2 TIMAWTHY 4 - Mara Bible RV (BSI)

Bie cha chho teh

¹ Khazohpa nata Krista Zisu, ahrohpa nata athihpa a pachiatuh awpa mohmô liata, â vaw luahna nata a khinarâh reipa ta bie ei cha pie.

² Bie cha chho teh. A daihti nata a daihti leipa liata chhao chho teh. Dao thei ngaitana chôta nata pachuna chôta ama thaileizie pahnosa la, chhorei la, pasyu teh.

³ Chyhsazy ta pachuna dopa nathlie hoh leipa ta, ama nah â za hapa vâta, ama thei khohpa biezy a reih awpa pachutuhpazy deita ama hrua khohna daihti a vaw tlô aw.

⁴ Ama nahzy cha biehmeiseihpa lâ pahei leipa aw ei ta, phôhpazy lâ ama pahei aw.

⁵ Nâ deikua cha, ato liata a sohsi la, riethei tao la, thâtihpha chhotuhpa rai hria la, na chakaona patlô mah y.

⁶ Kei la tahmâ chhao he dopa hlâna hawhta hlâ haipa châ na ta, ei sie nawpa daihti a vaw tlô haw.

⁷ Adyuhna phapa a dyuh khai ha na ta, ei râpasuana patlô ha na ta, ngiapâna cha ei vao thlâh haw.

⁸ Tahmâ cha siana lakho ei châta sopa châ ha ta, cha cha Abeipa, pachiatuhpa sia ngaitapa ta, cha noh liata eina pie aw. Kei dei châ leipa ta, â vaw luahna a mokhâhtuhpa zydua hnohta chhao a pie aw ei.

Timothy hnohta ahawna

⁹ Kei lâ a vy patoh a chhuah lylia mah y.

¹⁰ Demâ cha tahmâhlâ khizaw he a tlaichhaipa vâta na siesai ta, Thysalawnika lâ sie ha ta, Krekisâ chhao Kalatia lâ sie ha ta, Titu chhao Dalmatia lâ a sie haw.

¹¹ Luka deita ei hnohta a y. Mâka kha hrua la, a vaw chhi mah y. Ano cha chakaona liata ei châta phahnai ngaitapa a châ.

¹² Tykiku cha Ephesi lâ ei tuah haw.

¹³ Nâ vy tita Tarôsa liata Karpâ hnohta viahkao pasipa ei siesaipa kha na vaw phaopa la, châbuzy nata châchatypazy chhao kha na vaw phaopa mah y.

¹⁴ Dawh leih thaipa Alezandâ kha thata nâ pasasapa a châ. Abeipa ta a hmotaopazy lymâ hawhta viari a thô aw.

¹⁵ Nâ chhao ano tawhta a vaih mah y, eima biereipa thata a dyuhtuhpa a châ.

¹⁶ Ei thaichâna bie ei rei tua nota ahy hmahta nâ duakhei leipa ei ta, tlao eina pathlua khai ha ei. Maochhiepa ta y khah ei sy!

¹⁷ Châhrasala keima hmâpa ta thâtihpha chho pakipa ta a y thei nawpa nata Zenitai zydua ta ama thei thei nawpa ta, Abeipa tlai ta nâ duakhei ta, tha eina patlô. Chatanachata chakeibarôhneipa pakah tawhta pachhapa ta ei y haw.

¹⁸ Abeipa ta moleipa zydua tawhta na pachha aw ta, a vâ khinarâh lâ â bohpa ta eina tlôkhei aw. A hnohta chhâzaw nata tlyzaw ta rônahna y mawh sy. Amen.

Anaohna nata byhnâ awna

¹⁹ Priskilâ nata Akuilâ nata Ônesiphôrâ chhôhkhazy kha nâ naohpa mah y.

²⁰ Erastâ cha Kawrini liata y chy ta, Tarôphimâ deikua cha, a tlâh leipa vâta Miletâ khih liata ei siesai haw.

²¹ Chasipaw hlâta a vy awpa a chhuah lylia mah y. Ebulâ, Pude, Linâ, Klaudia nata unawh zydua ta ama châ naoh.

²² Abeipa cha na thlahpa hnohta y mawh sy. Ngiachhiena nama hnohta y mawh sy.