AMÔSÂ 2 - Mara Bible RV (BSI)

¹ Abeipa ta heta na heta a tah: “Môabâ moleina miathôh vâta, Âh, miapalih vâ chhao rai ta, Hriena chalihsa aw va na; Edômâ bei rupazy rao ta, Meipaoh lâta a palie hapa vâta.

² Chavâta Môabâ chô liata mei tuah aw na ta, Keriô abei ozy a kâ khai aw; Môabâ cha tymâna hry liata thi aw ta, Awhsâhpa nata chiahmie pyu hry liata a thi aw.

³ Ryureituhpa cha ano tawhta chhawh pathlah aw na ta, A beimachâ zydua chhao a hnohta ei thie khai aw ei,” Abeipa ta a tah.

⁴ Abeipa ta heta na heta a tah: “Zudâh moleina miathôh vâta, Âh, miapalih vâ chhao rai ta, Hriena chalihsa aw va na; Abeipa ryhpa dytha ei ta, A bieraopazy ama zyh leipa vâta. Âmo pathlatuhzy lâpi a chhih ei ta, Ama haipa biezy ta a paviasa ei.

⁵ Chavâta Zudâh chô liata mei tuah aw na ta, Zerusale abei ozy a kâ khai aw.”

⁶ Abeipa ta heta na heta a tah: “Izarei moleina miathôh vâta, Âh, miapalih vâ chhao rai ta, Hriena chalihsa aw va na; Chyhsa siapazy tâkâ ta zuah ei ta, Phahlapazy pheiky bao kha ta ama zuapa vâta.

⁷ Sipasapazy luh alei dohlei liata tlypâ ei ta, Dyhchhiepazy lâpi ama chahrih tyh; Paw nata saw ta chanô pakha a ziakhei ei ta, Ei moh pathaihpa ama papuapalei.

⁸ Sôhkâ poh a phawpa ta, Maisâh kiapâh liata a zia ei ta, Chyhsazy ama pacheisapa kresawhti cha, Ama Khazohpa o liata ama doh tyh.

⁹ “Chatanachôta sidy tho hawhta a sâh ei ta, Ôkâ tho hawhta a chyupa Amawri mo Ama hmiakô liata a pahleipadiapa kha keima ei châ; Chô lâta a thei pahleipadia na ta, Ry lâta a tharizy ei pahleipadia khai haw.

¹⁰ Izi râh tawhta châ kaw chhi ei na ta, Amawri mo râh hnei awpa ta, Râhchawhpa liata kô sypalih chhôh ei cha chhihtha ei.

¹¹ Nama sawchapaw thokha hrohsopazy ta padua ei na ta, Nama thyutlia thokha Nâzarai ta ei padua ei. Hy Izarei sawzy saih u, Cha hawhna tlai chata châ vei ma?” Abeipa ta a tah.

¹² “Châhrasala Nâzaraizy cha kresawhti padosapa ta, Hrohsopazy biepie ei chi ta, ‘Bie nama phuah awpa châ vei,’ nama tah tyh.

¹³ “Pachâ teh u, sapiah a phaohpa talailih ta alei a vipa hawhta, Nama yna liata ei cha vi aw ei.

¹⁴ A râ thei kawpa chhao ta chatlie thei khao leipa aw ta, Thatlôpa thatlôna y khao aw vei; Pasaipha chhao ta A hrona pabohsa thei aw vei.

¹⁵ Likathaipa a duah thei leipa aw ta, A phei lâsie a chatlie kawpa hmahta A pabohsa thei aw vei; Arâ a kiahpa chhao ta, A hrona pabohsa thei aw vei.

¹⁶ Cha noh liata cha, Pasaiphazy hry liata riahpha chaipa chhao, Thluahruapa ta â râ aw,” Abeipa ta a tah.