AMÔSÂ 5 - Mara Bible RV (BSI)

Abeipa tlua la hroh mah y

¹ Hy Izarei pathla saih u, He bie he thei u la, Nâmo kyh liata ei chaphôhtuna bie he thei teh u.

² “Laihsa kôpa Izarei cha pao ha ta, Thyu heih thei khao vei; A râh liata siesaipa châ ta, A pathyu awpa y veih ei.”

³ Abeipa Zehôvâh ta heta na heta a tah: “Izarei phopi châta pheisaih a tuahpa khihpi cha, Sâh kha hrâ a siepazy hry liata za kha dei vaw kua aw ei ta, Za kha a siepazy hry liata pahrawh dei ama vaw kua aw.”

⁴ Abeipa ta Izarei phopi hnohta hetana heta a tah: “Kei na tlua u la, Nama hroh aw.

⁵ Bethel tlua leipa u la, Kilkal lâ sie khah u; Besebâ lâ chhao kiah hra khah u. Kilkal cha sei ta sie tlai aw ta, Bethel cha hraoleipa a châ aw.”

⁶ Abeipa tlua u la, Nama hroh aw; Chataleipatala Abeipa cha, Zawsi pathlazy hry liata mei hawhta vaw pua aw ta, Kâ aw ta, a pachhai awpa Bethel liata y aw veih ei.

⁷ Hy nâmo, adona cha tho khapa pachâsa ei chi ta, Siana alei liata a thypazy saih u!

⁸ Awhsicharu nata Vaothawlâpia zy tao ta, Thina nohpahli cha my pachâsa ta, Chhô chhao zâ zohpa ta taopa ta, Tilaipi tizy aw ta alei chô lia a patlaituhpa cha, A moh Zehôvâh a châ.

⁹ Ano cha diahsua chô liata raona pathlisa ta, Thokhy chô liata raona a patlôsatuhpa a châ.

¹⁰ Thokhy chhikao liata chhoreituhpa a hao ei ta, Biedopa a reihpa ama pasi.

¹¹ Dyhchhiepazy tlybai ei chi ta, Sâh chhiezy nama kheipa vâta, Alô khaipa ta ozy sa hra u la, A chhôh lia pahrâ aw veih ei chi; Kre sadô khochhih kawpazy tao hra u la, A kresawhti doh aw veih ei chi.

¹² Hy nâmo, chyhsa siapazy taola ei chi ta, Panaopapana lapa ta, Phahlapazy cha thokhy chhikao liata A pathluapa saih u, Nama paraona hluhzie pahno na ta, Nama moleina laizie ei pahno.

¹³ Chavâta chyhsa sopa cha, Cha hawhpa daihti liata â chalih thlâh ha aw, Daihti chhiepa a châpa vâta.

¹⁴ Nama hro thei nawpa ta, Chhiena tlua leipa u la, Phana tlua teh u; Chatanachata nama reipa hawhta, Zehôvâh, Pheisaihzy Khazohpa ta a cha ypâ aw ei.

¹⁵ Chhiena a haopa ta phana khoh u la, Thokhy chhikao liata ryureina dopa padua teh u; Cha hawhta nama tao khiahta cha, Zehôvâh, Pheisaihzy Khazohpa ta Zawsi chi laibâhpazy cha, A ngiachhie thei ngyu aw.

¹⁶ Chavâta Abeipa Zehôvâh, Pheisaihzy Khazohpa ta hetana heta a tah: “Tlyliah zydua liata chana y aw ta, Tlyliah to liata, ‘Cha rimâ cha! Cha rimâ cha!’ ama tah aw. Mâchhiesa awpa ta, Lyutaopazy awpakhy aw ei ta; Cha awpa ta, Chaphôhtu thaipazy ama hrua aw.

¹⁷ Nama hry liata ei vaw siepahlie awpa vâta, Kre sadô to liata chana a y aw,” Abeipa ta a tah.

Adona loh zaolao mawh sy

¹⁸ Nâmo, Abeipa noh a vâpazy saih u, Nama hu a po na! Khâpa châta ma Abeipa noh cha nama vâ tly? Cha noh cha khaihna châ leipa ta, Zohna mah tlao a châ tâh.

¹⁹ Chyhsa ta chakeibarôhneipa tawhta a râ ta, Chavyh ta tlao â tyhpa hawhta châ aw ta, O liata a ngiapa ta pâhchhô liata a ku pahnieh ta, Parih ta a pachu pylypa hawhta a châ aw.

²⁰ Abeipa noh cha khaihna châ leipa ta, Zohna mah a châ tâh; Pavâna rai y leipa ta, Zoh kaluhna mah a châ tâh.

²¹ Nama kyhchhizy a hao na ta, Chhyh thai khao va na; Nama pakhypi pathaihpazy chhao, A ly va na.

²² Raopa hlâna nata niepa hlânazy na hlâ hra u la, A pyh leipa aw na ta; Aryhna hlâna nama sa thawhpazy chhao, Moh aw va na.

²³ Nama hla palopasahpazy Kei tawhta hnei syulyu ha teh u; Nama totâ pyu chhao, Nathlie khoh va na.

²⁴ Chazy hlâta cha, Ryureina dopa cha chavah hawhta loh sala, Siana cha vahtie ti kua beih leipa hawhta loh mawh sy.

²⁵ “Hy Izarei pathlazy saih u, Râhchawhpa liata kô sypalih chhôh kha, Atheihna nata hmohlâpazy eina hlâ tyh ei chi ma?

²⁶ Chavâta nama bei Siku nata nama awhsi khazoh Kizu, Nâmosasyh ta namâ taopa nothlahpazy kha a phao aw ei chi ta,

²⁷ Dâmaskâ khô lâ ei cha pasiesa aw ei,” Abeipa, a moh Pheisaihzy Khazohpa ta a tah.