AMÔSÂ 1 - Mara Bible RV (BSI)

¹ He biezy he Zudâh bei Uzia â bei no nata Zôasâ sawchapaw Zerôbaw Izarei liata â beina daihti, alosih hlâ kô nona liata, Tekô khih liata mietaku vaituhpazy hry liatapa Amôsâ ta Izarei kyh a hmôpazy a châ.

Phopizy pachiana

² Amôsâ ta, “Abeipa cha Zaio tawhta a rôh ta, Zerusale tawhta ao a papua; Mietaku vaituhpa sibiepa suzy mâchhiesa ei ta, Kâmel tlâh laki a uah,” tah ta.

³ Abeipa ta heta na heta a tah: “Dâmaskâ moleina miathôh vâta, Âh, miapalih vâ chhao rai ta, Hriena chalihsa aw va na; Sâh chakhyna thua syulô hmâpa ta Kilia ama chakhypa vâta.

⁴ Chavâta Bei Hâze o liata mei tuah aw na ta, Benhadâ abei ozy a kâ khai aw.

⁵ Dâmaskâ thokhy chhikao hrainazy thlie aw na ta, Ave Saikao liata a pahrâpazy ei chhawh pathlah khai aw ei. Be-Idâh ryureina chôchahrei a chabapazy Chhawh pathlah aw ei na ta, Aramia zawpizy cha Kiri lâ sei ta ama sie aw,” Abeipa ta a tah.

⁶ Abeipa ta heta na heta a tah: “Kâza moleina miathôh vâta, Âh, miapalih vâ chhao rai ta, Hriena chalihsa aw va na; Phopi pôhpalôhpa a chhi ei ta, Edômâ lâ sei ta ama hlâpa vâta.

⁷ Chavâta Kâza thokhy chô liata mei tuah aw na ta, Abei ozy a kâ khai aw.

⁸ Asadô râhsawzy chhawh pathlah aw ei na ta, Askelaw ryureituhpazy ei chhawh pathlah aw ei; Ekaraw chô lia ei ku hy aw na ta, Philistinâ laibâhpazy ama leidia aw,” Abeipa Zehôvâh ta a tah.

⁹ Abeipa ta heta na heta a tah: “Tyre moleina miathôh vâta, Âh, miapalih vâ chhao rai ta, Hriena chalihsa aw va na; Phopi pôhpalôhpa Edômâ lâ hlâ ei ta, A unawhna biehrai amâ thei khao leipa vâta.

¹⁰ Chavâta Tyre thokhy chô liata mei tuah aw na ta, Abei ozy a kâ khai aw.”

¹¹ Abeipa ta hetana heta a tah: “Edômâ moleina miathôh vâta, Âh, miaplih vâ chhao rai ta, Hriena chalihsa aw va na; Zaozi ta a unawhpa a chadai ta, Ngiachhiena zydua thy khaipa ta, A hiehâhna ta khâ hriechheih ta, A pathiiana chhâzaw ta â vao thlâh hapa vâta.

¹² Chavâta Temâ chô liata mei tuah aw na ta, Bôzrâ abei ozy a kâ khai aw.”

¹³ Abeipa ta heta na heta a tah: “Amawna mo moleina miathôh vâta, Âh, miapalih vâ chhao rai ta, Hriena chalihsa aw va na; Ama râh ama pakawh thei nawpa ta, Kilia chanô sawphaohpazy py taihta ama pahypa vâta.

¹⁴ Chavâta Râbâ thokhy chô liata mei patih aw na ta, Adyuhna noh ta awhsâhpa pyu hry liata, Khisô nata thlihpipa hry liata, Abei ozy a kâ khai aw.

¹⁵ Ama bei cha sei ta sie aw ta, Ano nata a beimachâzy hmaohkha ta seichâna lâ ama sie aw,” Abeipa ta a tah.