AMÔSÂ 7 - Mara Bible RV (BSI)

Zikyurâna aluahnazy

¹ He he Abeipa Zehôvâh ta eina pahmôpa a châ: Moh teh u, sibie tliapa a chhyh a thao pathao hai nota, khawsuzy vaw tuah ta, cha cha bei tovyuh sibiepa chhawh khaipa a châ tawhta sibiepa a thao heihpa a châ.

² Râh liata sibiepa cha khawsuzy ta ama nie khai nahta, “Hy Abeipa Zehôvâh, rie a ngiahthai mah y! Zakaw cha chyhta tlôh ta, Kheihta ma â duah thei aw?” tah na ta.

³ Abeipa cha a palôh a panai ta, Abeipa ta, “Kha hmo kha vaw tlô aw vei,” tah ta.

Mei ta hriena

⁴ Abeipa Zehôvâh ta hetana heta na pahmôsa heih ta: Pachâ tua u, Abeipa Zehôvâh ta mei ta pachiana aw ta, mei chata ti athupa lai ngaitapa cha palâ khai ha ta, alei chhao nie lymâ ta.

⁵ Chatawhcha kei ta, “Hy Abeipa Zehôvâh, rie chalihsa mah y! Zakaw cha chyhta tlôh ta, Kheihta ma â duah thei aw,” tah na ta.

⁶ Abeipa cha a palôh a panai ta, Abeipa Zehôvâh ta, “Kha chhao kha vaw tlô aw vei,” tah ta.

Padona ri

⁷ He he eina pahmô heih: Abeipa cha padona ri hmâpa ta sapa pâhchhô kiah liata a duah ta, a ku liata padona ri a chaba ta.

⁸ Chatawhcha Abeipa ta ei hnohta, “Amôsâ, khâpa ma na hmô?” na tah ta. Kei ta, “Padona ri,” tah na ta. Abeipa ta hetana heta a tah: “Moh teh, ei phopi Izarei sawzy hry liata padona ri parai na ta, Chapia beih khao aw veih ei na;

⁹ Aisika su sâhpazy cha, Roryhrapa ta taopa châ aw ta; Izarei supathaihpazy chhao, Paraopa a châ aw; Zerôbaw pathlazy cha, Zaozi ta ei thyuhnao aw ei.”

Amôsâ reipachhiena

¹⁰ Chatawhcha Bethel theihthaipa Amazia ta Izarei bei Zerôbaw lâ chyhsa tuah ta, a hnohta, “Amôsâ ta Izarei phopi hry liata arulâta cha tei ta, a bie zydua cha râh ta phaoh thei khao vei.

¹¹ Amôsâ ta hetana heta a tah: “‘Zerôbaw cha zaozi ta thi aw ta, Izarei cha a râh tawhta lâhlapi lâta Sei ta a sie tlai aw.’”

¹² Chatawhcha Amazia ta Amôsâ hnohta, “Hy nâ, hmôtheituhpa y, sie la, Zudâh râh lâ a râ la, cha liata viahchhâ kei nie la, hrohsona bie cha, cha liata kei phuah teh.

¹³ Bethel liata deikua cha, abei supathaihpa châ ta, abei o yna su a châpa vâta, he liata la bie phuah beih khao khah y,” tah ta.

¹⁴ Amôsâ ta Amazia cha a chhy ta, a hnohta, “Kei he hrohsopa châ leipa na ta, hrohsopa sawchapaw chhao châ va na. Sahroh vaituhpa nata theiku kô mohôhtuhpa ei châ.

¹⁵ Châhrasala Abeipa ta mietaku zaw vaina tawhta na la ta, Abeipa ta ei hnohta, ‘Sie la, ei phopi Izarei hnohta bie kei phuah teh,’ eina tah.

¹⁶ Chavâta tahmâ Abeipa bie he nathlie teh: “‘Izarei chakhiapa ta hrohsona bie phuah leipa la, Aisika pathla chakhiapa ta bie chho hra khah y,’ tah chi ta.

¹⁷ Chavâta Abeipa ta hetana heta a tah: ‘Na lapinô cha khihpi liata âzuahnô châ aw ta, Na sawchapawzy nata na sawchanôzy zaozi ta ama pao aw. Na râh he thliena ri ta thliepa ta rai khaipa châ aw ta, Nâma tlai chhao râh pathaih leipa liata na thi aw; Izarei cha ano râh tawhta lâhlapi lâ sei ta a sie tlai aw.’”