2 THYSALAWNIKA 1 - Mara Bible RV (BSI)

Anaohna

¹ Pawla nata Silvanâ nata Timawthy ta Khazohpa eima Paw nata Abeipa Zisu Krista liata Thysalawnika Awnanopa eima châ naoh.

² Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

Alyna bie reina nata thlahchhâna

³ Unawh saih u, nâmo vâta Khazohpa hnohta alyna bie khâ a reih awpa eima châ. Cha cha eima tao awpa rai a châ. Ngiapâna kyh liata thata laiseih ei chi ta, kyh namâ pachâ raihriena mo to liata a pôh rili.

⁴ Chavâta taolana namâ tyhna nata pasa nama taona zydua liata nama pachyuzie nata nama ngiapâna zy kha, Khazohpa Awnanopazy hry liata eima châ palaikhei kaw tyh.

Krista â vy tita pachiana

⁵ He he Khazohpa pachiana siazie â lâna a châ: Khazohpa khinarâh châta pasa a taopa nama châpa hawhta, Khazohpa khinarâh to tlâhpa ta raopa nama châ aw.

⁶ Khazohpa pachiana cha a do ta, nama rie châ patheituhpazy cha rietheina ta viari a thô aw.

⁷ Eima Beipa Zisu, a vâlyuhchâpa thatlôpazy chhaota meipaleih hry liata â vaw luah tita, keimo hawhta pasa a taopazy a cha pahâsa aw ei.

⁸ Khazohpa a pahno leipazy nata eima Beipa Zisu Krista thâtihpha a zyh leipazy chô liata deikua phuh a la aw.

⁹ Chhâzaw leidiana ta hriepa châ aw ei ta, Abeipa mohmô tawhta nata a thatlôna rônahpa tawhta papuapa ama châ aw.

¹⁰ Cha pachiana cha, a mopathaihpazy hry liata palyupalih awpa nata ngiapâtuhpa zydua hry liata noâh tah awpa ta â vyna noh liata a y aw. Nâmo deikua cha eimâ duakheipa bie a ngiapâtuhpazy nama châ.

¹¹ Khazohpa ta a awpa nama châna a phuhpa ta nama y thei nawpa nata hmopha tao namâ chhuahpazy nata ngiapâna ta hmo nama taopazy cha, a hmotaotheina ta hlao a cha patlohsa thei nawpa ei ta, thlah khâ eima cha chhâpa tyh.

¹² Chatanachata eima Khazohpa nata Abeipa Zisu Krista ngiachhiena lymâ hawhta, eima Beipa Zisu moh cha nâmo liata palyupalihpa ta y aw ta, nâmo chhao ano liata palyupalihpa ta nama y aw.