2 ZAWHÂNA 1 - Mara Bible RV (BSI)

Anaohna

¹ Awnanopa chhituhpa ta biehmeiseihpa liata kyh ei pachâpa chanô atlyhpa nata a sawzy ei châ naoh ei. Keima dei châ leipa ta, biehmeiseihpa a pahnopa zydua ta ama châ naoh hra.

² Biehmeiseihpa cha keimo liata y ta, chhâzaw ta eima hnohta a y aw.

³ Biehmeiseihpa nata kyhpachâna liata Paw Khazohpa nata Paw Sawchapawpa Zisu Krista tawhta ngiachhiena, zawngiahna nata thlalôhna eima hnohta y mawh sy.

Biehmeiseihpa nata kyhpachâna liata y awpa

⁴ Paw ta bie miah a piepa hawhta, na saw thokhazy biehmeiseihpa liata ama ypa hmô na ta, eina palysa ngaita.

⁵ Chanô phapa y, na hnohta biepie thiehpa vaw roh leipa na ta, athaohta tawhta eima hneipa biepiepa kha ei vaw roh heih. Kyh a pachâ raihrie suh u.

⁶ He he kyhpachâna cha a châ, a biepiepazy eima zyhpa hih. Kyh a pachâ raihrie awpa cha athaohta tawhta nama theipa nata nama zyh awpa ta biepiepa a châ.

⁷ Dôveituhpa hluhpi khizaw liata ama vaw pua haw. Âmo cha Zisu Krista sapa ta â vypa a pyh leipazy ama châ. Cha hawhpa chyhsazy cha dôveituhpa nata Krista dyuhtuhpazy ama châ.

⁸ Nama hria chiehpazy pahlei leipa ta, lymâ â kipa ta nama hmô thei nawpa ta, a hrohrua teh u.

⁹ Ahy rai Krista pachuna bie liata y leipa ta, ano kho ta a siepa cha Khazohpa a hnei leipa a châ. Krista pachuna bie liata a ypa deikua cha, Paw nata Sawchapawpa a hnei pakaoh.

¹⁰ Ahy rai Krista pachuna bie a phao leipa ta nâmo lâ â vy khiahta cha, nama o liata patlôsa leipa u la, reikah phapa chhao hlâ khuh vy.

¹¹ Reikah phapa a hlâtuhpa maih cha, ano moleina hmotaopazy liata a hlao hrapa a châ.

Anaohna chhâna

¹² Nama hnohta bie hluhpi ro awpa hnei hraw sah la, châhna nata châti hmâpa ta roh hlei aw va na. Eimâ lyna â ki thei nawpa ta, nâmo lâ a vy ta, hmiachhypa ta bie cha chho awpa ei tlao ei chhuah.

¹³ Atlyhpa na narônô sawzy ta ama châ naoh.