2 TIMAWTHY 2 - Mara Bible RV (BSI)

Zisu Krista pheisaih phapa

¹ Chavâta nâ, ei saw y, Krista Zisu liata ngiachhiena a ypa liata thatlôpa ta y mah y.

² Pahnotuhpa hluhpi hmiakô liata ei bie reipa na theipazy kha, mohropazy a pachu pachhuah thei awpa chyhsa ngâchhihpazy ku liata pavaosa mah y.

³ Krista Zisu pheisaih phapa hawhta rietheina tao mah y.

⁴ Pheisaih ahy hmahta a dyuh nota hrochhôh khihsana a tymâkhei beih leipa ta, pheisaih châ awpa ta a tlyhtuhpa palysa tlao â chhuah.

⁵ Ataopasuana liata, chyhsa ta dâh hawhta a tei leipa khiahta cha, pahniena lakho pakho theipa châ vei.

⁶ Lyutaopa hriapasapa cha a thei a nie tua awpa a châ.

⁷ Ei biereipa he pachâ la, Abeipa ta kyh to liata novâhna a cha pie aw.

⁸ Ei thâtihpha reipa hawhta, athihpa hry tawhta a thyu heihpa, Dâvi pathla Zisu Krista a thei thlâh ha mah y.

⁹ Cha thâtihpha vâna chata pasa tao na ta, moleipa hawhta bâlia ta chahrypa ei châ. Châhrasala Khazohpa bie cha chahry theipa châ vei.

¹⁰ Chavâta atlyhpazy ta Krista Zisu liata a ypa pachhana cha, chhâzaw rônahna chhaota ama hmô thei nawpa ta, âmo châta ato pasa ei tao lylia.

¹¹ He bie he ngâ â chhih: A thina liata eima thi khiahta cha, A hrona liata eima hroh hra aw;

¹² Pasa eima tao khiahta cha, A hnohta ryu eima reih hra aw; Ano eimâ paphasai khiahta cha, Ano chhao ta miah â paphasai hra aw;

¹³ Keimo ngâchhih vei hra sih la, Ano cha ngâ a chhih ta, Anosasyh a paphasai thei vei.

Khazohpa ta â pyhpa hriatuhpa

¹⁴ He biezy he âmo pahnosa heih la, phahnaina hnei tlôh leipa ta nathlietuhpazy a parao tyhpa biezy liata a eichhia lei awpa ta biepie mah y.

¹⁵ Biehmeiseihpa â do ngaitapa ta a siekheipa raihriatuhpa cha, noza awpa a châ leipa hawhta, a pyh tlâhpa ta Khazohpa hmiakô liata nâ duah thei nawpa ta, na theina zydua papua mah y.

¹⁶ Khazohpa a hlao leipa bie sisaw leipa reipazy a hneisai mah y. Cha hawhpa biezy chata chyhsazy Khazohpa pachâ leina lâ a chhi via rili aw ta,

¹⁷ ama bie cha hmahchhiepa hawhta a kawh lymâ aw. Chazy hry liata Humenia nata Philetâ zy amâ hlao hra.

¹⁸ Biehmeiseihpa paviasai ei ta, thyuheihna a y haw tah ei ta, chyhsa thokha ngiapâna ama parao.

¹⁹ Châhrasala, “Abeipa ta ano eihzy a pahno,” tahpa nata “Abeipa moh a padopa maih moleina siesai mawh sy,” tahpa ta chahnao pa-ipa ta, Khazohpa lôbô a ipa cha â duah thlâh haw.

²⁰ O rônahpa liata tâkâ nata ngôh ta taopa hmobaohzy dei y leipa ta, tho nata beihlei ta taopazy chhao a y. Thokha sôh via ta, thokha a sôh lei via.

²¹ Chavâta chyhsa ta hmobaoh sôh lei viapazy tawhta anosasyh â pathaisa khiahta cha, hmobaoh sôhpa vaw châ aw ta, hmobaoh pathaihpa châ awpa ta pananopa, Abeipa hmâ tlâhpa nata raihria phapa to châta a mâ chiehpa ta a ypa a châ aw.

²² Thyutlia aohraohnazy a râsai la, palôh pathaihpa ta Abeipa padotuhpazy hry liata a hlaopa ta, siana, ngiapâna, kyhpachâna nata thlalôhna zy a chadai lymâ mah y.

²³ Aeichhiana hrupa nata phahnai leipazy cha ahryusina a papua tyh tahpa pahno chi ta, chavâta cha hawhpa liata a hlaohli khah y.

²⁴ Abeipa chakaotuhpa cha, a chô liata hmo pha leipa a tlôpazy dao thei ta, chyhsa a hryuh leipa ta, chyhsa to chô liata phana palâsa ta, Khazohpa bie a pachu theipa a châ awpa a châ.

²⁵ Khazohpa ta ano a dyuhtuhpazy chhao parosa thei ta, biehmeiseihpa pahnona lâ â chhi thei ei tahpa a ngiapâpa ta, Abeipa chakaotuhpa cha nônai kawpa ta taopathina rai a hria awpa a châ.

²⁶ Chatanachata ama chhie nata pha pahnona vaw hroh aw ta, ano khopa tao awpa ta âmo a patu tyhpa ahripa khoheih ama khôkhâh thei aw.