2 THÂTIHZYRONA 9 - Mara Bible RV (BSI)

Sebâ Beinô

¹ Sawlawmaw moh pathâhnazie Sebâ beinô ta a thei nahta, Sawlawmaw cha bie khiakhi ngaitapazy ta pasia awpa ta Zerusale lâ a khy ta. Zituhpa hluhpi nata ia-ôzy nata ngôh nata lôsôhpa hluhpi phaoh ta, râraoseihpazy chhaota khy ta. Sawlawmaw kô a tlô nahta, a palôh liata bie a ypa zydua chho ta.

² Sawlawmaw ta a hiahripa zydua cha a chhy khai ta. Sawlawmaw ta a chhopasia thei leipa bienyupa khâpa hmah y vei.

³ Sebâ beinô ta Sawlawmaw sozie, a o sapa,

⁴ a tlâhkhai liata niedo, a beimachâzy atyuna paryhzie, a chakaotuhpazy chakaozie nata amâ tobizie, a nyu hlâtuhpazy nata amâ tobizie nata Abeipa o liata raopa hlâna a hlâpazy a hmôpa cha, a huhiah chhao so pha thei khao leipa ta.

⁵ Abei hnohta, “Na biereipa nata na sozie zy ama reipa ei râh liata ei vaw theipa kha, â vaw do tlai he zaw.

⁶ Châhrasala a khy na ta, ei mo tlai ta ei kaw hmô hlâ heta cha, ama reipa kha zo hlei va na. Na sona rônahzie â khophie chhao eina chho leipa ei he. Ama reipa ei theipa na khô syulyu haw.

⁷ Na lapinôzy ama nohlao kaw dia! Na hmiakô liata a duah ta, na sona bie a thei tyhpa châ chakaotuhpazy he ama nohlao kaw na!

⁸ Na chô liata a ly ta, ano châta bei châ awpa ta a beidyuchhai liata châ patyutuhpa Abeipa na Khazohpa cha reithaipa ta y maw sy! Na Khazohpa ta Izarei he kyhpachâ ta, chhâzaw châta a padua khohpa vâta, ryureina dopa nata siana ta ryu na reih thei nawpa ta, ama chô liata bei ta a cha tao hih,” tah ta.

⁹ Chatanachata Sebâ Beinô ta Bei Sawlawmaw cha ngôh talent 120 nata ia-ô hluhpi nata lôsôhpazy pie ta. Sebâ Beinô ta Bei Sawlawmaw a piepa ia-ô tlu ta a hluhpa y beih vei.

¹⁰ Ôphi tawhta ngôh a vaw phaoh tyhpa Hirâ chakaotuhpazy nata Sawlawmaw chakaotuhpazy ta alku tho nata lôsôhpazy chhao vaw phaoh ei ta.

¹¹ Abei ta alku tho cha hmâpa ta Abeipa o nata abei o kahmizy tao ta, cha tho hmâpa chata hlasatuhpazy châta totâ nata tlaipih zy tao hra ta. Cha hawhpa cha Zudâh râh liata hmô awpa y beih vei.

¹² Bei Sawlawmaw ta Sebâ beinô cha, ano kaw phaopa a hlao leipa ta, a khopa nata a hiapa maih pie ta. Chatanachata a chakaotuhpazy chhaota a râh lâ a lie ha ta.

Sawlawmaw hneirôna nata mohpathâhna

¹³ Sawlawmaw liata kô kha chhôh ta ngôh a ngiapa cha talent 666 a châ.

¹⁴ Cha hry liana chata sôhdaohpa nata sôhpaliepazy ta râhpaw ama piepa a hlao vei. Arabia bei zydua nata Izarei râh pachhaihpa ryureituhpazy chhao ta Sawlawmaw hnohta ngôh nata tâkâ zy ama pie lymâ.

¹⁵ Bei Sawlawmaw ta ngôh ta daipa vyhphao laipa 200 tao ta, vyhphao laipa miakha liata ngôh sekel 600 lymâ hmâpa a châ.

¹⁶ Chatawhcha ngôh daipa vyhphao 300 tao ta, vyhphao miakha liata ngôh sekel 300 lymâ hmâpa a châ. Chazy cha abei ta Lebanaw Râhmâhpa O liata soh ta.

¹⁷ Abei ta sianaoh beidyuchhai rônah ngaitapa chhao tao ta, ngôh suapa ta pahu ta.

¹⁸ Beidyuchhai cha ngôh ta taopa kahmi nata pheitlyna zy hnei ta, beidyuchhai nata pazaopa ta taopa châ ta, kahmi cha chhâh charupa a châ. Atyuna chavei chachâh ta a kuzy y ta, beidyuchhai kuzy kiah liata chakeibarôhneipa nothlahpa pô no a duah ta.

¹⁹ Beidyuchhai kahmi chhâh charuzy liata a kâ chavei chachâh ta chakeibarôhneipa nothlahpa pô hrawh hleino, chhâh kha liata pô no lymâ ta a duah ta. Cha hawhpa beidyuchhai cha kheihawhpa khinarâh châta hmah tao beih veih ei.

²⁰ Bei Sawlawmaw nyu zydua cha ngôh nyu sai châ ta, Lebanaw Râhmâhpa O liata hmobaoh zydua chhao, ngôh suapa ta taopa sai a châ. Sawlawmaw daihti liata la, tâkâ cha khâpa saw ta reih veih ei.

²¹ Abei balyhzy cha Hirâ chakaotuhpazy chhaota Tâsi la sie tyh ta. Tâsi balyhzy chata kô thôh padai ta ei kha, ngôh, tâkâ, sianaoh, veituh nata varapa zy vaw phaoh tyh ta.

²² Cha hawhna chata Bei Sawlawmaw cha hneirôna nata sona liata khizaw bei zydua a khô khai ha ei.

²³ Khazohpa ta a palôh liata sona a sopa nathlie awpa ta, khizaw bei zydua ta Sawlawmaw cha ama pangai tyh.

²⁴ Ano a tlypa bei maihta kuhriazy phaopa tyh ei ta, tâkâ nata ngôh hmobaohzy, chysiazy, myrâzy, ia-ôzy, arâzy, sabaituzy kô chareih ta ama vaw phaopa tyh.

²⁵ Sawlawmaw ta arâ nata talailih sona su 4,000 hnei ta, arâ pheisaih 12,000 hnei ta, chazy cha talailih khihpizy liata nata Zerusale liata abei hnohta a paysa ei.

²⁶ Ufrâti chavah tawhta Philistinâ nata Izi râhri taihta abei zydua chô liata a bei ta.

²⁷ Abei ta tâkâ cha alô hawhta pachâna taihta Zerusale liata pachô ta, sidy tho chhao Sephelâ liata theiku tho hawhta hluhpa ta a pachô.

²⁸ Izi râh nata râh to tawhta arâzy chhao Sawlawmaw châta chalei lymâpa a châ.

Sawlawmaw thina

²⁹ Sawlawmaw thâtih hropazy cha âthaona tawhta achhâna taihta, hrohsopa Nâthâ châbu liata zy, Silô chyhsa Ahiza hrohsona châbu liata zy, Nebâ sawchapawpa Zerôbaw kyh liata hrohsopa Idô aluahna châbu liata zy ropa a châ.

³⁰ Sawlawmaw cha Izarei saw zydua chô liata Zerusale liata kô sypalih a bei ta.

³¹ Sawlawmaw cha a pathlatuhpazy hnohta a mô ta, a paw Dâvi khihpi liata pabu ei ta, a sawchapawpa Rehôbaw ta ano su liata â bei.