3 ZAWHÂNA 1 - Mara Bible RV (BSI)

Anaohna

¹ Awnanopa chhituhpa ta biehmeiseihpa liata kyh ei pachâpa, kho ngaitapa Kaiâ ei châ naoh.

² Kho ngaitapa y, na thlahpa ta byhnâ a topa hawhta, ato liata byhnâ topa ta, hnatlâna phapa na hnei thei nawpa ta thlah ei cha chhâpa tyh.

³ Unawhzy vaw tlô ei ta, biehmeiseihpa châta ngâ nâ chhihzie nata biehmeiseihpa liata na y lymâzie ama vaw reipa ta eina palysa ngaita.

⁴ Ei sawzy bie hmeiseihpa liata ama y tahpa ei theipa hlâta nâ palysa viapa y vei.

Kaiâ phana reithaina

⁵ Kho ngaitapa y, unawhzy kha na châta hmia pahno leipa châ hra ei sala, ngâchhih ngaitapa ta ama chô liata hmo vaw tao chi ta,

⁶ âmo chata na kyhpachâna cha Awnanopa ama pahnosa haw. Khazohpa chyhsa ama châpa hawhta ama khitlyna liata deichhy tyh la, na tao pha kaw aw.

⁷ Ano moh vâta a sie tyhpa châ ei ta, Zenitaizy tawhta khâpa hmah la veih ei.

⁸ Chavâta cha hawhpa chyhsazy cha eima deichhy awpa a châ. Chatanachata biehmeiseihpa châta hrialâhpazy eima châ thei aw.

Diôtarephe pakhâna

⁹ Awnanopa hnohta châ vaw roh ha na ta, châhrasala ama hry liata chôchai ta y a khohpa Diôtarephe ta eima biehneina a pyh khoh vei.

¹⁰ Chavâta ei vy khiahta cha, a hmotaopa, eima kyh miah reih ta, thâ miah a pachhiena kyh kha ei pasia aw. Cha chhao cha a daih tah leipa ta, unawhzy a ly khoh leipa ta, a ly khohpazy pakhâ ta, Awnanopa tawhta a papua ei.

Demetia palyupalihna

¹¹ Kho ngaitapa y, moleina hâ a la leipa la, hmo phapa hâ a la mah y. Hmo pha a taotuhpa cha Khazohpa tawhtapa châ ta, moleina hmo a taotuhpa cha Khazohpa a hmô leipa a châ.

¹² Demetia cha chyhsa to palyupalihna hlao ta, biehmeiseihpa chhao ta a palyupalih. Keimo chhao ta palyupalih pi ta, keimo palyupalihna cha â do tahpa na pahno.

Anaohna chhâna

¹³ Na hnohta bie hluhpi ro awpa ei hnei. Châhrasala châsôh nata châti ta roh hlei aw va na.

¹⁴ Cha hmô patoh awpa hnabeiseih na ta, cha tina chata hmiachhypa ta bie eima reih khoh aw.

¹⁵ Thlalôhna na hnohta y mawh sy. Viasazy ta ama châ naoh. Viasazy kha ama moh reipa ta nâ vaw naohpa chyu mah y.