2 TIMAWTHY 3 - Mara Bible RV (BSI)

Daihti hnôhchaipazy liata Khazohpa papeisaleina

¹ He he pahno mah y. Noh hnôhlâzy liata cha daihti ru ngaitapazy a vaw tlô aw.

² Chyhsazy ta âmo kyh dei a pachâ aw ei ta, tâkâ sôh tlaichhaipazy, apalaipazy, apatahsapazy, chyhsa a taochhiepazy, nôpaw reingiah leipazy, alyna châh pahno leipazy, pathaih leipazy,

³ kyhpachâna a pikhei leipazy, aryhna a tao khoh leipazy, haipa ta chyhsa leih hmâhpazy, a sohsi thei leipazy, nôchhiepazy, hmo pha a khoh leipazy,

⁴ piehpiepazy, hmiahnoh rao leipazy, apasâhsapazy nata Khazohpa hlâta khizaw haosai a tlaichhai viapazy ama châ aw.

⁵ Khazohpa chyhsa hawhta a lâ aw ei ta, châhrasala a hmotaotheina deikua zo aw veih ei. Cha hawhpa chyhsazy cha a heihsai mah y.

⁶ Cha hawhpa chyhsazy cha, ozy liata a ngiapa ta, chanô chiehleipazy patu ei ta, molei phaohri ta âmo cha pavipa ta, aohraohna to ta chyhsa a pasiesachheipazy ama châ.

⁷ A chu ngâ thlâh tlôh ta, châhrasala biehmeiseihpa a pahno thei beih leipazy ama châ.

⁸ Zane nata Zambare ta Mawsi amâ dyuhpa hawhna khata, cha chyhsazy ta biehmeiseihpa amâ dyuh tyh. Palôh moleipa, ngiapâna kyh liata tloh leipa ama châ.

⁹ Châhrasala sie parei aw veih ei. Ama hruzie cha, Zane nata Zambare chô liata hmo a tlôpa hawhna khata, chyhsa zydua hmiakô liata â vaw lâ aw.

Khazoh huso thlupa Biehrai

¹⁰ Nâ deikua cha, ei pachuna, ei yzie, ei hmochhuahpa, ei ngiapâna, ei daotheina, ei kyhpachâna nata tiamana zy pahno chi ta,

¹¹ taolana ei tyhpa nata pasa ei taona zydua na pahno. Antiôkâ khih liata zy, Ikônia khih liata zy, Lystâ khih liata zy taolana ei tyhna liata ei taopasana zydua pahno chi ta, cha taolanazy tawhta Abeipa ta eina pachhapa chhao na pahno.

¹² Hmeiseih ta la, Khazohpa khozie hawhta Krista Zisu liata hro a chhuahpa zydua cha taolana amâ tyh aw.

¹³ Moleipa nata dôtuhpazy deikua cha, chyhsa dôtuhpa nata dôpa ta a ypazy châ ei ta, chhiena tawhta chhie viana lâ ama pangai lymâ aw.

¹⁴ Nâ deikua cha, ahy tawhta a chupa ma na châ tahpa pahnopa ta, nâ chupa nata â ipa ta nâ ngiapâpa liana khata y lymâ mah y.

¹⁵ Na hawti no tawhta na pahno chiehpa Biehrai pathaihpazy kha zyh lymâ mah y. Cha Biehrai pathaihpazy cha Krista Zisu ngiapâna vâta pachha châ thei nawpa ta, chyhsa sopa châ pachâsa theipa a châ.

¹⁶ Biehrai zydua cha Khazohpa huso thlupa châ ta, pachuna châta zy, thailei pachâsana châta zy, chhoreina châta zy, siana achuna châta zy a phahnai ngaita.

¹⁷ Chatanachata Khazohpa chyhsa cha pakipa ta y aw ta, raihria phapa to châta tobipa ta a y aw.