh sihpazy eima zuah aw,” A tah tyhpazy saih u, He bie he thei teh u.

⁷ Abeipa ta Zakaw rônahna reipa ta, Hetana heta bie â taih haw: “Ama hmotaopa maih my beih aw va na.

⁸ He vâna heta râh a chalyu aw ta, A chhôh liata a pahrâpa zydua mâchhiesapa ta ama y aw. Râh pôhpalôhpa cha, Nile Chavah hawhta a kaw sâhpa ta, Izi Chavah hawhta pathluahpa châ aw ta, Pasysa heihpa a châ aw,” tah ta.

⁹ “Cha noh liata cha, Nohchhô ta noh patlasa aw na ta, Noh y liah ta alei ei pazohsa aw.

¹⁰ Nama kyhchhizy cha, Mâchhiesana lâta pachâsa aw na ta; Nama hlazy chhao, Chaphôhtuna lâta ei pachâsa aw; Chai zydua latho poh pasaisa aw ei na ta, Luh zydua ei papôlô khai aw; Sawchapaw matlupa mâchhiesapa hawhta tao aw na ta, A chhâna cha nôpona noh hawhta ei tao aw,” Abeipa Zehôvâh ta a tah.

¹¹ “Moh teh u, nohzy vaw tlô hai ta, Râh liata chakâhna ei patlôsa nawpa nohzy a vaw tlô hai; Nie chakâhna châ leipa aw ta, Ti chakâhna châ aw vei; Abeipa bie thei awpa y leina chakâhna a châ aw.

¹² Tilaipi tawhta tilaipi hropa lâ sie aw ei ta, Maw lâ tawhta nochhi lâ ama sie aw; Su to lâta a râ aw ei ta, Abeipa bie ama tlua aw; Châhrasala hmô aw veih ei.

¹³ “Cha noh liata cha, Laihsa kôpa chhithaipazy dâhphipa ta panao aw ei ta, Satliazy chhao ta dâhphipa ta ama panao aw.

¹⁴ Samâri thaileichâna reipa ta, ‘Hy Dânâ, na khazoh hrona reipa ta ei reih,’ Tahpa ta bie â taihpazy pao aw ei ta; ‘Besebâ Lâpi hrona reipa ta ei reih,’ Tahpa ta bie â taihpazy ama pao aw; Thyu heih khao aw veih ei,” Abeipa Zehôvâh ta a tah.