2 THYSALAWNIKA 2 - Mara Bible RV (BSI)

Ryhpa paraotuhpa

¹ Unawh saih u, eima Beipa Zisu Krista avyna nata a hnohta lapakhypa ta eima y nawpa kyh liata, nâmo lâta ahawna ei tao.

² Abeipa Noh cha a vaw tlô ha na, tahpa ta thlahpa ta reipa tlyma, bie ta reipa tlyma, keimo tawhta châpaphaopa hawhta reipa tlyma a y khiahta cha, nama palôh thlai a chalyu leipa sala, nama thlazoh hra khah sy.

³ Ahy hmahta kheihawhta hmah cha dôvei khah ei sy. Paosaina a vaw tlô ha tua leipa nata ryhpa paraotuhpa leidia sawchapawpa â vaw luah tua leipa ta cha, cha Noh cha vaw tlô aw vei.

⁴ Ano cha khazoh moh bipa nata a chhypa maih a dyuhpa ta, anosasyh â palyupalih aw. Khazohpa hawhta a phuah aw ta, Khazohpa Achhyna o liata a tyuh aw ta, Khazohpa hawhta â chaluah aw.

⁵ Nama hnohta ei y nota, he biezy ei cha chho tyhpa ei kha a thei thlâh ha veih ei chi ma?

⁶ Ano daihti liata â vaw luah thei nawpa ta, tahmâ cha pakhâpa ta a y chy tahpa nama pahno.

⁷ Ryhpa paraona bienyupa cha tahmâ chhao a hria pathao haw. Châhrasala lapa ta a y hlâlei cha, pakhâtuhpa ta a pakhâ chy aw.

⁸ Cha khai tawhta, ryhpa paraotuhpa cha a vaw luah aw ta, Abeipa Zisu ta ano cha a pakah hu ta thie aw ta, â vyna khaihna ta a pahleipadia aw.

⁹ Ryhpa paraotuhpa cha, hmotaotheina to nata ngiana nata hmonoâhpa ta dôveina to hmâpa ta, Sâtâ hmotaotheina chhaota â vy aw.

¹⁰ Leidia haipazy cha pachha châ nawpa biehmeiseihpa khoh leipa ta ama dythapa vâta, ryhpa paraotuhpa cha dôveina pha leipa to chhaota âmo lâ â vy aw.

¹¹ Haipa bie ama zo thei nawpa ta, Khazohpa ta dôveina thatlô ngaitapa ama hnohta a vaw patlôsa.

¹² Chatanachata biehmeiseihpa zo leipa ta, sialeina liata a lypa zydua cha, thailei pachâsapa ama châ khai aw.

A pachyu awpa ta pasyuna

¹³ Abeipa kyhpachâpa unawh kho ngaitapa saih u, Thlahpa Pathaihpa pathaisana nata biehmeiseihpa ngiapâna vâta pachha châna liata thei hmiatuapazy châ awpa ta, Khazohpa ta â tlyhpa nama châpa vâta, nâmo vâta Khazohpa lâ alyna bie khâ a reih awpa eima châ.

¹⁴ Eima Beipa Zisu Krista rônahna nama to thei nawpa ta, Khazohpa ta eima thâtihpha hmâpa ta a cha aw ei.

¹⁵ Chavâta unawh saih u, â ipa ta a duah u la, biereipa ta tlyma, châpaphaopa ta tlyma, hrozie awpa eima cha pachupa zydua kha khâchâ patu ha muh vy.

¹⁶ Eima Beipa Zisu Krista nata Khazohpa eima Paw, kyh miah pachâ ta, ngiachhiena vâta chhâzaw thlalôhna nata hnabeiseihna phapa miah pietuhpa ta

¹⁷ nama palôhzy thlah cha palôh ei sala, raihria phapa nata bie phapa to châta cha padua mawh ei sy.