2 THYSALAWNIKA 3 - Mara Bible RV (BSI)

Thlahchhâ ahawna

¹ Achhâna liata cha unawh saih u, Abeipa bie nama hry liata a chatliepa ta pathâh ta, palyupalihpa ta a ypa hawhna khata, pathâh via lymâ sala, palyupalihpa ta a y thei nawpa ta, thlah miah chhâpa muh vy.

² Chyhsa zydua ngiapâtuhpa ama châ khai leipa vâta, chyhsa chhorupa nata moleipazy tawhta eimâ boh thei nawpa ta thlah miah chhâpa hra muh vy.

³ Châhrasala Abeipa cha ngâ a chhih ta, tha cha patlô aw ei ta, moleipa tawhta a cha pabohsa aw ei.

⁴ Bie eima cha piepazy zyh lymâ ei chi ta, nama zyh lymâ aw tahpa Abeipa liata eima cha ngâ.

⁵ Abeipa ta Khazohpa kyhpachâna nata Krista daotheina lâta nama palôhzy cha chhihtha mawh ei sy.

Thathi lei awpa ta zikyurâna

⁶ Unawh saih u, keimo tawhta pachuna bie nama daopa hawhta y leipa ta, thathipa ta a ypa unawh tawhta a panano awpa ta eima Beipa Zisu Krista moh ta bie eima cha pie.

⁷ Nama hnohta eima y nona kha, thathipa ta y beih ma pi. Chavâta eima hâ miah namâ lanazie awpa cha nâmo tlai ta nama pahno.

⁸ Ahy viahchhâ hmah a saipa ta nie beih leipa pi ta, ahy phaohri hmah eima châ lei nawpa ta, chhô nah zâ ta hria pi ta, riethei taopa nata hriapasapa ta eima y tyh.

⁹ Miah chyh awpa ta nâmo châ hnaw theina eima hnei leipa vâta châ leipa ta, eima hâ miah a la awpa eima cha khokheipa vâta rai eima hriapa a châ.

¹⁰ Nama hnohta eima y nona chhao khata, “Rai a hria khoh leipa cha, a nie chhao nie khah sy,” tahpa ta bie eima cha pie khawh.

¹¹ Nama hry liata thokha cha thathipa ta ama y tahpa thâtih eima thei. Rai hria leipa ta ychakhyh ei ta, chyhsa a patypamâpazy ama châ.

¹² Cha hawhpa chyhsazy cha, a thlih thlâh hapa ta ama rai hria ei sala, ama nie awpa hria papua awpa ta Abeipa Zisu Krista moh ta biepie pi ta, eima pasyu.

¹³ Unawh saih u, nâmo deikua cha, hmo pha tao ai khuh vy.

¹⁴ Ahy rai, he châpaphaopa liata eima bie a zyh vei khiahta cha, cha chyhsa cha ngia u la, nozapa ta a y thei nawpa ta, a pahlao khuh vy.

¹⁵ Khakhaipa hawhta deikua moh leipa u la, unawh hawhta zikyu a râ muh vy.

Byhnâ awna

¹⁶ Thlalôhna Beipa ta kyh to liata thlalôhna cha pie lymâ mawh ei sy. Abeipa cha nama zydua hnohta y mawh sy.

¹⁷ Kei, Pawla ta, keima ku tlai ta, he anaohna châ he ei ropa a châ. He he ei châpaphaopa to liata ngiana châ ta, he he ei ro tyhzie a châ.

¹⁸ Eima Beipa Zisu Krista ngiachhiena nama zydua hnohta y mawh sy.