2 THÂTIHZYRONA 7 - Mara Bible RV (BSI)

Vâ tawhta mei

¹ Sawlawmaw ta thlah a chhâ khaipata nahta, avâ tawhta mei za tla ta, raopa hlâna nata atheihna sazy kâ khai ta, Abeipa rônahna ta Achhyna o cha bie ha ta.

² Abeipa rônahna ta Abeipa o cha a pabie hapa vâta, theihthaipazy cha Abeipa o lâ a ngia thei khao leipa ei ta.

³ Izarei saw zydua ta avâ tawhta mei a za tlapa nata Achhyna o chô liata Abeipa rônahna cha ama hmô nahta, lôphia phawpa siphiah chô liata ama hmia alei lâ a khupa ta a bôh ei ta, “Abeipa cha pha ta, A zawngiahna chhâzaw ta a y aw,” tahpa ta Abeipa cha a chhy ei ta, ano lâ alyna bie ama reih.

Achhyna o hlâna

⁴ Chatawhcha abei nata zawpi zydua ta Abeipa hmiakô liata atheihna hlâ ei ta.

⁵ Bei Sawlawmaw ta atheihna hlâna châta viahchao tôhpa 22,000 nata mietaku 120,000 hlâ ta. Cha hawhna chata abei nata zawpi zydua ta Khazohpa o cha hlâ ei ta.

⁶ Theihthaipazy nata Livai pathlazy cha ama su chyu liata a duah ei ta, Abeipa lâ alyna bie reina, “A zawngiahna chhâzaw ta a y,” tahpa hla cha pyungiapa chhaichhizy nata patlapa ta sa ei ta. Âmo dady liata theihthaipazy ta chiahmie tô ei ta, Izarei saw zydua cha a duah thlâh ha ei ta. Cha hla nata pyungiapa chhaichhizy cha Bei Dâvi ta Abeipa reithai nawpa ta a hmâ tyhpa, pyungiapa chhaichhizy chhaota theihthaipazy a pasasa tyhpa hla a châ.

⁷ Sawlawmaw ta Abeipa o laihmia lâta dôhpachhôh tlyhmia liah chaipa cha pathaisa ta. Cha liata raopa hlâna nata aryhna hlâna thaw zy hlâ ta. Sawlawmaw taopa dawh maisâh cha raopa hlâna, niepa hlâna nata sa thaw zy hlâ nawpa châta a chyh tupa vâta, tlyhmia liah liata a hlâpa a châ.

⁸ Cha daihti liata Sawlawmaw ta kyhchhi noh sari tao ta. Lebôhamâ tawhta Izi Chavah taihta Izarei saw zydua a ki khaipa ta, zawpi hluh ngaitapa tlôpakhy ei ta.

⁹ Maisâh hlâna nata kyhchhina noh sari ama hmâ khai tawhta, a noh chariena noh ta pakhypi pathaihpa hmâh ei ta.

¹⁰ Thla sarina, noh kih nata noh thôhna noh ta, zawpizy cha ama o lâ chyu padisa ta. Abeipa ta Dâvi nata Sawlawmaw nata a phopi Izarei sawzy chô liata a phana a palâsapa zydua vâta, alypa nata thaphapa ta ama o lâ chyu a di ha ei ta.

Molei rona thlahchhâna

¹¹ Sawlawmaw ta Abeipa o nata abei o cha paloh ta. A palôh ta â chhuahpa hawh tlai ta, Abeipa o chhôh lâ nata ano o chhôh lâta tao awpa zydua chhao a phapa ta paloh khai ta.

¹² Sawlawmaw hnohta zâ ta Abeipa a vaw luah ta, a hnohta, “Na thlahchhâna thei na ta, he su he keima châta atheihna o ta ei rao hawh.

¹³ Avâzy ei khawpa vâta khihti a y lei tita tlyma, khawsuzy bie ei piepa vâta râh a nie khai tita tlyma, ei phopi liata potlana ei chareisa tita tlyma,

¹⁴ ei moh a phaohpa ei phopi ta a panawh ei sala, thlahchhâpa ta ei hmia tlua ei sala, ama yzie moleinazy amâ heihsai khiahta cha, vârâh tawhta vaw nathlie aw na ta, ama moleinazy a ngiahthai aw na ta, ama râh cha ei patlâh heih aw.

¹⁵ He su liata thlahchhâna lâ cha ei mo tawpâ aw na ta, nah ei pachôh aw.

¹⁶ He o liata ei moh chhâzaw ta a y thei nawpa ta, he o he a tlyh na ta, ei pathaisa haw. He liana heta ei mo nata ei palôh chhâzaw ta a y thlâh ha aw.

¹⁷ Nâ chhao, na paw Dâvi hawhta ei mohmô liata y la, bie ei cha piepa zydua tao la, ei bieraopazy nata ei pachianazy na zyh khiahta cha,

¹⁸ na paw Dâvi hnohta, ‘Izarei chô liata ryu a reih awpa na pathla tawhta chie aw veih ei,’ tahpa ta bie ei hrai hapa hawhna khata, nâ beina beidyuchhai cha ei pa-i lymâ aw.

¹⁹ “Nama hmiakô liata ei sopa, ei bieraopazy nata ei biepiepazy a heihsaipa ta, khazoh hropazy pangaipa ta, âmo cha chakaopa ta namâ chhy khiahta deikua cha,

²⁰ râh ei cha piepa tawhna ei heta cha phia aw ei na ta, ei moh châta ei pathaisapa, he o chhao he ei mohmô tawhta pazaw syulyu ha aw na ta, phopi to châta pakhona bieso nata pahneiparâsaona châta ei tao aw.

²¹ He o rônahpa he, a chapiapa maihta noâh tahpa ta, ‘Khazia ma Abeipa ta he râh nata he o he, he hawhta a tao ha tly?’ tah aw ei ta,

²² chyhsazy ta, ‘Ama pathlatuhpazy Izi râh tawhta a chhi papuatuhpa Abeipa, ama pathlatuhpazy Khazohpa siesai ei ta, khazoh hropazy a patupa ta, a chhy ei ta, ama chakaopa vâta, Abeipa ta he chhiena zydua he ama chô liata a patlôsapa a châ,’ ama tah aw,” tah ta.