AMÔSÂ 6 - Mara Bible RV (BSI)

Zaio liata huhiehpa ta a ypazy hupona

¹ Zaio liata huhiehpa ta a ypazy cha, Ama hu a po na; Samâri tlâh liata thlahlôhpa ta a ypazy chhao, Ama hu a po na; Râh a y tuapazy liata chyhsa rônahpazy Ama hu po ta, Izarei pathlazy vaw pangaipa râh cha, A hu a po na!

² Kalne lâ sie u la, moh tua u, Cha tawhna chata Hâmathi laipa lâ sie u la, Philistinâ râh liata Kâthâ lâta zu tua u. Cha râhzy hlâta nama pha via ma? Nâmo râh hlâta âmo râh a lai via ma?

³ Chhiena noh lâhlapi lâ pasie ei chi ta, Thachahra hmâna dyuchhai nama vaw pahniasa.

⁴ “Sianaoh rakhô liata a zia ei ta, Ama dyuchhai chô liata â pazawhpazy; Mietaku zaw liata mietakutaw sa nie ei ta, Viahchao o liata viahchao taw sa a niepazy;

⁵ Totâ patlapa ta thathina hlazy sa ei ta, Dâvi hawhta pyungiapa tô thaipa ta â pachâpazy;

⁶ Biebuh ta kresawhti doh ei ta, Sathaw pha chaipa a thupazy; Châhrasala Zawsi rao nota a taokhei leipazy cha, Ama hu a po na!

⁷ Chavâta âmo cha, Seichâna lâ a sie tua chaipa châ aw ei ta; Kyhchhi pati niepa ta A pazawh zaolao thei khao aw veih ei.”

⁸ Abeipa Zehôvâh ta anosasyh ta bie a taih ha ta, Abeipa, Pheisaihzy Khazohpa ta a tah: “Zakaw apalaina pasi na ta, A thokhyzy ei hao; Chavâta khihpi nata a chhôh liata a ypa zydua cha, Ama khakhaipazy ku liata ei hlâ khai aw.”

⁹ O kha liata chyhsa pahrawh amâ nguapa chhao ta ama thi khai aw.

¹⁰ Athipa châta ropahâhpa a rao awpa a heinawh a vy sala, o tawhta a ri puakhei a chhuahpa ta, o chao chhâna liata a ypa cha hiahri sala, “Nâma leipa ta ahrohpa ama y khao ma?” tah sala, “Y veih ei” a tah khiahta cha, ano ta, “Na reih pathlie kha! Abeipa moh eima reih awpa châ vei” a tah aw.

¹¹ Pachâ teh u, Abeipa ta bie a pie haw; O laipa cha a bo bo ta pachhaihpa châ aw ta, O chyhpa chhao a tlawh tlawh ta pachhaihpa a châ aw.

¹² Lôpanô chô liata arâzy amâ râ beih mâ? Cha liata chyhsa ta viahchao tôhpazy ta lei a palie beih ma? Nâmo deikua cha, Adona cha châmaih lâta palie ei chi ta; Siana thei chhao, Tho khapa nama pachâsa haw.

¹³ “Lôdebâ vâta a ly kawpa ta, ‘Keimo thatlôna ta Kânai khihpi la pi ta, Keimo châta eima lapa châ vei ma?’ Tahpa ta a palai kawpazy saih u,

¹⁴ Pachâ teh u, Hy Izarei pathlazy, Châ dyuh awpa phopi padua aw na ta, Lebôhamâ tawhta Arabâ Chavah taihta Ama cha tlybai lymâ aw,” Abeipa, Pheisaihzy Khazohpa ta a tah.