AMÔSÂ 4 - Mara Bible RV (BSI)

¹ “Nâmo, Samâri tlâhpi liata Bâsanâ viahchao panôzy saih u, He bie he nathlie teh u; Nâmo, dyhchhiepazy tlybai ei chi ta, Phahlapazy chanaohpa ta, Nama vahpazy hnohta, ‘Do awpa vaw cheih la, Doh ei suh u,’ A tahtuhpazy saih u, He bie he thei teh u!

² Abeipa Zehôvâh ta A pathaihna moh reipa ta bie â taih ha ta, Moh teh u, nohzy a cha vaw tlô thlu hai ei; Thua akopazy ta ama châ chhi nawpa noh vaw tlô hai ta, Nama sawzy taihta keipa ta amâ chhi nawpa noh a vaw tlô hai.

³ Thokhy pyuna tawhta pua aw ei chi ta, Nama hmia lâta sie lymâ aw ei chi ta, Hâmaw liata thypa nama châ aw,” Abeipa ta a tah.

⁴ “Bethel lâ a vy u la, Vaw molei teh u; Kilkal lâ a vy u la, Moleina vaw papôh teh u. Namâ theihnazy cha, My chareih ta vaw cheih u la; Nama su hrawh su khazy cha, Noh thôhna noh ta vaw cheih teh u.

⁵ Thinô pahlaopa viahchhâ cha, Alyna biereina atheihna ta hlâ u la; Lôhthai hmohlâpazy phuah u la, Pathâhsa teh u; Chazy cha nama tao khoh kawpa a châ khawh, Hy Izarei sawzy saih u!” Abeipa ta a tah.

⁶ “Nama khihpi zydua liata, Hâh pathaihna cha pie ei na ta; Nama yna su maihta, Viahchhâ phahlana ei cha pie ei; Chatanachôta kei lâ vaw kua veih ei chi,” Abeipa ta a tah.

⁷ “Sâh hria daihti thla thôh a y chy nota, Vâsua cha pakhâpa ei na ta; Khihpi miakha liata avâ pasuasa na ta, Khihpi hropa liata avâ ei pakhâ; Lyu miakha ta avâ hmô ta, Avâ a hmô leipa lyu cha a chawh tyh.

⁸ Chavâta khihpi miano miathôh ta Ti do awpa tluapa ta, Khihpi miakha lâ sie ei ta, Châhrasala ama lôhrâ tlô hlei vei; Chatanachôta kei lâ vaw kua veih ei chi,” Abeipa ta a tah.

⁹ “Raohna nata maohna ta cha tu ei na ta, Nama sadôzy chângyu ta nie ta, Nama kre sadôzy chângyu ta a nie khai haw; Nama theiku kôzy chângyu ta nie ta, Nama ôli thozy chângyu ta a nie khai haw, Chatanachôta kei lâ vaw kua veih ei chi,” Abeipa ta a tah.

¹⁰ “Izi râh liata ei taopa hawhna khata, Nama hry liata hri vaw tuah na ta; Nama satliazy zaozi ta thie ei na ta, Nama arâzy ei siekhei ha ei; Nama hnapasu a chahu awpa taihta, Nama riehmo cha thu roh ta ei pabie; Chatanachôta kei lâ vaw kua veih ei chi,” Abeipa ta a tah.

¹¹ “Sawdawmâ nata Kawmawrâ khihpizy Khazohpa ta a paraopa hawhta, Nama hry liata thokha cha parao ei na ta, Mei tawhta thothu a daopa hawhta nama vaw châ haw; Chatanachôta kei lâ vaw kua veih ei chi,” Abeipa ta a tah.

¹² “Chavâta Hy Izarei, Na chô liata he hmo he ei tao aw; Na chô liata he hmo he ei tao awpa vâta, Hy Izarei, na Khazohpa a tyh awpa ta a mâ teh!”

¹³ “Pachâ teh, tlâhzy taopa ta thlihzy paysa ta, A palôh chyhsa hnohta phuah ta, Khihdei pavâpa chhao azohpa pachâsa thei ta, Alei su sâhpazy liata a chareipa cha, A moh Zehôvâh, Pheisaihzy Khazohpa a châ.”